ក្រុងបាងកកៈ គោលនយោបាយកម្ចីថ្មីរបស់ធនាគារកណ្ដាលថៃ នឹងធ្វើឲ្យប៉ះពាល់ដល់ការលក់លំនៅឋាននៅពេលអនាគតនៅក្នុងខេត្តលំដាប់លេខ ១ និងលេខ ២ ចំនួន ២០ ក្នុងប្រទេស ថៃ។ នេះបើយោងតាមកាសែតបាងកកប៉ុស្តិ៍។
កាសែតបាងកកប៉ុស្តិ៍បានដកស្រង់សម្តីរបស់លោក Vichai Viratkapan អគ្គនាយកស្ដីទីមជ្ឈមណ្ឌល ព័ត៌មានអចលនទ្រព្យ (REIC) ខណៈលោកថ្លែងថា ការកំណត់ទំហំកម្ចីថ្មីរបស់ធនាគារជាតិ នឹងមានផលប៉ះពាល់យ៉ាងខ្លាំងលើអំណាចការទិញលំនៅឋាននៅឆមាសទី ២ ឆ្នាំនេះ បន្ទាប់ពីវិធានការនេះចូលជាធរមានថ្ងៃទី ១ ខែមេសា ឆ្នាំនេះ។
លោក Vichai ថ្លែងថា៖ «ក្រុមហ៊ុនអភិវឌ្ឍន៍ជាច្រើនអាចបន្ថយល្បឿនដំណើរការផ្គត់ផ្គង់ថ្មី ដោយសារបារម្ភអំពីផលប៉ះពាល់ទីផ្សារដោយច្បាប់កម្ចីថ្មីនេះ»។ លោកបន្តថា៖ «អត្រាស្រូបយកប្រចាំខែនឹងធ្លាក់ចុះនៅឆមាសទី ២ ធៀបនឹងឆមាសទី ១ នៅគ្រប់ខេត្ត និងគ្រប់ប្រភេទលំនៅឋាន»។
រាល់ឆ្នាំ មជ្ឈមណ្ឌល REIC អង្កេតទីផ្សារលំនៅឋាននៅតំបន់ក្រុងបាងកក និងខេត្តជុំវិញក្រុងនេះ (Greater Bangkok) ព្រមទាំងក្នុងខេត្តចំនួន ២០ ក្នុងតំបន់ ៤ ទូទាំងប្រទេស។
កាសែតបាងកកប៉ុស្តិ៍បានរាយការណ៍ថា ខេត្ត ៣ ដែល REIC រំពឹងថានឹងមានអត្រាស្រូបយកប្រចាំខែទាបបំផុតនៅឆមាសទី ២ នោះ គឺខេត្តតាក់ (១,៤ ភាគរយ) ខេត្តឈៀងរ៉ៃ (១,៥ ភាគរយ) និងខេត្តចាក់ជើងសៅ (១,៨ ភាគរយ)។
លោកថា ក្រុមហ៊ុនអភិវឌ្ឍន៍គួរតែប្រយ័ត្នជាពិសេសដំណើរការការផ្គត់ផ្គង់ថ្មីនៅក្នុងខេត្តចាក់ជើងសៅ ជាពិសេសលំនៅឋានកម្ពស់ទាប ដោយសារតែអត្រាការស្រូបយកប្រចាំខែ បានធ្លាក់ចុះមកនៅត្រឹម ១ ភាគរយប៉ុណ្ណោះកាលពីពាក់កណ្ដាលឆ្នាំ ២០១៨ ធៀបនឹងកំណើនពី ៤ ទៅ ៥ ភាគរយកាលពីឆ្នាំ ២០១៧។
ខេត្តចាក់ជើងសៅ នឹងមើលឃើញកំណើនផ្គត់ផ្គង់មិនទាន់លក់ចេញនៅចុងឆ្នាំ ២០១៩ ធៀបខេត្តតាក់ និងឈៀងរ៉ៃ។ នេះបើតាម REIC។
មជ្ឈមណ្ឌលនេះប៉ាន់ប្រមាណថា នឹងមានលំនៅឋានមិនទាន់លក់ចេញចំនួន ៦ ០៩០ យូនីតនៅខេត្តចាក់ជើងសៅ ដែលរួមមានយូនីតកម្ពស់ទាប ៥ ៧០៦ និងខុនដូ ៣៨៤ យូនីត ធៀបនឹងយូនីតមិនទាន់លក់ចេញចំនួន ៤៩០ នៅខេត្តតាក់ និង ១ ៥៣០ យូនីតនៅខេត្តឈៀងរ៉ៃ។
ការផ្គត់ផ្គង់លំនៅឋានមិនទាន់លក់ចេញ នឹងមានយូនីតកម្ពស់ទាបចំនួន ១ ៤៥៩ និងខុនដូ ៧១ យូនីតក្នុងខេត្តឈៀងរ៉ៃ និងយូនីតកម្ពស់ទាប ២២២ និងខុនដូ ២៦៨ ក្នុងខេត្តតាក់។
លោកស្រី Risinee Sarikaputra នាយិកាផ្នែកស្រាវជ្រាវ និងប្រឹក្សាយោបល់នៅក្រុមហ៊ុនប្រឹក្សាយោបល់អចលនទ្រព្យ Knight Frank Thailand បានឲ្យដឹងថា ទីផ្សារខុនដូនៅទីក្រុងប៉ាតាយ៉ា នឹងនៅតែមិនមានភាពអនុគ្រោះនៅឆ្នាំនេះ ដោយសារតែអ្នកទិញជនជាតិចិន ដែលជាទីផ្សារដ៏សំខាន់ បានយឺតយ៉ាវក្នុងការទិញ ចាប់តាំងពីឧប្បត្តិហេតុគ្រោះថ្នាក់កាណូតនៅភូកេតកាលពីឆ្នាំមុន។
លោកស្រី Risinee បានថ្លែងថា៖ «ការធ្លាក់ថ្លៃប្រាក់គឺជាកតា្តផ្សេងមួយទៀត។ ទីផ្សារខុនដូរបស់ទីក្រុងប៉ាតាយ៉ាមិនល្អទេ ហើយនិន្នាការនេះនឹងបន្តពេញមួយឆ្នាំនេះ។ មិនមានក្រុមហ៊ុនអភិវឌ្ឍន៍ចុះបញ្ជីគ្រោងនឹងដំណើរការផ្គត់ផ្គង់ថ្មីឡើយ »។
កាសែតបាងកកប៉ុស្តិ៍បានរាយការណ៍ថា គោលនយោបាយកម្ចីថ្មី ត្រូវបានរំពឹងថា នឹងប៉ះពាល់ដោយផ្ទាល់ដល់ការសម្រេចចិត្តទិញរបស់អ្នកទិញជាជនជាតិថៃមួយចំនួន ដែលចង់ទិញអចលនទ្រព្យ នៅទីក្រុងប៉ាតាយ៉ា ដែលជាកន្លែងសម្រាកកម្សាន្ត ឬការវិនិយោគ។
លោកស្រី Risinee បានឲ្យដឹងថា ទីផ្សារនេះនឹងស្ទុះងើបឡើងវិញនៅពេលអនាគត ដោយសារគំនិតផ្តួចផ្ដើមច្រករបៀងសេដ្ឋកិច្ចភាគខាងកើត ជំរុញតម្រូវការថ្មី។
REIC បន្តថា ការផ្គត់ផ្គង់លំនៅឋានមិនទាន់លក់ចេញក្នុងខេត្តទាំង ២០ ដែលត្រូវបានបញ្ចប់ការសាងសង់ និងត្រៀមផ្ទេរកម្មសិទ្ធិសរុប មានចំនួន ២៧ ០០០ យូនីត ដែលមានតម្លៃរួម ៩៩, ៧៨ ពាន់លានបាត (៣,១៤ ពាន់លានដុល្លារ) គិតត្រឹមឆមាសទី ១ ឆ្នាំ ២០១៨៕ LA