.jpg)
រូបកុមារតូចៗលើផ្ទាំងផ្សាយពាណិជ្ជកម្មគម្រោងសាងសង់លំនៅឋាននៅខេត្តជាំងស៊ូ ជាប់ឈ្មោះសាលារៀនល្បី។ People's daily
ក្រុងប៉េកាំងៈ ឪពុកម្តាយវ័យក្មេងជាជនជាតិចិនបានទិញ ឬជួលអចលនទ្រព្យជិតសាលារៀននៅបរទេស ដើម្បីផ្តល់ឲ្យកូនៗរបស់ខ្លួននូវអត្ថប្រយោជន៍សម្រាប់ជីវិតក្នុងពិភពលោកដែលត្រូវបានធ្វើសមាហរណកម្មមួយនេះ។
និន្នាការរបស់ឪពុកម្តាយជាជនជាតិចិនដែលកំពុងប្រឹងប្រែងដើម្បីធ្វើឲ្យកូនរបស់ពួកគេមានអនាគតល្អ បានកើនឡើងខ្លាំងនៅឆ្នាំនេះ។ ការវិនិយោគទាំងលើការអប់រំនៅបរទេសដែលមានគុណភាពខ្ពស់ និងទាំងលើការទិញផ្ទះនៅជិតសាលារៀននៅបរទេស បានកើនឡើង ខណៈដែលកំណើនសេដ្ឋកិច្ចចិនជំរុញចំណង់របស់គ្រួសារចិនដែលមានប្រាក់ចំណូលមធ្យមថ្មីថ្មោង។ នេះបើយោងតាមអ្នកនៅក្នុងឧស្សាហកម្មនេះ។
លោកស្រី Sally Wang ដែលកំពុងធ្វើការជាភ្នាក់ងារអចលនទ្រព្យក្នុងទីក្រុងឡុងដ៍អស់រយៈពេលជិត ១ ទសវត្សរ៍ និងជាស្ថាបនិកក្រុមហ៊ុនអចលនទ្រព្យ SJW (UK) Property Investment Ltd បានថ្លែងថា តម្រូវការអចលនទ្រព្យល្អៗនៅចក្រភពអង់គ្លេសជិតស្ថាប័នអប់រំពីសំណាក់ឪពុកម្តាយជាជនជាតិចិនវ័យក្មេង មិនបង្ហាញពីសញ្ញាធ្លាក់ចុះឡើយ។
ជាការពិត ដោយសារតម្រូវការពីឪពុកម្តាយជាជនជាតិចិន ក្រុមហ៊ុន SJW មើលឃើញកំណើន តម្លៃលក់ផ្ទះ ៥០ ភាគរយ ក្នុងរយៈពេល ២ ឆ្នាំកន្លងមកនេះ។ ភាគច្រើននៃការទិញលក់នេះមានទីតាំងនៅជិតសាលា មហាវិទ្យាល័យ និងសាកលវិទ្យាល័យ។
លោកស្រី Wang បានលើកឡើងពីឧទាហរណ៍ថ្មីមួយដែលពាក់ព័ន្ធនឹងអតិថិជនរបស់លោកស្រី ដែលជាឪពុកម្តាយជាជនជាតិចិនមកពីទីក្រុងប៉េកាំង ដែលមានកូនប្រុសម្នាក់អាយុ ៤ ឆ្នាំ។ លោកស្រី Wang បានឲ្យដឹងថា ប្តីប្រពន្ធមួយគូនេះបានជ្រើសរើសផ្ទះល្វែងដែលមាន ៣ បន្ទប់ ដែលមានចម្ងាយដើរប្រហែលកន្លះម៉ោងពីសាលារបស់កូនតូចរបស់ពួកគេ។
កូនសិស្សចិនកំពុងរៀនសូត្រពីរូបគំរូកប៉ាល់ចម្បាំងក្នុងសកម្មភាពក្នុងថ្នាក់។ រូប AFP
ពួកគេមានបំណងចំណាយ ៤ លានផោន (៥,០៩ លានដុល្លារ) ខណៈផ្ទះនេះមានលក្ខណសម្បត្តិគ្រប់គ្រាន់ដូចជាសន្តិសុខ បញ្ជរទទួលភ្ញៀវ កន្លែងហាត់ប្រាណ អាងហែលទឹក និងចំណតរថយន្តជាដើម។
លោកស្រី Wang ឲ្យដឹងទៀតថា បើពួកគេអាចបញ្ចប់ប្រតិបត្តិការទិញលក់នេះបាន អាចចាត់ទុកថា ពួកគេសំណាងដោយសាររយៈពេលថ្មីៗនេះ វាមានការលំបាកក្នុងការស្វែងរកផ្ទះដែលមានទីតាំងស័ក្ដិសមបែបនេះសម្រាប់លក់។
ការវិនិយោគលើការអប់រំរបស់កុមារត្រូវបានមើលឃើញថាមានសារៈសំខាន់ ពីព្រោះកុមារតំណាងឲ្យអនាគតរបស់គ្រួសារ។ ផ្ទះល្អដែលមានទីតាំងល្អក្នុងតំបន់ជិតសាលារៀនក៏ជាកត្តាចំបាច់ផងដែរ។
អ្នកនៅក្នុងឧស្សាហកម្មនេះឲ្យដឹងថា ក្នុងពិភពលោកសព្វថ្ងៃដែលមានការប្រកួតប្រជែងខ្លាំង សកលភាវូបនីយកម្ម និងឌីជីថល ឪពុកម្តាយគិតថា ការអប់រំដែលមានគុណភាពខ្ពស់មានសារៈសំខាន់ចាប់តាំងពីអាយុវ័យក្មេងមក ដោយចង់ឲ្យសិក្សានៅស្ថាប័នដែលមានកេរ្តិ៍ឈ្មោះល្បីក្នុងប្រទេសដែលនិយាយភាសាអង់គ្លេស។
កត្តានេះបានជំរុញឲ្យតម្លៃផ្ទះនៅសហរដ្ឋអាមេរិក អង់គ្លេស កាណាដា និងប្រទេសនិយាយភាសាអង់គ្លេសផ្សេងទៀតកើនឡើង។
លោក Slevin Wang នាយកនិងជាសហប្រធានគម្រោងលំនៅឋានអន្តរជាតិរបស់ក្រុមហ៊ុន CBRE China បានឲ្យដឹងថា៖ «ចំនួនសិស្សចិនដែលសិក្សានៅបរទេសចាប់ពីអាយុវ័យក្មេងទៅបានកើនឡើងខ្លាំងក្នុងរយៈពេលប៉ុន្មានឆ្នាំថ្មីៗនេះ។ កត្តានេះត្រូវបានជំរុញឲ្យមានតម្រូវការជួល និងលក់ផ្ទះនៅជិតសាលាល្បីៗ»។
លោកស្រី Annie Hu សហស្ថាបនិកក្រុមហ៊ុនអចលនទ្រព្យ Hyde Global ក្នុងទីក្រុងឡុងដ៍ក៏បានឯកភាពចំពោះការលើកឡើងនេះផងដែរ។
លោកស្រីថ្លែងថា៖ កាលពី ២ ឆ្នាំមុន មានការកើនឡើងខ្លាំងនូវចំនួនអតិថិជនដែលមានកូនមករៀននៅក្រៅប្រទេស»។
លោកស្រី Hu បានថ្លែងថា ជិត ៤០ ភាគរយ នៃអតិថិជនរបស់ក្រុមហ៊ុនលោកស្រី គឺជាជនជាតិចិន ដែលកំពុងស្វែងរកផ្ទះនៅជិតសាលាក្នុងទីក្រុងឡុងដ៍សម្រាប់កូនរបស់ពួកគេដែលមានអាយុក្រោម ១២ ឆ្នាំ។
លោកស្រី Hu ដែលបានធ្វើការងារក្នុងទីផ្សារផ្ទះក្នុងទីក្រុងឡុងដ៍រយៈពេល ៧ ឆ្នាំ មកហើយនោះ បានថ្លែងថា៖ «តួលេខនេះស្ថិតនៅចន្លោះពី ១០ ទៅ ២០ ភាគរយ កាលពីប្រហែល ២ ទៅ ៣ ឆ្នាំមុន។ នៅពេលនោះ មានឪពុកម្តាយជនជាតិចិនតិចតួចដែលមានកូនតូចៗអាយុពី ៣ ទៅ ៥ ឆ្នាំក្នុងចំណោមអតិថិជនរបស់យើង»។
ភ្នាក់ងារអចលនទ្រព្យនានានៅសហរដ្ឋអាមេរិក និងប្រទេស អូស្រ្តាលី បានរាយការណ៍ពីលទ្ធផលប្រហាក់ប្រហែលគ្នា។
លោកស្រី Tina Dai ជាជនជាតិចិនមកពីទីក្រុងស៊ាងហៃ ដែលបានបម្រើការជាភ្នាក់ងារអចលនទ្រព្យក្នុងក្រុមហ៊ុន JC Pacific Capital Inc ក្នុងទីក្រុង Los Angeles បន្ទាប់ពីប្តូរលំនៅទៅកាន់សហរដ្ឋអាមេរិកកាលពីឆ្នាំ ២០១៣ បានថ្លែងថា៖ «ការអប់រំរបស់កូនជាទូទៅគឺជាហេតុផលដ៏ធំដែលឪពុកម្តាយជនជាតិចិនវ័យក្មេងបន្តទិញអចលនទ្រព្យក្នុងសហរដ្ឋអាមេរិក»។
លោកស្រី Dai ខ្លួនឯងផ្ទាល់បានទិញផ្ទះមួយ ដើម្បីឲ្យកូនស្រីរបស់លោកស្រីអាចទទួលបានសិទ្ធិចូលរៀននៅសាលារដ្ឋល្បីឈ្មោះក្នុងតំបន់ដែលលោកស្រីរស់នៅ។
លោក Jamie Mi ប្រធានផ្នែកអាជីវកម្មអន្តរជាតិប្រចាំក្រុមហ៊ុន Kay& Burton ដែលជាក្រុមហ៊ុនអចលនទ្រព្យផ្នែកតម្លៃខ្ពស់ក្នុងទីក្រុង Melbourne បានថ្លែងថា៖ «ប្រទេស ចិន គឺជាប្រភពដ៏ធំបំផុតនៃសិស្សបរទេសនៅប្រទេស អូស្រ្តាលី។ ឪពុកម្តាយជាជនជាតិចិនផ្តល់ការគាំទ្រខ្លាំងដល់តម្រូវការលក់ផ្ទះនៅប្រទេស អូស្រ្តាលី និងណូវែលសេឡង់»។
អាផាតមិនដែលស្ថិតនៅជិតសាលារដ្ឋដែលមានគុណភាពខ្ពស់ជាធម្មតាមានតម្លៃកាន់តែខ្ពស់នៅក្នុងប្រទេស ចិន។ ប៉ុន្តែឪពុកម្តាយជនជាតិចិនមានបំណងចំណាយច្រើនជាងនេះប្រសិនបើចំបាច់សម្រាប់ភាពងាយស្រួលប្រហាក់ប្រហែលគ្នានេះនៅប្រទេសផ្សេងៗវិញ។ នោះគឺដោយសារតែអចលនទ្រព្យលំនៅឋាននៅបរទេសក៏អាចបង្កើតប្រាក់ចំណូលថេរលើការវិនិយោគលើអចលនទ្រព្យផងដែរ។ នេះបើយោងតាមអ្នកនៅក្នុងឧស្សាហកម្មនេះ។
នៅតំបន់ Diamond Bar ក្នុងទីក្រុង Los Angeles ជាទីដែលកូនស្រីតូចរបស់លោកស្រី Dai គ្រោងនឹងចូលរៀននៅសាលា Evergreen Elementary School ដែលជាសាលារដ្ឋល្បីឈ្មោះមួយ អាផាតមិនមានបន្ទប់ចំនួន ២ មានតម្លៃចន្លោះពី ៤ ទៅ ៥ សែនដុល្លារ។
តម្លៃនេះនៅតែទាបជាងតម្លៃ ៧០៩ ០០០ ដុល្លារ ឬ ៤,៩ លានយន់ សម្រាប់ផ្ទះល្វែង ២ បន្ទប់ ដែលមានទំហំ ៩០ ម៉ែត្រការ៉េក្នុងទីក្រុងស៊ាងហៃ ជាទីដែលផ្ទះថ្មីលក់ក្នុងតម្លៃជាមធ្យម ជាង ៥៤ ពាន់យន់ ក្នុងមួយម៉ែត្រការ៉េ។ នេះបើយោងតាមទិន្នន័យដែលទទួលបានពីក្រុមហ៊ុនអចលនទ្រព្យ Centaline Shanghai។
លោក Lu Wenxi អ្នកស្រាវជ្រាវនៅក្រុមហ៊ុន Centaline Shanghai ថ្លែងថា៖ «តម្លៃផ្ទះនៅទីក្រុងស៊ាងហៃអាចប្រៀបធៀបគ្នាបានជាមួយផ្ទះនៅទីក្រុងញូវយ៉ក និងក្រុងតូក្យូ»។
ក្នុងចំណោមទីក្រុងពិភពលោកធំៗចំនួន ៣៥ ទាក់ទងនឹងតម្លៃផ្ទះ ទីក្រុងហុងកុង ស៊ាងហៃ ហ្សិនចិន និងប៉េកាំង ស្ថិតនៅចំណាត់ថ្នាក់ទី១ ទី៣ ទី៤ និងទី៩ រៀងគ្នាក្នុងតារាងចំណាត់ថ្នាក់ទីក្រុងដែលមានតម្លៃផ្ទះថ្លៃបំផុតរបស់ក្រុមហ៊ុន CBRE៕ People''s Daily/KC
