ក្រុងខេពថោន : វាជាផែនការដ៏គួរឲ្យអស់សំណើចក្នុងស្ថានភាពគ្រោះរាំងស្ងួត ដោយការអូសទាញភ្នំទឹកកក ពីអង់តាក់ទិកមកកាន់ទីក្រុងខេពថោន ដើម្បីផ្គត់ផ្គង់ទឹកសាបដល់ទីក្រុងក្នុងគ្រាជួបទុរភិក្សនេះ។
កាលពីដើមឆ្នាំ ក្រុងខេពថោន បានបិតក្បាលរ៉ូប៊ីណេទឹកអស់រយៈពេលជាច្រើនសប្ដាហ៍ និងបង្ខំពលរដ្ឋឲ្យឈរតម្រង់ជួរដើម្បីត្រងទឹកពីបំពង់បង្ហូរសាធារណៈ។
ការកាត់ផ្ដាច់ការផ្គត់ផ្គង់ទឹកត្រូវបានធ្វើឡើង ដើម្បីកុំឲ្យពលរដ្ឋប្រើប្រាស់ទឹកខ្ជះខ្ជាយ ហើយភ្លៀវនៅសិសិរដូវ (រដូវរងារ) បានផ្ដល់បរិមាណទឹកមួយចំនួនដល់ពលរដ្ឋ។ ប៉ុន្ដែបញ្ហាកង្វល់ទឹកនឹងកើតមានជាថ្មីនៅទីក្រុងឆ្នេរប្រទេសអាហ្វ្រិកខាងត្បូងមួយនេះនៅខែក្រោយ។
អ្នកជំនាញច្នៃវត្ថុចាស់ៗ នីក ស្លូអាន (Nick Sloane) ជាអ្នកនឹកឃើញអូសទាញភ្នំទឹកកកលើមហាសាគរ បាននិយាយថា៖ «គំនិតនេះពិតជាគួរឲ្យចង់សើចមែន។ ប៉ុន្ដែបើអ្នកពិនិត្យពិចៃពីគុណសម្បត្ដិរបស់វា វាពិតជាមិនអន់ទេ»។
លោក ស្លូអាន បានស្នើឲ្យចងរុំភ្នំទឹកកកដើម្បីកុំឲ្យវារលាយ និងប្រើនាវាយក្សមួយគ្រឿង និងទូកសណ្ដោងពីរគ្រឿងដើម្បីអូសទាញភ្នំទឹកកកលើចម្ងាយផ្លូវ ២០០០ គីឡូម៉ែត្រឆ្ពោះទៅកាន់ក្រុងខេពថោន ទៅតាមចរន្ដទឹក។
ភ្នំទឹកកក ដែលត្រូវបានជ្រើសរើសយកចិត្ដទុកដាក់ដោយប្រើយន្ដហោះដ្រូន និងស្គេនពីទំហំរបស់វា អាចមានប្រវែងមួយគីឡូម៉ែត្រ មុខកាត់ ៥០០ ម៉ែត្រ និងមានកម្ពស់ ២៥០ ម៉ែត្រ ដោយមានរាងសំប៉ែត និងរាបស្មើ។
ទឹកដែលរលាយអាចត្រូវបានប្រមូលរៀងរាល់ថ្ងៃដោយប្រើបំពង់ប្រឡាយ និងម៉ាស៊ីនបុកមួយ ដើម្បីបំបែកដុំទឹកកកឲ្យក្លាយជាទឹកក្នុងបរិមាណ ១៥០ លានលីត្រ សម្រាប់ប្រើប្រាស់ប្រចាំថ្ងៃរហូតដល់មួយឆ្នាំ។
លោកប៉ាន់ប្រមាណថា វាអាចចំណាយប្រាក់ ១០០ លានដុល្លារ ដើម្បីអូសទាញភ្នំទឺកកកមួយដែលទំនងជាប្រើពេល ៣ ខែ និងទឹកប្រាក់ប្រមាណពី ៥០ ទៅ ៦០ លានដុល្លារ ទៀត ដើម្បីប្រមែប្រមូលទឹកក្នុងមួយឆ្នាំ ពេលវារលាយ។
លោក ស្លូអាន បានបន្ដថា៖ «នៅរុស្ស៊ី ពួកគេអូសទាញភ្នំទឹកកកឲ្យចេញឆ្ងាយពីអណ្ដូងប្រេង តែផ្ទាំងទឹកកកតូចៗ វាមានទំហំតិចបំផុតកន្លះលានតោន។ ទីនេះ យើងកំពុងជជែកពីផ្ទាំងទឹកកកប្រមាណ ១០០ លានតោន»។
គម្រោងរបស់លោក ស្លូអាន គឺការទាញទឹកភ្នំទឹកកកយក្សប្រមាណ ១៥០ គីឡូម៉ែត្រពីភាគខាងជើងទៅកាន់កោះ St. Helena Bay ជាទីកន្លែងដែលសមុទ្រចរន្តទឹកត្រជាក់ Benguela Current អាចរក្សាទឹកកកនៅកម្រិតសីតុណ្ហភាពសូន្យអង្សាសេ។
ចំពោះលោក ស្លូអាន លោកត្រៀមខ្លួនជាស្រេចចំពោះភ្លើងខៀវពីរដ្ឋាភិបាល។ លោកបានអះអាងថា៖ «បើពួកគេឲ្យយើងទៅឥឡូវនេះ យើងអាចសម្រេចគោលដៅនៅមុនថ្ងៃបុណ្យអុីស្ទើរ ឆ្នាំ២០១៩ ខាងមុខ»៕ AFP/HR