ក្រុងញូវយ៉ក: ទំនោរទទួលទានស្រា កុមប៊ូឆា កំពុងពេញនិយមប្រភេទស្រាដំបែ និងបាក់តេរី លាយរសជាតិតែអស់រយៈពេលជាច្រើនទសវត្សរ៍។ ដោយចាត់ទុកជាភេសជ្ជៈបែបធម្មជាតិ ស្ករតិច និងល្អចំពោះសុខភាព កុមប៊ូឆា បានវាតទីដល់ហាងលក់គ្រឿងទេស ផ្សារទំនើប និងហាងកាហ្វេថែមទៀត។
ការលក់ភេសជ្ជៈបែបពពុះពណ៌ល្អក់នៅសហរដ្ឋអាមេរិក បានកើនឡើង ៤១២ លានដុល្លារ ក្នុងឆ្នាំ ២០១៨ ស្មើនឹង ៤២ ភាគរយ ពីឆ្នាំមុន។ នេះបើយោងតាមទិន្នន័យ Nielsen។
ភេសជ្ជៈត្រាំដំបែប្រទះឃើញស្ទើរតែគ្រប់ទីកន្លែង ដែលមិនច្បាស់ពីប្រភពកកើត ហើយវាថែមទាំងត្រូវបានបញ្ជាទិញលក់ពីក្រុមហ៊ុនយក្សអាមេរិក Walmart។ នៅទូទាំងសហរដ្ឋអាមេរិក ស្រាប្រភេទនេះមានរហូតដល់ ១០ យីហោខុសៗគ្នា។
ចំពោះអ្នកស្រី Alex Ingalls ដែលជាស្ថាបនិក Pilot Kombucha ក្នុងឆ្នាំ ២០១៥ ប្រជាប្រិយភាពនៃភេសជ្ជៈមានគ្រឿងស្រវឹងតិចតួចនេះ (ផ្ទុកអាល់កុលត្រឹមតែ ០,៥ ដឺក្រេ) ដោយសារតែវាលាយល្បាយច្រើនមុខ។
អ្នកស្រីបន្ដថា អ្នកដែលនិយម កុមប៊ូឆា រយៈពេលជាច្រើនឆ្នាំទំនងជាយល់ឃើញពីអត្ថប្រយោជន៍ចំពោះសុខភាព ដោយវាមានផ្ទុកប្រូបៃអូទិក អតិសុខុមប្រាណរស់ ជំនួយពោះវៀន និងការលូតលាស់នៃបាក់តេរីល្អ។
យ៉ាងណាមិញអ្នកស្រី Ingalls បានមើលឃើញពីប្រជាប្រិយភាពស្រា កុំប៊ូឆា ដោយសារវាមានគុណប្រយោជន៍ជាងពពួកសូដា និងទឹកផ្លែឈើ លើសារធាតុស្ករទាប។
អ្នកស្រីបញ្ជាក់ថា៖ «បច្ចុប្បន្ននេះ មនុស្សគ្រប់រូបពិតជាយកចិត្តទុកដាក់ខ្លាំងលើការទទួលទានជាតិស្ករ»។
ជាមួយលក្ខណៈស្រដៀងនឹងស្រាបៀរខ្ញី អ្នកស្រី Ingalls បានផលិតស្រា កុមប៊ូឆា ៣៦៨ ០០០ លីត្រ ក្នុងមួយឆ្នាំ និងមានលក់ទៅតាមទីតាំង ៤០០ ទូទាំងតំបន់។
ការបិតស្រាកុមប៊ូឆា នៅផ្ទះក៏មានសម្ទុះប្រជាប្រិយនៅទូទាំងសហរដ្ឋអាមេរិក រហូតដល់មានថ្នាក់បង្រៀនបិតស្រា កុមប៊ូឆា នៅមជ្ឈមណ្ឌលBrooklyn Brainery ថែមទៀត។
ជំនួសឲ្យការទិញស្រាកុមប៊ូឆា មួយសប្ដាហ៍ ២ ដង Sarah Gilberg ចង់ចេះបិតស្រានេះដោយខ្លួនឯង។
ដោយលើកឡើងថា ស្រា កុមប៊ូឆា មានតម្លៃចន្លោះពី ៣ ទៅ ៤ ដុល្លារ ក្នុងមួយដប Sarah បានប្រាប់ថា៖ «ខ្ញុំតែងតែទទួលទានអ្វីដែលចម្រើនដល់សុខភាព តែខ្ញុំមិនចង់ចំណាយប្រាក់ច្រើននោះទេ»៕ AFP/HR