.jpg)
ភ្ញៀវនិយមក្រេបកាហ្វេ និងគេចពីរលកកម្ដៅបានមកហាងកាហ្វេទឹកកក។ AFP
ក្រុងហាណូយ: ហាងកាហ្វេទឹកកក នៅក្នុងក្រុងហាណូយ បានក្លាយទៅជាគោលដៅពេញនិយមថ្មីសម្រាប់ពលរដ្ឋក្រុងហាណូយ ជាពិសេសនៅក្នុងចំណោមយុវជន និងយុវតីរបស់វៀតណាម ដែលចង់គេចចេញពីសីតុណ្ហភាពដ៏ក្ដៅស្អុះស្អាប់នាពេលនេះ។
ខណៈសីតុណ្ហភាពកើនដល់ ៤០ អង្សាសេ បរិយាកាសសីតុណ្ហភាព -១០ អង្សាសេ នៅក្នុងហាងកាហ្វេទឹកកក Ice Coffee Café ជាប្រភេទហាងរំលេចដោយរចនាប័ទ្មទឹកកកដ៏ត្រជាក់ស្រៀវឆ្អឹងខ្នងមុនដំបូងបំផុតក្នុងប្រទេសវៀតណាម។
ហាងកាហ្វេទឹកកកបានបើកសម្ពោធនៅចុងខែមិថុនាកន្លងទៅ ដោយវាបានទាក់ទាញអតិថិជនជាច្រើន ដែលមានបំណងរង់ចាំតម្រង់ជួរពី ១៥ ទៅ ២០ នាទី។ ខណៈរង់ចាំនៅខាងក្រៅ ពួកគេអាចកុម្ម៉ង់ភេសជ្ជៈក្ដៅៗទុកជាមុន។
អតិថិជនត្រូវពាក់អាវរងាមុនពេលចូលក្នុងបន្ទប់ទឹកកកដើម្បីទប់ទល់នឹងភាពត្រជាក់រងានៃសីតុណ្ហភាពក្រោមសូន្យអង្សា។ ក្រោយពីអង្គុយលេងប៉ុន្មាននាទីមក ពួកគេត្រូវបានអញ្ជើញឲ្យចូលក្នុងបន្ទប់មួយទៀត ដែលមានសីតុណ្ហភាព -១០ អង្សាសេ។
កញ្ញា ណា នូ ជាអតិថិជនហាងកាហ្វេទឹកកកម្នាក់ បាននិយាយថា៖ «ខ្ញុំមានអារម្មណ៍ថា ដូចបាននៅក្នុងរដូវរងា តែតាមពិតជារដូវក្ដៅសោះ។ ខ្ញុំមិនចង់ចេញក្រៅវិញទេ»។
ក្នុងបន្ទប់ទឹកកកនេះ សូម្បីតែជញ្ជាំង តុ និងកៅអី ក៏ត្រូវបានផលិតឡើងពីដុំទឹកកកធំៗដែរ។ អតិថិជនអាចនឹងមានឱកាសបានឃើញ និងថតរូបសែលហ្វ៊ីជាមួយចម្លាក់ទឹកកកបន្ថែមពន្លឺភ្លើងពណ៌ដ៏ស្រស់ស្អាតទៀតផង។
បន្ទប់ហាងកាហ្វេបំពាក់បរិក្ខារទឹកកកមានសីតុណ្ហភាព -១០ អង្សា។ AFP
លោក ឃ្វាច ម៉ាញដួង ជាម្ចាស់ហាងកាហ្វេទឹកកក បាននិយាយថា ដើម្បីរក្សាសីតុណ្ហភាពត្រឹម -១០ អង្សាសេ បន្ទប់នេះត្រូវតែមិនអាចឲ្យជ្រាបចូលកម្ដៅដាច់ខាត។
លោកបានប្រាប់ថា៖ «យើងក៏មានប្រព័ន្ធទឹកកក និងបាញ់បញ្ចេញខ្យល់ត្រជាក់ឲ្យអតិថិជន។ សង្ឃឹមថា យើងអាចបន្ដបង្កើតទីកន្លែងអស្ចារ្យជាច្រើនទៀតសម្រាប់អតិថិជនទទួលបានពិសោធន៍ប្លែកៗ និងជួយបន្សាបកម្ដៅក្នុងសីតុណ្ហភាពដ៏ក្ដៅហែងនៃក្រុងហាណូយ»។
កាលពីប៉ុន្មានថ្ងៃចុងក្រោយនេះ ទីក្រុងហាណូយបានកើនរលកកម្ដៅខ្លាំងជាប់ៗគ្នាដោយអំឡុងពេលថ្ងៃ សីតុណ្ហភាពកើនពី ៣៦ ទៅ ៣៨ អង្សាសេ និងតំបន់ខ្លះបានហក់ដល់ ៤០ អង្សាសេថែមទៀត។
សម្រាប់អ្នកប្រាថ្នាចង់ស្គាល់ទីកន្លែងថ្មី និងប្លែកៗដើម្បីគេចពីសីតុណ្ហភាពក្ដៅ ហាងកាហ្វេទឹកកកថ្មីសន្លាងនៅក្នុងទីក្រុងហាណូយរបស់វៀតណាម ពិតជាសមទំនងណាស់៕HR
យុវតីវៀតណាម ថតរូបសែលហ្វ៊ីជាមួយមនុស្សទឹកកកក្នុងហាងកាហ្វេទឹកកកដ៏ពេញនិយមថ្មី។ AFP
