.jpg)
ស្លាកជាភាសាអាល្លឺម៉ង់មានន័យថា ផ្ទះសម្រាប់ជួលនៅលើអគារមួយក្នុងក្រុងប៊ែរឡាំង។ AFP
ក្រុងប៊ែរឡាំងៈ រដ្ឋបាលរបស់ក្រុងប៊ែរឡាំង ប្រទេស អាល្លឺម៉ង់ នឹងទិញអាផាតមិន ៦៧០ ល្វែង នៅក្នុងទីតាំងសំខាន់មួយពីម្ចាស់ឯកជន ក្នុងគោលបំណងបន្ធូរបន្ថយភាពតានតឹងផ្នែកលំនៅឋានដែលកើនឡើងនៅរដ្ឋធានីរបស់ប្រទេស អាល្លឺម៉ង់ មួយនេះ។
តម្លៃជួលដែលកើនឡើងខ្ពស់បានក្លាយជាបញ្ហាមួយសម្រាប់ប្រជាជនដែលស្វែងរកលំនៅឋានតម្លៃសមស្របនៅទីក្រុងប៊ែរឡាំង ហើយក្នុងតំបន់មួយចំនួនតម្លៃជួលបានកើនឡើង ២ ដង ក្នុងរយៈពេល ១០ ឆ្នាំចុងក្រោយនេះដែលបង្កើនការដាក់សម្ពាធលើទីផ្សារលំនៅឋាន។
តម្លៃទិញអាផាតមិនទាំងនេះមិនត្រូវបានប្រកាសឲ្យដឹងនោះទេ។
កាលពីខែមុន រដ្ឋបាលរបស់ទីក្រុងប៊ែរឡាំងបានចាត់វិធានការបង្កកការជួលរយៈពេល ៥ ឆ្នាំ ចាប់ពីឆ្នាំ ២០២០ ទៅក្នុងគោលបំណងដើម្បីបញ្ឈប់ការលក់លំនៅឋានទៅឲ្យអ្នកមានទ្រព្យច្រើនក្នុងតម្លៃថ្លៃដោយម្ចាស់បច្ចុប្បន្ន។
លោក Michael Mueller អភិបាលក្រុងប៊ែរឡាំង បានឲ្យដឹងនៅក្នុងសេចក្ដីប្រកាសព័ត៌មានមួយ បន្ទាប់ពីកិច្ចព្រមព្រៀងមួយត្រូវបានអនុម័តកាលពីថ្ងៃសុក្រសប្តាហ៍មុនថា៖ «ទីក្រុងប៊ែរឡាំង ត្រូវតែគ្រប់គ្រងជាថ្មីបន្ថែមទៀតលើទីផ្សារជួលលំនៅឋានរបស់ខ្លួន។ អាផាតមិន ៦៧០ ល្វែង ទាំងនេះ គឺជាជំហានដំបូងនៅក្នុងទិសដៅនេះ»។
ចាប់ពីចុងឆ្នាំមុនមក ប្រជាជនមូលដ្ឋានបានតវ៉ាប្រឆាំងការលក់ផ្ទះល្វែងក្នុងប្លុកអាផាតមិនធំៗចំនួន ៥ ឲ្យក្រុមហ៊ុនអចលនទ្រព្យ Deutsche Wohnen (DW)។
ដោយបារម្ភពីការកើនថ្លៃជួល ការដើរជាក្បួនតវ៉ាប្រឆាំងត្រូវបានរៀបចំឡើងដោយក្រុមអ្នកជួល ដែលព្យួរបដាចេញពីបង្អួច អាផាតមិននៅជិតនោះដែលជំរុញឲ្យរដ្ឋបាលទីក្រុងនេះត្រូវរារាំងការលក់នេះ។
បន្ទាប់ពីមានការពិភាក្សារវាងលោក Mueller និងក្រុមហ៊ុន DW ផ្ទះល្វែងទាំងនោះនៅពេលនេះនឹងត្រូវបានទិញដោយសមាគមលំនៅឋានរដ្ឋ Gewobag។
លោក Mueller ថ្លែងថា៖ «ខ្ញុំចង់ឲ្យប្រជាជនទីក្រុងប៊ែរឡាំង បន្តមានលទ្ធភាពទិញលំនៅឋានតម្លៃសមរម្យនៅទីក្រុងនេះ។ ហេតុនេះ វាជាគោលបំណងរបស់ខ្ញុំក្នុងការទិញផ្ទះនៅកន្លែងណាក៏ដោយដែលអាចធ្វើទៅបាន»៕ AFP/LA
