ភ្នំពេញ: ផលិតករភាពយន្ដកម្ពុជាពេលនេះមានឱកាសបង្ហាញស្នាដៃភាពយន្ដបែបអប់រំជាមួយបេក្ខជនមកពីជុំវិញពិភពលោក និងអាចដណ្ដើមពានរង្វាន់ក្នុងព្រឹត្ដិការណ៍ប្រកួតស្ដីពីការទប់ស្កាត់អំពើរំលោភបំពានផ្លូវភេទក្នុងជម្លោះ (PSVI) ដែលចាប់ផ្ដើមទទួលបេក្ខភាពចូលរួម។
ក្រសួងការបរទេសចក្រភពអង់គ្លេសសហការជាមួយអង្គការសប្បុរសធម៌ផ្នែកអប់រំ Royal Television Society នៅចក្រភពអង់គ្លេសបានបើកការប្រកួតភាពយន្ដសម្រាប់ជាឱកាសដល់ផលិតករភាពយន្ដមកពីគ្រប់ប្រទេស និងជុំវិញសកលលោក។
បង្កើតឡើងក្នុងឆ្នាំ ២០១២ ដោយអតីតរដ្ឋមន្ដ្រីការបរទេស វីល្លៀម ហេក និងតារាភាពយន្ដ អេនជេលីណា ជោលី បេសកជនពិសេសទទួលបន្ទុកជនភៀសខ្លួនរបស់អង្គការសហប្រជាជាតិការប្រកួតភាពយន្ដ PSVI មានបំណងផ្សព្វផ្សាយចំណេះដឹងសាធារណៈស្ដីពីអំពើរំលោភបំពានផ្លូវភេទលើស្ដ្រី បុរស កុមារី និងកុមារាក្នុងស្ថានភាពជម្លោះប្រដាប់អាវុធ និងសកម្មភាពទូទៅដើម្បីបញ្ឈប់ទង្វើនេះ។
យោងតាមរបាយការណ៍ពីអគ្គលេខាធិការអង្គការសហប្រជាជាតិស្ដីពីអំពើរំលោភបំពានផ្លូវភេទទាក់ទងនឹងជម្លោះឆ្នាំ ២០១៩ នេះបានបង្ហាញថា៖ «អត្ថន័យនៃអំពើរំលោភបំពានទាក់ទងជម្លោះសំដៅលើទង្វើចាប់រំលោភផ្លូវភេទ ទេសករផ្លូវភេទ ពេស្យាកម្មដោយបង្ខំ ពពោះដោយបង្ខំ រម្លូតកូនដោយបង្ខំ បញ្ឈប់យកកូនដោយបង្ខំ រៀបការដោយបង្ខំ និងបញ្ហាផ្សេងៗពាក់ព័ន្ធនឹងអំពើរំលោភបំពានផ្លូវភេទប្រឆាំងស្ដ្រី បុរស កុមារី ឬកុមារដោយផ្ទាល់ និងប្រយោលទាក់ទងនឹងជម្លោះ»។
បេក្ខជនប្រកួតអាចដាក់ខ្សែភាពយន្ដទាក់ទងនឹងការបញ្ឈប់អំពើរំលោភបំពានផ្លូវភេទ ហើយផលិតករអាចបង្ហាញស្នាដៃរបស់ខ្លួនជាប្រភេទសាច់រឿងប្រឌិត និងបទពិសោធផ្ទាល់របស់ជនរងគ្រោះ។
ភាពយន្ដនេះមាន ៣ ប្រភេទគឺភាពយន្តខ្លី ៦០ វិនាទី ភាពយន្ដខ្លីពី ១ ទៅ ៤៥ នាទី និងភាពយន្ដខ្នាតវែងចាប់ពី ៤៥ នាទីឡើង។ ប្រភេទនីមួយៗអាចទទួលបាននូវតាមប្រភេទ និងពានទទួលបានការសម្ដែងមតិច្រើនបំផុត។ នៅមានពានពិសេសមួយទៀតគឺផលិតករភាពយន្ដវ័យក្មេង PSVI ឆ្នាំ ២០១៩ ដែលបេក្ខជនត្រូវមានអាយុក្រោម ៣៥ ឆ្នាំ។
ដោយសារផលិតករខ្លះអាចយល់ឃើញថាវាជាប្រធានបទរសើប អ្នកនាង ឌិន ដារ័ត្នតី ជាមន្ដ្រីទំនាក់ទំនងសាធារណៈ និងកិច្ចការនយោបាយនៅស្ថានទូតចក្រភពអង់គ្លេសប្រចាំនៅកម្ពុជាបានឲ្យដឹងថា៖ «ទាក់ទងនឹងប្រធានបទរសើបចំពោះការផលិតភាពយន្ដ ឬសិល្បៈ ខ្ញុំជឿថាផលិតករអាចសម្រាំងយកមុំណាដែលអាចផលិតបាន ឬគាត់អាចមានភាពច្នៃប្រឌិតណាមួយដែលគាត់គិតថាអាចធ្វើបាន»។
មន្ដ្រីទូតអង់គ្លេសរូបនេះបានប្រាប់ ភ្នំពេញ ប៉ុស្ដិ៍ ថា៖ «រឿង PSVI ជាគឺជាបញ្ហាសកល។ វាមិនមែនកើតឡើងសម្រាប់នៅស្រុកខ្មែរយើងនោះទេ។ វាជាគំនិតផ្ដួចផ្ដើមមួយរបស់ស្ថានទូតអង់គ្លេសដែលយើងធ្វើនៅច្រើនកន្លែងដែរទូទាំងពិភពលោក។ យើងចង់ឲ្យផលិតករខ្មែរមានទំនុកចិត្ដក្នុងការចូលរួមប្រកួត ក៏ដូចជាប្រើប្រាស់គំនិតច្នៃប្រឌិតរបស់ខ្លួនរៀបរាប់អំពីរឿងរ៉ាវរបស់គាត់ និងប្រទេសកម្ពុជាទៅលើឆាកពិភពលោក។ យើងចង់ឃើញគាត់បង្ហាញសមត្ថភាពផ្ទាល់ខ្លួន និងផលិតកររបស់គាត់ផងដែរ»។
ផលិតករគួរផ្ដោតលើគន្លឹះចម្បង ៣ ចំណុចសំខាន់ៗការពង្រឹងដល់ភាពយុត្ដិធម៌ចំពោះជនរងគ្រោះក្នុងជម្លោះ និងគាំទ្រការបញ្ឈប់ភាពអាម៉ាស់ដែលពួកគេទទួលរង។ សារក្នុងសាច់រឿងផ្ដល់នូវឱកាសងាយស្រួលដល់ជនរងគ្រោះទទួលបាននូវការថែទាំសុខភាព គាំទ្រ ដល់សង្គមចិត្ដវិទ្យា និងកម្មវិធីរស់នៅសុខដុម។ វាពង្រឹងដល់សន្ដិសុខ និងបេសកកម្មរក្សាសន្ដិភាពក្នុងពិភពលោក។
អ្នកនាង ដារ័ត្នតី បង្ហើបប្រាប់ថាបេក្ខជនសក្ដានុពលពីកម្ពុជាអាចត្រូវបានឧបត្ថម្ភក្នុងឱកាសចូលរួមព្រឹត្ដិការណ៍សិក្ខាសាលាស្ដីពីភាពយន្ដធំៗនៅទីក្រុងឡុងដ៍។
ស្ថានទូតអង់គ្លេសបានប្រកាសថា៖ «ពានធំគឺជាការចំណាយសោហ៊ុយធ្វើដំណើរទៅកាន់ទីក្រុងឡុងដ៍ដើម្បីចូលរួមសន្និសីទជាទីដែលភាពយន្ដគ្រងជយលាភី និងភាពយន្ដទទួលបានការសម្ដែងមតិច្រើនបំផុតនឹងត្រូវបានដាក់បញ្ចាំង និងផ្សព្វផ្សាយពេញបណ្ដាញស្ថានទូតអង់គ្លេសទូទាំងពិភពលោក»។
ព័ត៌មានលម្អិតមាននៅ https://www.gov.uk/government/organisations/preventing-sexual-violence-initiative៕