ក្រុងវ៉ាស៊ីនតោនៈ ការសាងសង់នៅតំបន់ប្រជុំរដ្ឋភាគកណ្តាលខាងជើង (Midwest) នៃសហរដ្ឋអាមេរិកកាលពីខែមុនបាននាំមកនូវកំណើនការសាងសង់លំនៅឋានអាមេរិកដល់កម្រិតខ្ពស់បំផុតរបស់ខ្លួនគិតចាប់តាំងពីពេលមុនវិបត្តិហិរញ្ញវត្ថុ។ នេះបើយោងតាមទិន្នន័យរដ្ឋាភិបាលដែលបានចេញផ្សាយកាលពីថ្ងៃអង្គារ។
កំណើនកាលពីខែឧសភាត្រូវបានជំរុញស្ទើរតែទាំងស្រុងដោយការសាងសង់យ៉ាងលឿននូវផ្ទះល្វែង និងលំនៅឋានលក្ខណៈគ្រួសារដាច់តែឯងក្នុងតំបន់ Midwest ដែលមានអាកាសធាតុក្ដៅជាងធម្មតា បន្ទាប់ពីការធ្លាក់ព្រឹលកាលពីខែមេសា និងបានមើលឃើញកំណើនធំបំផុតរបស់ខ្លួនក្នុងរយៈពេលជាង ៤ ឆ្នាំ។
ការសាងសង់កន្លែងផ្សេងទៀតមានភាពស្ងប់ស្ងាត់ ឬធ្លាក់ចុះ។ នេះបើយោងតាមក្រសួងពាណិជ្ជកម្ម។
ក្រុមអ្នកវិភាគក្នុងឧស្សាហកម្មនេះបានឲ្យដឹងថាកំណើនចំណាយលើសម្ភារ និងការខ្វះខាតកម្លាំងពលកម្មបានដាក់សម្ពាធលើការសាងសង់លំនៅឋាន ដែលជំរុញកំណើនតម្លៃក្នុងគ្រាដែលមានតម្រូវការខ្លាំង។
តួលេខបានបង្ហាញថាការចាប់ផ្ដើមការសាងសង់លំនៅឋានសរុបបានកើនឡើង ៥ ភាគរយដែលធ្វើឲ្យអត្រាប្រចាំឆ្នាំមាន ១,៣៥ លានខ្នងដែលជាអត្រាល្បឿនលឿនបំផុតចាប់តាំងពីខែកក្កដាឆ្នាំ ២០០៧ និងលើសពីការព្យាកររបស់ក្រុមសេដ្ឋវិទូចំនួនដែលថាមាន ១,៣២ លានលំនៅឋាន។
តួលេខនៃការសាងសង់នេះមានកម្រិតខ្ពស់ជាងការសាងសង់កាលពីខែឧសភាឆ្នាំមុនចំនួន ២០,៣ ភាគរយ។
ទន្ទឹមនឹងនេះការអនុញ្ញាតសម្រាប់ការសាងសង់ថ្មីដែលជាសញ្ញាមួយនៃការផ្គត់ផ្គង់នៅក្នុងផែនការបានធ្លាក់ចុះ ៤,៣ ភាគរយនៅខែឧសភាមកនៅត្រឹម ១,៣ លានលំនៅឋានដែលទាបជាងការរំពឹងទុកដែលប្រហែលមកពីដោយសារប្រតិកម្មតបនឹងការធ្លាក់ចុះការលក់លំនៅឋាន។
ការសាងសង់ក្នុងផ្នែកលំនៅឋានលក្ខណៈគ្រួសារដាច់តែឯងនៃវិស័យអចលនទ្រព្យដែលត្រូវបានឃ្លាំមើលយ៉ាងដិតដល់បានកើនឡើង ៣,៩ ភាគរយ ទោះបីជាមានការធ្លាក់ចុះនៅតំបន់ខាងលិច និងតំបន់ខាងត្បូង និងការកើនឡើងជាមធ្យមនៅតំបន់ឦសានក៏ដោយ។
ប៉ុន្តែនៅតំបន់ Midwest ការសាងសង់លំនៅឋានជារួមបានកើនឡើង ៦២,២ ភាគរយដល់ ២៦៦ ០០០ ខ្នងនៃអត្រាប្រចាំឆ្នាំដែលជាល្បឿនលឿនបំផុតចាប់ពីខែកញ្ញាឆ្នាំ ២០០៦ និងជាកំណើនប្រចាំខែខ្ពស់បំផុតចាប់ពីខែកុម្ភៈ ឆ្នាំ២០១៤។
ការសង់លំនៅឋានលក្ខណៈគ្រួសារដាច់តែឯងនៅតំបន់ Midwest កើន ៤៤,៤ ភាគរយដែលជាល្បឿនយឺតជាងមុនតែនៅតែខ្លាំង៕ LA