.jpg)
អ៊ុន អាលីហ្សា និងគូស្នេហ៍ជាអាណិកជនខ្មែរ-អាមេរិកនឹងចូលរោងការថ្ងៃទី ២២ មិថុនា ២០១៩នេះ។ រូប ហ្វេសប៊ុក
ភ្នំពេញៈ តារាសម្តែង និងចម្រៀងស្រីកញ្ញា អ៊ុន អាលីហ្សា ទើបប្រកាសស្វាគមន៍គូស្នេហ៍ដែលមកពីអាមេរិកថា៖ «Welcome to Cambodia Honey! ឬស្វាគមន៍សម្លាញ់ចិត្តអូន ដែលមកដល់កម្ពុជា» ប៉ុន្មានថ្ងៃមុនសោះ ឥឡូវក៏ប្រកាសដំណឹងចូលរោងការមួយរំពេចគឺនៅថ្ងៃសៅរ៍ទី ២២ ខែមិថុនា ឆ្នាំ ២០១៩ នាថ្ងៃចុងសប្តាហ៍នេះតែម្តង។
នេះបើតាមរយៈការប្តូររូប Profile ហ្វេសប៊ុកខ្លួនជំនួសដោយរូបថត Pre-wedding ក្នុងឈុតប្រពៃណីខ្មែរ នៅឯតំបន់ប្រាសាទបុរាណទំនងជានៅក្នុងខេត្តសៀមរាប។
ពាក់ព័ន្ធនឹងដំណឹងថា តារាសម្តែងកញ្ញា អ៊ុន អាលីហ្សា បានប្រកាសថានឹងចូលរោងការជាមួយបុរសរូបសង្ហាជាអាណិកជនខ្មែរ-អាមេរិកនៅថ្ងៃសៅរ៍ ទី ២២ មិថុនា ឆ្នាំ ២០១៩ នៃចុងសប្តាហ៍នេះថាមានប៉ុន្មានតុ និងមានអ្នកសិល្បៈប៉ុន្មានចូលរួមនោះ មិនត្រូវបាននាងបញ្ជាក់ឲ្យដឹងឡើយដោយការទំនាក់ទំនងទៅនាងមិនបាន។
តែបើតាមការបញ្ជាក់យ៉ាងខ្លីពីសំណាក់តារាចម្រៀងប្រុសរូបសង្ហាលោក អេឡិច ចាន់ត្រា ដែលជាប្រធានក្រុមរៀបចំសេវាកម្មកម្សាន្តឈ្មោះ Alex Entertainment នោះលោកបានអះអាងពីកាលបរិច្ឆេទ និងទីកន្លែងរៀបចំពិធីទទួលភ្ញៀវនៃមង្គលការរបស់តារាសម្តែងកញ្ញា អ៊ុន អាលីហ្សា ថា៖ «គាត់ពិតជាចូលរោងការនៅថ្ងៃទី ២២ មិថុនា ឆ្នាំ ២០១៩ មែន!ការទទួលភ្ញៀវគឺនឹងត្រូវរៀបចំនៅឯសាលកោះពេជ្រ»។
ចំពោះអនាគតស្វាមីរបស់តារាស្រីរូបនេះត្រូវគេបង្ហើបឲ្យដឹងថា ជាបុរសខ្មែរទៅរស់នៅរដ្ឋកាលីហ្វ័រនីញ៉ានៃប្រទេសអាមេរិកយូរឆ្នាំមកហើយ ខណៈនាង និងលោកមានទំនាក់ទំនងគ្នាទម្រាំឈានដល់សម្រេចចូលរោងមង្គលការនាពេលនេះក៏មានពេលវេលាយូរណាស់ផងដែរ។
គួររំឭកដែរកញ្ញា អ៊ុន អាលីហ្សា ក៏ធ្លាប់មានរឿងរ៉ាវរបួសស្នាមនៃសេចក្តីស្នេហាចាស់ដែរ ជាមួយនឹងបុរសម្ចាស់ហាងកាហ្វេមួយរូបនាពេលកន្លងមក ដោយបានធ្វើឲ្យនាងខកចិត្តខ្លាំងទើបឈានទៅដល់ការបែកគ្នា។
ខណៈពេលនេះកញ្ញា អ៊ុន អាលីហ្សា ត្រូវបានគេចាត់ទុកថា នាងមានសំណាងដែលបានបុរសថ្មីមកធ្វើជាស្វាមី ព្រោះក្រៅពីរូបរាងសង្ហាវ័យក្មេងដូចជាមិនពាក់ព័ន្ធប្រវត្តិធ្លាប់មានប្រពន្ធកូននោះឡើយ ហើយក៏ល្បីថាជាអ្នកមានជីវភាពធូរធារ និងចេញចូលស្រុកខ្មែរញឹកញាប់ទៀតផងដែរ៕
