.jpg)
ក្រុងសូរ៉ុង: ហ្វូងមនុស្សដ៏ខឹងសម្បារបានសម្លាប់ក្រពើជិត ៣០០ ក្បាលនៅក្នុងប្រទេសឥណ្ឌូនេស៊ី បន្ទាប់ពីបុរសម្នាក់ត្រូវបានសម្លាប់ដោយសត្វក្រពើមួយក្នុងចំណោមក្រពើទាំងនោះ។ នេះបើតាមអាជ្ញាធរដែលបានថ្លែងកាលពីថ្ងៃចន្ទ។
ការសម្លាប់សងសឹកនេះបានកើតឡើងកាលពីថ្ងៃសៅរ៍ នៅក្នុងខេត្ត Papua បន្ទាប់ពីការធ្វើពិធីបុណ្យសពបុរសនោះ ដែលត្រូវបានសម្លាប់ដោយក្រពើនៅពេលគាត់បានធ្លាក់ចូលទៅក្នុងកសិដ្ឋានចិញ្ចឹមក្រពើមួយ ខណៈកំពុងរកស្មៅសម្រាប់បសុសត្វរបស់គាត់។ នេះបើតាមមន្រ្តីនគរបាលនិងមន្រ្តីអភិរក្សដែលបានថ្លែង។
ពួកគេបានថ្លែងថា ជនរងគ្រោះដែលត្រូវបានស្គាល់អត្តសញ្ញាណថា ឈ្មោះ ស៊ូហ្គីតូ មាន អាយុ ៤៨ ឆ្នាំ ត្រូវបានខំាចំជើង ហើយបន្ទាប់មកត្រូវបានវាយប្រហាររហូតដល់ស្លាប់ដោយកន្ទុយរបស់ក្រពើមួយទៀត ខណៈក្រពើជាពពួកសត្វត្រូវការពារ។
អាជ្ញាធរបានថ្លែងថា សាច់ញាតិរបស់លោក ស៊ូហ្គីតូ និងប្រជាពលរដ្ឋមូលដ្ឋាន ដែលខឹងសម្បារចំពោះទីតាំងកសិដ្ឋានស្ថិតនៅជិតតំបន់រស់នៅរបស់ប្រជាជន បាននាំគ្នាដើរហែរទៅប៉ុស្តិ៍នរគបាលមូលដ្ឋាន។
ប្រធានទីភ្នាក់ងារអភិរក្សមូលដ្ឋាន លោក បាសសារ ម៉ានូឡាង បានថ្លែងថា ពួកគេត្រូវបានប្រាប់ថា ចម្ការនោះបានយល់ព្រមសងសំណង។
លោកបានបន្ថែមថា៖ «យើងបានធ្វើកិច្ចព្រមព្រៀងមួយជាមួយគ្រួសារជនរងគ្រោះ និងបានចូលរួមរំលែកទុក្ខរបស់យើង»។
ប៉ុន្តែក្រុមប្រជាជន ដែលមានចំនួន«រាប់រយនាក់» មិនពេញចិត្ត ហើយបាននាំគ្នាទៅកសិដ្ឋានក្រពើដោយមានអាវុធនៅនឹងដៃរួមមានកំាបិត ពូថៅ និងប៉ែល សម្រាប់ប្រើសម្លាប់ក្រពើប្រមាណ២៩២ក្បាល ដែលរួមមានទាំងកូនក្រពើប្រវែងបួនអ៊ីញរហូតដល់ក្រពើជំទង់ប្រវែង២ម៉ែត្រ។ នេះបើតាមអាជ្ញាធរដែលបានថ្លែង។
មន្រ្តីនគរបាល និងមន្រ្តីអភិរក្សបានថ្លែងថា ពួកគេមិនអាចបញ្ឈប់ការវាយប្រហាររបស់ប្រជាជនទៅលើសត្វក្រពើនេះបាន។
អាជ្ញាធរបានថ្លែងថា ពួកគេកំពុងស៊ើបអង្កេត និងអាចធ្វើការចោទប្រកាន់ព្រហ្មទណ្ឌ។
លោក ឌីវ៉ា ម៉ាដេ ស៊ីដាន ស៊ូត្រានញ៉ា អធិការនគរបាលក្នុងក្រុងសូរ៉ុង បានថ្លែងថា៖ «ឥឡូវនេះ យើងកំពុងសាកសួរសាក្សីផ្ទាល់ភ្នែក»។
ទីប្រជុំកោះឥណ្ឌូនេស៊ីនេះគឺជាជម្រកនៃសត្វព្រៃជាច្រើនប្រភេទ រួមទាំងប្រភេទក្រពើមួយចំនួនដែលវាយប្រហារ និងសម្លាប់មនុស្សជាទៀងទាត់។
កាលពីខែមីនា អាជ្ញាធរដែលនៅលើកោះ Borneo បានបាញ់សម្លាប់ក្រពើមួយដែលមានប្រវែង៦ម៉ែត្របន្ទាប់ពីវាស៊ីកម្មករចម្ការដូងប្រេងម្នាក់។
កាលពីពីរឆ្នាំមុន ទេសចររុស្ស៊ីម្នាក់ត្រូវបានសម្លាប់ដោយក្រពើមួយក្បាលនៅក្នុងកោះ Raja Ampat ដែលជាកន្លែងមុជទឹកមានប្រជាប្រិយនៅភាគខាងកើតនៃទីប្រជុំកោះឥណ្ឌូនេស៊ីនេះ៕ AFP/PS
