.jpg)
អ្នកម្ដាយម្នាក់រិះគន់អាកាសចរណ៍ហូឡង់ដែលបុគ្គលិកប្រាប់ខ្លួនឲ្យបិទបាំងដើមទ្រូង។ AFP
ក្រុងឡាអេ: អាកាសចរណ៍ហូឡង់ KLM ប្រឈមការរិះគន់កាលពីថ្ងៃពុធលើគោលការណ៍ដែល «ធ្វើឲ្យអាម៉ាស់កេរ្ដិ៍ខ្មាសស្ដ្រី» ក្រោយពីអ្នកម្ដាយបំបៅដោះកូនម្នាក់បាននិយាយថា អ្នកស្រីត្រូវបានប្រាប់ឲ្យបិទបាំងដើម្បីកុំឲ្យអ្នកដំណើរដទៃវាយតម្លៃមិនសមរម្យ។
ស្ដ្រីឈ្មោះ សេលប៊ី អេនហ្គេល បានឲ្យដឹងលើហ្វេសប៊ុកថា បុគ្គលិកលើយន្ដហោះម្នាក់បានប្រាប់អ្នកស្រីឲ្យយកភួយបាំងដើមទ្រូង ខណៈបំបៅដោះកូនអាយុមួយឆ្នាំអំឡុងពេលហោះហើរពីទីក្រុងសានហ្វ្រានស៊ីស្កូ ទៅកាន់អាំស្ទែរដាំ។
KLM អះអាងលើ Twitter ថា៖ «ដើម្បីធានាថាអ្នកដំណើរមកពីគ្រប់មជ្ឈដ្ឋានមានអារម្មណ៍ផាសុកភាពយើងអាចស្នើសុំអ្នកម្ដាយបិទបាំងរាងកាយ ខណៈបំបៅដោះកូនដែលអ្នកដំណើរខ្លះអាចវាយតម្លៃមិនសមរម្យ»។
ស្ដ្រីអ្នកនាំពាក្យ KLM ក្រោយមកប្រាប់ AFP តាមអ៊ីមែលពេលសួរអំពីការតវ៉ាអ្នកម្ដាយរូបនោះថា៖ «មែន ការបំបៅដោះកូនគឺត្រូវបានអនុញ្ញាតនៅលើយន្ដហោះ KLM។ យ៉ាងណាមិញអ្នកដំណើរមិនទាំងអស់ទេអាចស្រណុកចិត្ដជាមួយទិដ្ឋភាពការបំបៅដោះកូននៅក្បែរខាង ហើយជួនកាលអ្នកដំណើរទាំងនោះតវ៉ាដល់បុគ្គលិកថែមទៀត។ ដើម្បីរក្សាសន្ដិភាពក្នុងយន្ដហោះ ករណីនេះយើងព្យាយាមស្វែងរកដំណោះស្រាយអាចទទួលយកបានគ្រប់ភាគី ព្រមទាំងបង្ហាញពីការគោរពដល់ផ្លូវអារម្មណ៍ និងឯកជនភាព។ វាអាចពាក់ព័ន្ធនឹងការស្នើសុំអ្នកម្ដាយឲ្យបិទបាំងដើមទ្រូងជាដើម»។
នៅចក្រភពអង់គ្លេស និងសហរដ្ឋអាមេរិក វាជាទង្វើខុសច្បាប់ចំពោះម្ចាស់ជំនួញណាដែលរើសអើងចំពោះអ្នកម្ដាយបំបៅដោះកូន។ វាមិនទាន់ច្បាស់ថា តើប្រទេសហូឡង់ប្រើច្បាប់យ៉ាងដូចម្ដេចនោះទេ៕ HR
