.jpg)
រូបគម្រោងអគារខុនដូ Urban VillageII ដែលបានប្រកាសបើកការសាងសង់ម្សិលមិញ។ ហេង ជីវ័ន
ភ្នំពេញៈ មន្ដ្រីជាន់ខ្ពស់កម្ពុជាបានជំរុញឲ្យក្រុមហ៊ុនអភិវឌ្ឍន៍អចលនទ្រព្យ និងសំណង់ផ្ដោតជាសំខាន់លើការគ្រប់គ្រងលើសុវត្ថិភាព និងហានិភ័យរបស់អគារ ដើម្បីទទួលបានទំនុកចិត្តពីអ្នកទិញ និងក្រុមវិនិយោគិន។
ថ្លែងក្នុងការដាក់ឲ្យដំណើរការសាងសង់គម្រោងខុនដូ Urban Village ដំណាក់កាលទី ២ កាលពីថ្ងៃពុធលោក ហ៊ុន ម៉ាណែត អគ្គមេបញ្ជាការរងកងយោធពលខេមរភូមិន្ទ និងមេបញ្ជាការកងទ័ពជើងគោកបានឲ្យដឹងថា ភាពជោគជ័យនៃ Urban Village ដំណាក់កាលទី ១ បានឆ្លុះបញ្ចាំងពីទំនុកចិត្តរបស់អតិថិជនលើគុណភាព សុវត្ថិភាព និងការរចនាដ៏ល្អ ហើយវាបញ្ជាក់ពីកិច្ចខិតខំប្រឹងប្រែងពីក្រុមហ៊ុនអភិវឌ្ឍន៍។
លោកថ្លែងថា៖ «ខ្ញុំជំរុញឲ្យក្រុមហ៊ុនអភិវឌ្ឍន៍គម្រោងទាំងអស់ ត្រូវផ្ដោតសំខាន់លើគុណភាព សុវត្ថិភាព និងការគ្រប់គ្រងហានិភ័យ ដើម្បីចៀសផុតពីហានិភ័យណាមួយដែលអាចកើតឡើងជាយថាហេតុ។ ការរួមចំណែក និងការអភិវឌ្ឍរបស់វិស័យសំណង់ គឺជាការរួមចំណែកនៅក្នុងរយៈពេលវែងនៃទិសដៅអភិវឌ្ឍន៍ទីក្រុងភ្នំពេញ និងសេដ្ឋកិច្ចរបស់ប្រទេសនេះ»។
លោក ប៊ែន លី នាយកប្រតិបត្តិរបស់ក្រុមហ៊ុន Urban Hub បានឲ្យដឹងថា ចាប់តាំងពីក្រុមហ៊ុនភាគច្រើនប្រកាន់ខ្ជាប់លើសុវត្ថិភាព ការរចនាល្អប្រសើរ និងស្ថាបត្យកម្មចម្រុះគឺជាកត្តាដ៏សំខាន់ក្នុងការទទួលបានទំនុកចិត្តជាសាធារណៈធ្វើឲ្យទទួលបានជោគជ័យនៃគម្រោងដំណាក់កាលទី ១ របស់លោក។
លោកបញ្ជាក់ថា៖ «យើងបានលក់អស់សម្រាប់ដំណាក់កាលទី ១ ដោយសារពួកគេទុកចិត្តលើគម្រោងរបស់យើង។ យើងទទួលបានជោគជ័យយ៉ាងខ្លាំង នៅក្នុងគម្រោងដំណាក់កាលទី ១ ដោយសារតែយើងអាចមើលឃើញម្ចាស់គម្រោងទាំងអស់បានកើនឡើងជិតពី ២០ ទៅ ៤០ ភាគរយ នៅពេលនេះពឹងផ្អែកលើមធ្យោបាយដែលពួកគេកំពុងទិញ ហើយ ៧០ ភាគរយ នៃអ្នកទិញរបស់យើងគឺជាប្រជាជនក្នុងស្រុក ហើយខុនដូរបស់យើងគឺជាអតិថិជនចម្រុះ ខណៈពាក្យស្លោករបស់យើងគឺ «តម្លៃសមរម្យ»។
លោក ប៊ែន លី បានឲ្យដឹងថា គម្រោងដំណាក់ទី ២ នឹងត្រូវសាងសង់លើផ្ទៃដីទំហំ ៧៦០ ០០០ ម៉ែត្រការ៉េ មាន ៥១ ជាន់ និង ១ ៧០០ យូនីត ហើយនឹងត្រូវការរយៈពេលនៃការសាងសង់ ៣ ឆ្នាំ ដែលនឹងត្រូវប្រគល់ឲ្យអតិថិជននៅចុងឆ្នាំ ២០២២។ អតិថិជនដែលកំណត់ទិសដៅរបស់លោកគឺជាទីផ្សារជប៉ុន ទីក្រុងហុងកុង អឺរ៉ុប អាមេរិក និងសំខាន់ជាងនេះទៅទៀតគឺទីផ្សារក្នុងស្រុក។
លោក ម៉ាណែត បានឲ្យដឹងថាក្នុងរយៈពេល ២-៣ ឆ្នាំមុន ទាំងវិនិយោគិនក្នុងស្រុក និងបរទេសនៅក្នុងវិស័យសំណង់កំពុងរីកចម្រើនគួរឲ្យកត់សម្គាល់ ហើយលោកសង្ឃឹមថា វានឹងបន្តកំណើននៅឆ្នាំនេះ។
លោកបញ្ជាក់ថា៖ «ប្រទេសកម្ពុជាស្ថិតក្នុងចំណោមទិសដៅដ៏សំខាន់សម្រាប់ការសាងសង់អចលនទ្រព្យ និងការសាងសង់ក្នុងតំបន់ដោយពឹងផ្អែកលើកំណើនសេដ្ឋកិច្ច និងការកើនឡើងប្រាក់ចំណូលរបស់ប្រជាជនស្ថិរភាពនយោបាយ និងបទប្បញ្ញត្តិត្រឹមត្រូវដើម្បីគ្រប់គ្រងវិស័យនេះ។
ការវិនិយោគលើវិស័យសំណង់ និងអចលនទ្រព្យក្នុងរយៈពេល ១០ ឆ្នាំចុងក្រោយនេះ បានបង្ហាញពីការរីកចម្រើន ហើយនេះគ្រាន់តែជាការចាប់ផ្ដើមប៉ុណ្ណោះ»។ លោកលើកឡើងថា ក្រុមហ៊ុនទេសចរណ៍ និងសកម្មភាពពាណិជ្ជកម្ម គឺជាកត្តាដ៏សំខាន់ក្នុងការគាំទ្រដល់ការសាងសង់ ដោយសារតែតម្រូវការបន្តកើនឡើង ដូច្នេះនេះផ្ដល់ឱកាសកាន់តែច្រើនសម្រាប់ក្រុមហ៊ុនអភិវឌ្ឍន៍អចលនទ្រព្យក្នុងការទទួលបានឱកាសកាន់តែច្រើនក្នុងការរកប្រាក់ចំណេញ។
បើយោងតាមរបាយការណ៍របស់ក្រសួងរៀបចំដែនដី នគរូបនីយកម្ម និងសំណង់កាលពីឆ្នាំ ២០១៩ ប្រទេសកម្ពុជាបានអនុម័តគម្រោងសាងសង់សរុប ៤ ៤៤៦ ជាមួយនឹងទុនវិនិយោគ ៩,៣៥ ពាន់លានដុល្លារ ខណៈដែលកាលពីឆ្នាំ ២០១៨ បានអនុម័តគម្រោងសាងសង់សរុប ២ ៨៦៧ ជាមួយនឹងតម្លៃប៉ាន់ប្រមាណ ៥,២២ ពាន់លានដុល្លារ។ ទុនវិនិយោគសំណង់កាលពីឆ្នាំ ២០១៩ បានកើនឡើង ៧៨,៨៨ ភាគរយ ធៀបនឹងឆ្នាំ ២០១៨៕LA
