ក្រុងបាងកកៈ ធនាគារកណ្តាលថៃ (BoT) ត្រូវបានជំរុញឲ្យកែប្រែវិធានថ្មីមួយដែលកម្រិតកំណត់កម្ចីទិញផ្ទះធៀបនឹងតម្លៃ (LTV) ដែលបានចូលជាធរមាននៅថ្ងៃចន្ទសប្តាហ៍នេះ។ នេះបើយោងកាសែតបាងកកប៉ុស្តិ៍។
វិធានកម្ចីទិញផ្ទះថ្មីនេះអនុវត្តចំពោះអតិថិជនដែលទិញផ្ទះទី២ និងផ្ទះបន្តបន្ទាប់ ខណៈដែលតម្រូវការទីផ្សារនេះមានលក្ខណៈខ្សោយ ហើយការដាក់កំណត់នេះអាចរារាំងអ្នកដែលពិតជាមានបំណងទិញផ្ទះ មិនឲ្យទិញផ្ទះសម្រាប់ជាកម្មសិទ្ធិរបស់ខ្លួន។
កាសែតបាងកកប៉ុស្តិ៍បានរាយការណ៍ដោយដកស្រង់សំដីរបស់លោក Atip Bijanonda ប្រធានសមាគមអាជីវកម្មលំនៅឋានថៃ ខណៈលោកថ្លែងថា ទីផ្សារអចលនទ្រព្យនាឆ្នាំនេះនឹងកត់ត្រាកំណើនពី ០ ទៅ ៥ ភាគរយប៉ុណ្ណោះធៀបនឹងឆ្នាំ ២០១៨ ដែលជាចម្បងដោយសារមកពីវិធាន LTV ថ្មីនេះ។
លោក Atip បានថ្លែងថា៖ «ការដាក់កំណត់ LTV ពិតណាស់នឹងមានផលប៉ះពាល់ខ្លាំងទៅលើទីផ្សារនៅឆ្នាំនេះ ខណៈដែលការកំណត់នេះបានប៉ះពាល់រួចហើយទៅលើការលក់ផ្ទះក្នុងត្រីមាសទី១ »។ លោកបន្ថែមថា៖ «ធនាគារកណ្តាលគួរតែពិនិត្យមើលឡើងវិញពីផលប៉ះពាល់ដែលបង្កដោយការកំណត់នេះ ពីព្រោះវាប៉ះពាល់សេដ្ឋកិច្ចទាំងមូល»។
យោងតាមកាសែតបាងកកប៉ុស្តិ៍ ក្នុងផ្នែកផ្ទះកម្ពស់ទាប (ផ្ទះទោល និងផ្ទះថោនហៅស៍) ក្រុមហ៊ុនអភិ-វឌ្ឍន៍លំនៅឋាន នឹងសាងសង់ផ្ទះច្រើនលើសពីផែនការ ដោយសារអ្នកទិញផ្ទះត្រូវបានផ្តល់ជូនរយៈពេលជាងនេះដើម្បីបង់ប្រាក់កក់ដំបូង។
លោក Atip បានថ្លែងថា ការកំណត់ LTV ថ្មីនេះ នឹងមិនផ្តល់ឲ្យអ្នកទិញផ្ទះនូវពេលវេលាដើម្បីបង់ប្រាក់កក់ដំបូងដែលមានកម្រិតខ្ពស់ជាងមុននោះទេ ខណៈដែលមនុស្សជាច្រើនកំពុងទិញផ្ទះទី២ ដើម្បីពង្រីកគ្រួសារឬដើម្បីរស់នៅជិតកន្លែងធ្វើការឬសាលារៀន។
លោកបានថ្លែងថា៖ «ការកំណត់ LTV ថ្មីនេះ នឹងមិនរាប់បញ្ចូលអ្នកទិញផ្ទះស្ថិតក្នុងផ្នែកផ្ទះកម្ពស់ទាបនោះទេ ដោយសារផ្ទះទាំងនោះ គឺជាតម្រូវការពិតប្រាកដ មិនមែនទិញសម្រាប់ទុកចំណេញឡើយ។ អ្នកទិញសម្រាប់ទុកចំណេញបានចាកចេញពីទីផ្សារខុនដូក្នុងរយៈកាល ២-៣ ឆ្នាំចុងក្រោយនេះ»។
លោកបានលើកឡើងថា ក្រុមហ៊ុនអភិវឌ្ឍន៍គួររៀបចំអ្នកទិញផ្ទះជាមុន ដើម្បីជួយពួកគេឲ្យទទួលបានការអនុម័តកម្ចីទិញផ្ទះ បន្ទាប់ពីការកំណត់ LTV ថ្មីចូលជាធរមាន។ វិធីមួយគឺត្រូវជម្រះចោលរបាយការណ៍ធនាគាររបស់ពួកគេ។ វិធីសាស្រ្តមួយទៀត គឺត្រូវផ្តល់អនុសាសន៍ឲ្យអ្នកទិញផ្ទះត្រូវជ្រើសរើសផ្ទះដែលពួកគេអាចមានលទ្ធភាពបង់ប្រាក់បាន។
លោក Vichai Viratkapan អគ្គនាយកស្តីទីមជ្ឈមណ្ឌលព័ត៌មានអចលនទ្រព្យ (REIC) ថ្លែងថា ការកំណត់ LTV ថ្មី នឹងមានផលប៉ះពាល់ខ្លាំងទៅលើទីផ្សារលំនៅឋាន។
លោក Vichai បានថ្លែងថា៖ «អ្នកដែលខ្ចីប្រាក់រួមគ្នា ឬចុះហត្ថលេខារួមគ្នា និងអ្នកដែលមិនមានលុយបង់ប្រាក់កក់ដំបូងដែលមានកម្រិតខ្ពស់ជាងមុននឹងទទួលរងផលប៉ះពាល់ពីការកំណត់ LTV ថ្មីនេះ»។ លោកបន្ថែមថា៖ «អ្នកខ្ចីរួមគ្នាគួរត្រូវបានអនុញ្ញាតឲ្យដកឈ្មោះរបស់ពួកគេបន្ទាប់ពីកម្ចីទិញផ្ទះត្រូវបានបង់បានក្នុងរយៈពេលណាមួយ»។
លោកបានផ្តល់យោបល់ឲ្យមានការបង្កើតមូលនិធិទិញផ្ទះមួយសម្រាប់អ្នកទិញផ្ទះដែលកម្ចីទិញផ្ទះរបស់ពួកគេមិនត្រូវបានអនុម័តដោយគ្រឹះស្ថានមីក្រូហិរញ្ញវត្ថុ។
លោកបានថ្លែងថា ការកំណត់ LTV ថ្មីនេះនឹងកាត់បន្ថយការផ្ទេរកម្មសិទ្ធិផ្ទះថ្មីនៅក្នុងត្រីមាសទី២ ជាផលប៉ះពាល់មួយដែលអាចកើតមានរហូតដល់ត្រីមាសទី៣។
លោក Vichai បានថ្លែងថា តួលេខក្នុងត្រីមាសទី៤ នឹងបង្ហាញផលប៉ះពាល់ពិតប្រាកដដែលបង្កឡើងដោយការកំណត់ LTV ទៅលើទីផ្សារ។
យោងតាមក្រុមហ៊ុនប្រឹក្សាយោបល់អចលនទ្រព្យ Colliers International Thailand បានឲ្យដឹងថា ការផ្គត់ផ្គង់ខុនដូថ្មីបានចាប់ផ្តើមនៅក្នុងទីក្រុងបាងកកក្នុងត្រីមាសទីមួយ ដែលមានចំនួនសរុប ៨ ៤៤៣ យូនីត ធ្លាក់ចុះ ៦០ ភាគរយពីត្រីមាសទី៤ ឆ្នាំមុន និង ៤០ ភាគរយពីត្រីមាសទី១ ឆ្នាំមុន។
តម្លៃលក់ខុនដូថ្មីក្នុងត្រីមាសទី១ ក៏បានធ្លាក់ចុះផងដែរមកត្រឹម ៤៥,៤ ពាន់លានបាតពី ៨៦ ពាន់លានបាតក្នុងត្រីមាសទី១ ឆ្នាំ ២០១៨។
ក្នុងចំណោមចំនួនសរុប ខុនដូប្រហែល ២ ៤០០ យូនីតគឺជាខុនដូតម្លៃទាបស្ថិតក្រោមគម្រោងកម្ចីទិញផ្ទះ «ផ្ទះប្រជាពលរដ្ឋ» របស់រដ្ឋាភិបាល។
លោក Phattarachai Taweewong ជំនួយការនាយកនៃនាយកដ្ឋានស្រាវជ្រាវរបស់ក្រុមហ៊ុន Colliers បានថ្លែងថា៖ «ការធ្លាក់ចុះខ្លាំងនេះបង្ហាញថា ការកំណត់ LTVថ្មីនេះពិតជាមានផលប៉ះពាល់»។ លោកបន្ថែមថា៖ «ក្រុមហ៊ុនអភិវឌ្ឍន៍ខុនដូបានសម្របខ្លួនទៅតាមវិធានថ្មីនេះ»៕ PS