បាងកកៈ ការលក់សម្រាប់ការផ្គត់ផ្គង់ខុនដូថ្មីនៅទីក្រុងបាងកកនៅត្រីមាសទី ៤ ត្រូវបានព្យាករថានឹងធ្លាក់ចុះមកនៅត្រឹមកម្រិតទាបបំផុត បើក្រុមហ៊ុនអភិវឌ្ឍន៍ បន្តការដាក់បញ្ចូលខុនដូថ្មីៗទៅក្នុងទីផ្សារតាមការគ្រោងទុក។
លោក Phattarachai Taweewong អនុប្រធាននាយកដ្ឋានស្រាវជ្រាវរបស់ក្រុមហ៊ុនពិគ្រោះយោបល់អចលនទ្រព្យ Colliers International Thailand បានឲ្យដឹងថា ការផ្គត់ផ្គង់ខុនដូថ្មីដែលគ្រោងទុកពីក្រុមហ៊ុនអភិវឌ្ឍន៍នៅត្រីមាសទី ៤ គឺច្រើនពេក។
លោកថ្លែងថា៖ «ទោះបីជាក្រុមហ៊ុនអភិវឌ្ឍន៍ជាច្រើនបានកាត់បន្ថយការផ្គត់ផ្គង់ខុនដូថ្មីរបស់ពួកគេនៅត្រីមាសទី ៤ ក៏ដោយ ក៏ការពន្យារពេលការផ្គត់ផ្គង់នេះរហូតដល់ឆ្នាំក្រោយនៅតែច្រើនពេកដែរ»។ លោកបន្តថា៖ «ពួកគេគួរតែកែតម្រូវបន្ថយចំនួនថែមទៀត»។
ក្រុមហ៊ុន Colliers ប៉ាន់ប្រមាណចំនួនការផ្គត់ផ្គង់ខុនដូថ្មីដែលត្រូវបានដាក់លក់នៅ ទីក្រុងបាងកកនៅត្រីមាសទី ៤ មានចំនួនពី ១៥ ០០០ ដល់ ១៧ ០០០ យូនីត។
ចំនួននេះគឺជាការធ្វើបច្ចុប្បន្នភាពថ្មីបំផុត បន្ទាប់ពីការដកក្រុមហ៊ុនអភិវឌ្ឍន៍មួយចំនួនដោយត្រូវពន្យារពេលទៅឆ្នាំក្រោយ។
ទោះបីជាត្រូវកាត់បន្ថយចំនួននេះក៏ដោយ ក៏ការផ្គត់ផ្គង់ខុនដូថ្មីនៅត្រីមាសនេះនៅតែខ្ពស់ដដែល។ គម្រោងជាច្រើនត្រូវបានពន្យារពេលចាប់ពីឆមាស ទី១ បន្ទាប់ពីការទប់ស្កាត់ការខ្ចីប្រាក់ថ្មីៗដែលបានចាប់ផ្ដើមអនុវត្តកាលពីថ្ងៃទី ១ ខែមេសា។
លោក Phattarachai បានថ្លែងថា៖ «អត្រាការលក់នៅត្រីមាសទី ២ និងទី ៣ មានកម្រិតទាបបំផុតក្នុងចំនួនតិចជាង ៥០ ភាគរយ»។ លោកបន្តថា៖ «ទំនុកចិត្តខ្សោយនឹងបន្តទៅដល់ឆ្នាំក្រោយ ប្រសិនបើមិនមានការលើកទឹកចិត្តដើម្បីជំរុញតម្រូវការ»។
អត្រានៃការផ្គត់ផ្គង់ខុនដូថ្មីដែលបានដាក់លក់នៅត្រីមាសទី ២ គឺទាបបំផុតនៅរយៈពេល ២០ ត្រីមាសកន្លងមក ឬរយៈពេល ៥ ឆ្នាំ។ អត្រាទាបបំផុតចុងក្រោយនេះគឺនៅត្រីមាសទី ១ ឆ្នាំ ២០១៤ ក្នុងចំនួន ៣៥ ភាគរយដោយសារវិបត្តិនយោបាយ ប៉ុន្តែវាបានកើនឡើងដល់ ៦៤ ភាគរយនៅត្រីមាសទី ២។
លោក Phattarachai បានឲ្យដឹងថា តម្រូវការខុនដូនៅឆ្នាំនេះបានធ្លាក់ចុះដោយសារតែការធ្លាក់ចុះកំណើនសេដ្ឋកិច្ចតម្លៃប្រាក់បាតកើនឡើង និងការកម្រិតកម្ចីធៀបនឹងតម្លៃ (LTV)។ លោកបន្តថាតួលេខពេញមួយឆ្នាំនេះនឹងធ្លាក់ចុះ ៣០ ភាគរយពីធម្មតា ៣៥ ០០០ ទៅ ៤០ ០០០ យូនីតមកនៅ ២៥- ០០០ ទៅ ៣០ ០០០ យូនីត។
ក្នុងចំណោមចំនួនធម្មតានៃតម្រូវការខុនដូ អ្នកទិញពិតមានចំនួន ៦០ ភាគរយ ក្រុមវិនិយោគិនតំណាង ៣០ ភាគរយ និងអ្នកទិញបរទេសបំពេញចំនួនដែលនៅសល់។ ប៉ុន្តែក្រុមវិនិយោគិន និងអ្នកទិញបរទេសបានបាត់បន្តិចម្ដងៗពីទីផ្សារនេះដោយសារការទប់ស្កាត់ LTV ការធ្លាក់ចុះពិភពលោក និងការកើនថ្លៃប្រាក់បាត។
លោក Phattarachai ថ្លែងថា៖ «ក្រុមហ៊ុនអភិវឌ្ឍន៍មួយចំនួនមិនអាចពន្យារពេលការដាក់លក់បានទេ ដោយសារតែពួកគេបារម្ភថា នេះនឹងប៉ះពាល់ដល់ការកំណត់ទិសដៅមុនការលក់ និងផែនការពាណិជ្ជកម្មសម្រាប់ឆ្នាំក្រោយ»។ លោកបន្តថា៖ «ប្រសិនបើក្រុមហ៊ុនអភិវឌ្ឍន៍មិនកែតម្រូវបន្ថយចំនួនបន្ថែមទៀតទេ ស្ដុកនឹងកើនឡើងជាមិនខាន»។
ក្រុមហ៊ុន Colliers ឲ្យដឹងថា ការផ្គត់ផ្គង់ខុនដូថ្មីដែលបានដាក់លក់នៅត្រីមាសទី ៣ នេះមានចំនួនសរុប ១១ ០៥៩ យូនីតពីគម្រោង ២៤ ដែលមានតម្លៃសរុប ៤៦,៦៦ ពាន់លានបាត។ ក្នុងចំណោមចំនួននោះ ៦៦ ភាគរយបានមកពីក្រុមហ៊ុនអភិវឌ្ឍន៍ចុះបញ្ជី។
អត្រាការលក់នៅត្រីមាសទី ៣ បានកើនឡើងដល់ ៤៥ ភាគរយពី ៤០ ភាគរយកាលពីត្រីមាសទី ២ ប៉ុន្តែវាបានធ្លាក់ចុះពី ៦៤ ភាគរយក្នុងរយៈពេលដូចគ្នាកាលពីឆ្នាំមុន។ ប្រហែល ៦៨ ភាគរយក្នុងចំណោមយូនីតដែលបានលក់បានមកពីក្រុមហ៊ុនចុះបញ្ជី។
ការផ្គង់ផ្គង់ថ្មីមានតម្លៃចន្លោះពី ១០០ ០០០ ទៅ ២០០ ០០០ បាតក្នុងមួយម៉ែត្រការ៉េកើនឡើងខ្ពស់ដល់ ៤៧ ភាគរយ។
លោក Phattarachai បានឲ្យដឹងថា ការផ្គត់ផ្គង់ខុនដូថ្មីភាគច្រើនបំផុតដែលបានដាក់លក់នៅត្រីមាសទី ៣ មានចំនួនច្រើនជាង ១០០០ យូនីតក្នុងមួយគម្រោង។ ភាគច្រើននៅក្នុងទីតាំងនៅជិតផ្លូវឆ្លងកាត់ច្រើនដែលកំពុងសាងសង់ដូចជាផ្លូវរថភ្លើងក្រោមដី Orange Line៕ បាងកក ប៉ុស្តិ៍/LA