ក្រុងបាងកកៈ ការព្យាករពីកំណើនទីផ្សារអចលនទ្រព្យលំនៅឋានក្នុងប្រទេសថៃនៅឆ្នាំនេះត្រូវបានទម្លាក់ពី ៥-៧ ភាគរយមកនៅត្រឹម ៣-៥ ភាគរយ បន្ទាប់ពីមានការទម្លាក់ការព្យាករពីកំណើនសេដ្ឋកិច្ចមកនៅត្រឹមពី ១,៥-២,៥ ភាគរយក្នុងគ្រាដែលមានការរីករាលដាលវីរុសកូរ៉ូណាប្រភេទថ្មី។ នេះបើយោងតាមក្រុមហ៊ុន Real Estate Information Center (REIC)។
លោក Vichai Viratkapan អគ្គនាយកស្តីទីនៃក្រុមហ៊ុន REIC ត្រូវបានកាសែតបាងកកប៉ុស្តិ៍ដកស្រង់សម្ដី ខណៈលោកថ្លែងថា ការផ្ទុះជំងឺនេះគឺជាការគំរាមកំហែងថ្មីមួយដែលនឹងមានផលប៉ះពាល់ខ្លាំងលើសេដ្ឋកិច្ចរបស់ពិភពលោក និងសេដ្ឋកិច្ចរបស់ថៃ។
លោកមានប្រសាសន៍ថា៖ «បើទោះជាមានការលើកទឹកចិត្តក្នុងទីផ្សារអចលនទ្រព្យ និងអត្រាការប្រាក់កាន់តែទាបក្តី ក៏អារម្មណ៍ទីផ្សារនឹងមិនមានភាពអំណោយផលទេ ដោយសារផលប៉ះពាល់នៃការផ្ទុះជំងឺនេះទៅលើប្រព័ន្ធសេដ្ឋកិច្ច»។
កាសែតបាងកកប៉ុស្តិ៍បានរាយការណ៍កាលពីម្សិលមិញថា កាលពីសប្តាហ៍មុនក្រុមប្រឹក្សាអភិវឌ្ឍន៍សេដ្ឋកិច្ចសង្គមជាតិ (NESDC) របស់ប្រទេសថៃបានទម្លាក់ការព្យាករពីកំណើនសេដ្ឋកិច្ចពី ២,៧-៣,៧ ភាគរយដែលបានព្យាករកាលពីខែវិច្ឆិកាឆ្នាំមុនមកត្រឹម ១,៥-២,៥ ភាគរយ។
លោក Vichai បានថ្លែងថា កត្តាសំខាន់មួយសម្រាប់ការទម្លាក់ការព្យាករនេះគឺជាការព្យាករពីការធ្លាក់ចុះការផ្ទេកម្មសិទ្ធិលំនៅឋានពីសំណាក់អតិថិជនចិន។
ក្នុងសេណារីយោករណីមូលដ្ឋានមួយចំនួនយូនីតដែលត្រូវបានផ្ទេរកម្មសិទ្ធិនៅទូទាំងប្រទេសនឹងធ្លាក់ ៤,៥ ភាគរយមកត្រឹម ៣៥៦ ៦៦១ យូនីតធ្លាក់ចុះពីការព្យាករកន្លងមកដែលថា ធ្លាក់តែ ០,២ ភាគរយ។
សេណារីយោអាក្រក់បំផុតគឺការធ្លាក់ចុះខ្លាំង ១៤ ភាគរយមកនៅត្រឹម ៣២០ ៩៩៥ យូនីត និងសេណារីយោល្អបំផុតគឺកើនឡើង ៣,៩ ភាគរយដល់ ៣៨៧ ៩២៧ យូនីត។
តម្លៃផ្ទេរកម្មសិទ្ធិនៅក្នុងសេណារីយោករណីមូលដ្ឋានត្រូវបានរំពឹងថានឹងធ្លាក់ចុះ ៦,១ ភាគរយមកនៅត្រឹម ៨៨២ ពាន់បាត (២៥,៧៦ ពាន់លានដុល្លារ)។ ក្នុងសេណារីយោអាក្រក់បំផុត តម្លៃផ្ទេរកម្មសិទ្ធិអាចធ្លាក់ចុះ ១៥,៥ ភាគរយមកនៅត្រឹម ៧៤០ ពាន់លានបាត ហើយសេណារីយោល្អបំផុតអាចកើនឡើង ២,៨ ភាគរយដល់ ៩០០ ពាន់លានបាត។
ក្នុងឆ្នាំ ២០១៩ ចំនួនយូនីតលំនៅឋានដែលត្រូវបានផ្ទេរកម្មសិទ្ធិនៅទូទាំងប្រទេសបានកើនឡើង ២,៧ ភាគរយដល់ ៣៧៣ ៣៦៥ យូនីតដែលមានតម្លៃរួម ៨៧៥ ពាន់លានបាត កើនឡើង ៤,៣ ភាគរយធៀបនឹងឆ្នាំ ២០១៨។
លោក Vichai បានថ្លែងថា បរិមាណ និងតម្លៃបានកើនឡើងខ្ពស់ជាងការព្យាករដែលថាធ្លាក់ចុះ -៨,៤ ភាគរយ និង -៨,២ ភាគរយរៀងគ្នា។
លោកមានប្រសាសន៍ថា៖ «ក្រុមហ៊ុនអភិវឌ្ឍន៍បានរៀនសូត្រពីផលប៉ះពាល់នៃការកំណត់កម្ចីធៀបនឹងតម្លៃ (LTV Limit) និងអារម្មណ៍ទីផ្សារមិនអំណោយផលនៅត្រីមាសទី ២ ឆ្នាំមុន។ ការណ៍នេះនឹងជួយគ្រប់គ្រងការផ្គត់ផ្គង់នៅឆ្នាំនេះ»។
កាសែតបាងកកប៉ុស្តិ៍បានរាយការណ៍ដោយដកស្រង់សម្ដីរបស់លោក Somprawin Manprasert ដែលជាប្រធានសេដ្ឋវិទូ ប្រធានផ្នែកស្រាវជ្រាវ និងជាអនុប្រធានធនាគារ Bank of Ayudhya ខណៈលោកថ្លែងថា មានកត្តាចំនួន ៣ ដែលដាក់បន្ទុកលើកំណើនសេដ្ឋកិច្ច។ កត្តាធំជាងគេគឺការផ្ទុះវីរុសកូរ៉ូណាប្រភេទថ្មីដែលបានជះឥទ្ធិពលដល់ផលិតផលក្នុងស្រុកសរុប (ផ.ស.ស) ០,៤ ពិន្ទុភាគរយតាមរយៈការខាតបង់ក្នុងវិស័យទេសចរណ៍។
លោកថ្លែងកាលពីថ្ងៃអង្គារនៅឯសិក្ខាសាលាស្តីពីអចលនទ្រព្យមួយថា៖ «ការរីករាលដាលវីរុសនេះគឺជាក្តីបារម្ភដ៏ធំមួយ ពីព្រោះសេដ្ឋកិច្ចចិនមានទំហំធំ»។
ប្រទេសចិនដើរនាទីយ៉ាងធំក្នុងទីផ្សារទេសចរណ៍ពិភពលោក ដោយសារទេសចរណ៍ចិនមានចំណែក ២០ ភាគរយនៃវិស័យនេះដែលកើនឡើង ៣ ភាគរយពីឆ្នាំ ២០០២។
លោក Somprawin បានឲ្យដឹងថា ការផ្ទុះវីរុសនេះក៏ជះឥទ្ធិពលដល់ចង្វាក់ផ្គត់ផ្គង់ពិភពលោកផងដែរ ដោយសារសម្ភារជាច្រើនមិនអាចនាំចេញពីប្រទេសចិនបាន។ ការណ៍នេះក៏នឹងឈានទៅរកការអត់ការងារធ្វើផងដែរ។
លោកបន្ថែមថា៖ «ផលប៉ះពាល់រីវុសនឹងវាយប្រហារធ្ងន់ធ្ងរលើវិស័យទេសចរណ៍ថៃនៅត្រីមាសទី ១ មុនពេលវិស័យនេះមានភាពប្រសើរឡើងសន្សឹមៗឡើងវិញនៅត្រីមាសទី ២ និងកើនឡើងវិញដោយសារការមកដល់របស់ភ្ញៀវទេសចរចាប់ពីត្រីមាសទី ៣ ទៅ»។
លោក Somprawin បានបន្តថា អារម្មណ៍វិជ្ជមានក្នុងទីផ្សារអចលនទ្រព្យនឹងវិលត្រឡប់មកវិញនៅឆមាសទី ២»។
លោកថ្លែងថា៖ «ការផ្ទុះវីរុសកូរ៉ូណាមិនគួរឲ្យខ្លាចទេ ពីព្រោះអត្រាស្លាប់មានកម្រិតទាបខ្លាំងត្រឹម ២ ភាគរយ។ ជំងឺនេះនឹងកើនឡើងខ្លាំងនៅខែមីនា និងមេសាដោយមានការឆ្លង ២ ម៉ឺននាក់ក្នុង ១ សប្តាហ៍»។ លោកបន្ថែមថា៖ «ចំនួនករណីនេះនឹងមានស្ថិរភាពនៅខែឧសភា និងកាន់តែទាបខ្លាំងបន្ទាប់ពីពេលនោះ»៕ KC