.jpg)
កម្មករកំពុងធ្វើការនៅការដ្ឋានសំណង់មួយ ក្នុងរដ្ឋផ្លរីដា។ រូបថត AFP
ក្រុងវ៉ាស៊ីនតោនៈ ទិន្នន័យរដ្ឋាភិបាលអាមេរិកបានបង្ហាញកាលពីថ្ងៃសុក្រថា ការសាងសង់លំនៅឋានថ្មីនៅអាមេរិក បានកើនឡើងកាលពីខែមករា បន្ទាប់ពីមានការមើលឃើញធ្លាក់ចុះក្នុងរយៈពេលប៉ុន្មានខែថ្មីៗនេះ។
ក្រសួងពាណិជ្ជកម្មអាមេរិកបានរាយការណ៍ថា ការកើនឡើងសកម្មភាពនៅរដ្ឋភាគខាងត្បូង និងភាគឦសាន ដែលត្រជាក់កម្រិតធម្មតា និងរដ្ឋតំបន់ Midwest បានជំរុញឲ្យការសាងសង់លំនៅឋានគ្រួសារទោលកើនឡើងក្នុងល្បឿនលឿនបំផុតក្នុងពេល ១ ទសវត្សរ៍សម្រាប់តំបន់ទាំងនេះ។
ទន្ទឹមនឹងនេះ ការសុំច្បាប់សាងសង់ថ្មីៗ ដែលជាសញ្ញាមួយនៃការផ្គត់ផ្គង់ក្នុងចំណោមសញ្ញាជាច្រើន បានបង្ហាញការផ្លាស់ប្តូរឆ្ពោះទៅរកការសាងសង់អាផាតមិនវិញ និងបង្ហាញពីការចុះខ្សោយកាន់តែខ្លាំងនៅក្នុងផ្នែកលំនៅឋានគ្រួសារទោលដ៏សំខាន់។
ការចាប់ផ្ដើមការសាងសង់លំនៅឋានសរុបបានកើនឡើង ១៨,៦ ភាគរយដល់ ១,២៣ យូនីត ក្រោយពីកែតម្រូវតាមរដូវកាលរួច ដែលលើសពីការព្យាកររបស់ក្រុមសេដ្ឋវិទូ។
ការសាងសង់លំនៅឋានគ្រួសារទោលបានកើនឡើង ២៥,១ ភាគរយដល់អត្រាប្រចាំឆ្នាំ ៩២៦ ០០០ យូនីត។
ក្រុមសេដ្ឋវិទូបានឲ្យដឹងថា ការធ្លាក់ចុះភ្លាមៗកាលពីខែធ្នូក្នុងការសាងសង់ ត្រូវបានជំរុញដោយភាពចលាចលនៅតំបន់ហិរញ្ញវត្ថុ Wall Street ដែលបានកាត់បន្ថយទ្រព្យសម្បត្តិសុទ្ធរបស់ពលរដ្ឋអាមេរិក។ តម្លៃភាគហ៊ុន បានស្ទុះងើបឡើងវិញក្នុងចំណោមភាគហ៊ុនដែលខាតបង់ទាំងនោះ។
ការសុំច្បាប់សាងសង់បានកើនឡើង ១,៤ ភាគរយដល់ ១,៣៥ យូនីតដែលជាកម្រិតខ្ពស់បំផុតរយៈពេល ៩ ខែ និងលើសពីការរំពឹងទុករបស់ក្រុមសេដ្ឋវិទូផងដែរ។
ការសុំច្បាប់សាងសង់សម្រាប់លំនៅឋានច្រើនយូនីត បានកើនឡើងដល់អត្រាប្រចាំឆ្នាំ ៤៨២ ០០០ យូនីតដែលជាកម្រិតខ្ពស់បំផុតរបស់ខ្លួន ក្នុងរយៈពេល ១០ ខែ ប៉ុន្តែការសុំច្បាប់អនុញ្ញាតសាងសង់លំនៅឋានគ្រួសារទោលបានធ្លាក់ចុះ ២,១ ភាគរយដល់កម្រិតទាបបំផុតក្នុងរយៈពេល ១៧ ខែក្នុងអត្រាប្រចាំឆ្នាំចំនួន ៨១២ ០០០ យូនីត។
ភាពធ្លាក់ចុះក្នុងវិស័យលំនៅឋានកាលពីឆ្នាំមុន បានបណ្ដាលឲ្យមានការបារម្ភអំពីកំណើនសេដ្ឋកិច្ចអាមេរិកក្នុងរយៈពេលខ្លី ប៉ុន្តែក្រុមអ្នកវិភាគបានឲ្យដឹងថា តម្រូវការត្រូវបានរំពឹងថា នឹងស្ទុះងើបឡើងវិញនៅឆ្នាំនេះ ដោយសារតែការធ្លាក់ចុះអត្រាការប្រាក់កម្ចីទិញផ្ទះ និងការសាងសង់ស្ទុះងើបឡើងវិញ៕ AFP/LA
