.jpg)
អ្នកចូលរួមតុបតែងកាយបែបសម័យ medieval នៅអ៊ុយក្រែន។ រូបថត AFP
ក្រុងកៀវ: អ្នកចម្បាំងរាប់រយនាក់ក្នុងឯកសណ្ឋានអាវក្រោះលើកដាវគ្រវី និងពូថៅជាសញ្ញាបើកឆាកប្រយុទ្ធនៅលើវាលស្រែក្បែរបន្ទាយសង់ពីឈើមួយ។
ហាក់ដូចជាការសមសម្ដែងក្នុងឈុតឆាកចម្បាំងនៃភាពយន្ដរឿង «Games of Thrones» ក្រុមអ្នកចម្បាំងទាំងនោះគ្រវីដាវដែក និងឈើដាក់គ្នា ខណៈពេលសប្ដាហ៍នេះ អ៊ុយក្រែន បានរៀបចំការប្រកួតជើងឯកពិភពលោកតាមបែបផែនសង្គ្រាមយុគសម័យកណ្ដាល។
២៩ ក្រុមមកពីបណ្ដាប្រទេសនានាដូចជា អង់គ្លេស អាល្លឺម៉ង់ ចិន និងអូស្ដ្រាលី បានធ្វើចម្បាំងដាក់គ្នាពេញទំហឹងលើសង្វៀនក្រាលខ្សាច់ដោយខ្លះជិះសេះ និងខ្លះទៀតថ្មើរជើង។
អ្នកចម្បាំងគ្រងអាវក្រោះកាន់ដាវ និងខែលប្រកួតគ្នាលើវាលខ្សាច់។ រូបថត AFP
អ៊ុយក្រែន បានទទួលស្គាល់នូវប្រពៃណីចម្បាំងយុគសម័យកណ្ដាល ជាកីឡាផ្លូវការមួយតាំងពីឆ្នាំ ២០១៦ ដែលជាប្រទេសដំបូងគេបំផុត។ ពិធីបុណ្យដែលត្រូវបានរៀបចំឡើងដោយសហគមន៍សង្គ្រាមយុគសម័យកណ្ដាលអន្ដរជាតិនេះបានបង្កើតឈុតឆាកប្រយុទ្ធគ្នារវាងក្រុមអន្ដរជាតិក្នុងរយៈពេល ៤ ថ្ងៃក្នុងភូមិឋានមួយស្ថិតនៅចម្ងាយប្រមាណ ១០០ គីឡូម៉ែត្រពីទីក្រុងកៀវ។ អ្នកចម្បាំងត្រូវស៊ូទ្រាំនឹងអាវក្រោះទម្ងន់ចន្លោះពី ២០ ទៅ ៣០ គីឡូក្រាម។
អ្នកគ្រប់គ្រងឧទ្យាន ណតាយ៉ា កូវ៉ាល់ បាននិយាយថា៖ «ប្រជាប្រិយភាពរបស់កីឡានេះកំពុងតែរីកចម្រើន ហើយចំនួនអ្នកចម្បាំងក៏កំពុងកើនឡើងផងដែរ»។
ឆ្នាំនេះព្រឹត្ដិការណ៍សង្គ្រាមសម័យបុរាណបានទាក់ទាញអ្នកចូលរួមជាង ១ ពាន់នាក់៕ HR
