.jpg)
តារាសម្តែងស្រីរលកក្រោយមានរាងស្រលូនកញ្ញា វណ្ណៈ បូរមី កំពុងតែសកម្មនឹងគម្រោងថតស្ប៉តពាណិជ្ជកម្មច្រើន ទោះបីស្ងាត់ទីផ្សារកុន។ អ៊ីនស្តាក្រាម
ភ្នំពេញៈ នាមួយរយៈពេលចុងក្រោយនេះ ប្រិយមិត្តគាំទ្រតារាសម្តែងស្រីមានរាងតូចច្រឡឹង ដៃជើងស្រឡូន ដែលទើបតែបានប្រឡូកវិស័យសិល្បៈសម្តែងត្រឹមជាង ២ ឆ្នាំស្រីស្រស់សោភាជាពន្លកថ្មីកញ្ញា វណ្ណៈ បូរមី សង្កេតឃើញថា នាងហាក់មានទីផ្សារថតកុនស្ងាត់គួរឲ្យមានការងឿងឆ្ងល់។
កាលពីចុងឆ្នាំ ២០១៨ ឃើញថាតារាសម្តែងស្រីរាងតូចច្រឡឹងឆក់បានឱកាសថតកុនភាគ ៣ រឿងជាប់គ្នាហើយមានការគាំទ្រច្រើនពីមហាជន ខណៈស្រីស្រស់រូបនេះក៏ធ្លាប់បង្ហាញពីក្តីប្រាថ្នាចង់បានកំណត់ត្រាខាងសម្តែងជាតួបែបវាយតប់ផងដែរនោះ។
តារាសម្តែងស្រីវ័យឈានចូល ២១ ឆ្នាំ ប៉ឹមៗដែលអតីតជាបេក្ខនារីប្រកួតកម្មវិធី Freshie Girls & Boys កាលពីឆ្នាំ ២០១៦ ត្រឹមបេក្ខនារី ៦ រូបចុងក្រោយកញ្ញា វណ្ណៈ បូរមី ក៏បានបង្ហើបឲ្យដឹងពីមូលហេតុដែលខ្លួនរាងរយាលនៅក្នុងទីផ្សារថតកុនថា៖ «ក្រោយថតកុនភាគប៉ុន្មានចុងក្រោយចប់មក គឺនាងខ្ញុំមិនទាន់បានទទួលថតកុនអ្វីថ្មីនោះឡើយ ដោយសារនាងខ្ញុំមិនទាន់ផុតកុងត្រានៃគម្រោងចាស់ គឺនៅសល់ពេលប្រមាណ ៣-៤ ខែទៀតឯណោះ ទើបអាចហ៊ានទទួលគម្រោងថ្មីបាន។ តែទោះជាយ៉ាងណាក្តីក្រៅពីការងារសិល្បៈថតកុននោះក៏មានភាពមមាញឹកនឹងការងារថតស្ប៉តពាណិជ្ជកម្មនានាជាហូរហែផងដែរ»។
តារាស្រីដែលតោងភាពល្បីតាមរយៈការថតកុនភាគដំបូងរឿង «បេសកកម្មមួយ» ដែលដើរតួជានារីក្លាហានផ្នែកស៊ើបអង្កេតនោះ កញ្ញា វណ្ណៈ បូរមី ក៏ទទួលចំណងដៃថ្មីថតកុនភាគទី ៣ រឿង «តួខ្ញុំគេសម្តែង» ដែលជាវណ្ណកម្មរបស់អ្នកស្រី ពាន់ ភួងបុប្ផា សម្រាប់ចាក់បញ្ចាំងនៅប៉ុស្តិ៍ទូរទស្សន៍ភីអិនអិន ក្រោយពីបានសម្តែងកុនភាគទី ២ រឿង «ផ្កាថ្ម» របស់ផលិតកម្ម និងទូរទស្សន៍ហង្សមាសនាពេលកន្លងមកថ្មីៗនេះ។
បើក្រឡេកមើលសម្រស់នាងវិញ តារាស្រីរូបនេះអាចនិយាយបានថាគឺមានភាពស្រស់ស្អាតបែបធម្មជាតិពិតៗគ្មានការកែសម្ផស្សនោះទេជាមួយទម្រង់មុខមូលពងក្រពើ និងច្រមុះខ្ពស់ស្រាប់តាំងពីក្មេងដែលផុសចេញពីអាជីពដំបូងជាតារាម៉ូដែល។ ដោយឡែកចំពោះទេពកោសល្យសម្តែងរបស់តារាស្រីពន្លកថ្មីរូបនេះ បើតាមពិនិត្យមើលទៅគឺនាងសម្បូរការសម្តែងបែបជាវីរនារី ឬតួស្រីជាអ្នកលេងវាយតប់ ឬតួ Spy Girl ដោយសារការសម្តែងមើលទៅល្អសមសួនខ្លាំងតែម្តង។
កន្លងមកកញ្ញា វណ្ណៈ បូរមី ក៏ធ្លាប់ព្រលយឲ្យដឹងផងដែរថា៖ «តាមពិតទៅ ធ្វើជាតួសម្តែងត្រូវតែមានភាពបត់បែនតាមតម្រូវការរបស់ផលិតករ។ តែបើនិយាយពីអ្វីជាចំណូលចិត្តវិញនោះគឺសម្តែងជាតួវាយតប់ Spy Girl ឬ ជាកុន action film ព្រោះថាខ្ញុំផ្ទាល់ក៏ចូលចិត្តទស្សនាការសម្តែងរបស់តួជា Idols ស្ត្រីក្នុងពិភពហូលីវូដដ៏ល្បី ២ រូបផងដែរ។ អ៊ីចឹងប្រសិនបើអាចនោះគឺនាងខ្ញុំចង់សម្តែងបែបនេះឲ្យមានភាពលេចធ្លោតែម្តងនៅក្នុងជំនាន់ខ្ញុំ»៕
