ទោះបីជាលំនៅឋានដែលមានតម្លៃសមរម្យមានតម្រូវការខ្ពស់ក្នុងចំណោមគ្រួសារមានប្រាក់ចំណូលទាប និងមធ្យមក៏ដោយ ក៏ការផ្គត់ផ្គង់លំនៅឋានមានតម្លៃទាបហាក់ត្រូវបានគេមើលឃើញថា មិនទាន់អាចឆ្លើយតបសមល្មមនឹងតម្រូវការដែលកំពុងកើនឡើងនាពេលបច្ចុប្បន្ននោះទេ។
ផ្ទុយទៅវិញអ្នកអភិវឌ្ឍន៍ភាគច្រើនមានការចាប់អារម្មណ៍ទៅលើការកសាងគម្រោងអភិវឌ្ឍន៍លំនៅឋានដែលមានតម្លៃខ្ពស់ដោយសារតែពួកគេអាចទទួលបានប្រាក់ចំណេញខ្ពស់ជាងការវិនិយោគលើគម្រោងតម្លៃមធ្យម។ ប្រការនេះនាំឱ្យគ្រួសារដែលមានចំណូលទាបនៅតែត្រូវបន្តការជួលបន្ទប់ ឬផ្ទះគេសម្រាប់ស្នាក់នៅដដែល។
នៅក្នុងបរិបទនេះកាលពីឆ្នាំមុនប្រទេសកម្ពុជាបានធ្វើសេចក្តីព្រាងគោលនយោបាយលំនៅឋានដែលមានតម្លៃសមរម្យក្នុងគោលបំណងជួយដល់គ្រួសារដែលមានប្រាក់ចំណូលមធ្យម ព្រមទាំងមន្ត្រីរាជការស៊ីវិលឱ្យមានលំនៅឋានរស់នៅសមរម្យនៅក្នុងរាជធានីភ្នំពេញ។ ដូច្នេះពួកគេនឹងមិនចាំបាច់ជួលបន្ទប់ ឬផ្ទះរបស់នរណាដើម្បីស្នាក់នៅទៀតនោះទេ។
នៅឆ្នាំ ២០១៤ កម្ពុជាបានអនុម័តគោលនយោបាយលំនៅឋានជាតិ ដើម្បីជំរុញការអភិវឌ្ឍលំនៅឋានឱ្យបានកាន់តែច្រើនជូនប្រជាពលរដ្ឋ។ យោងតាមគោលនយោបាយលំនៅឋានជាតិរបស់រាជរដ្ឋាភិបាលឆ្នាំ ២០១៤ កម្ពុជានឹងត្រូវការផ្ទះបន្ថែមចំនួនជាង ១ លានខ្នងដើម្បីបំពេញតាមតម្រូវការរហូតដល់ឆ្នាំ ២០៣០។
ក្នុងអំឡុងវេទិកាលំនៅឋានជាតិកាលពីខែមិថុនាឆ្នាំ ២០១៧ លោក ជា សុផារ៉ា ទេសរដ្ឋមន្ត្រី និងជារដ្ឋមន្ត្រីក្រសួងរៀបចំដែនដី នគរូបនីយកម្ម និងសំណង់ បានមានប្រសាសន៍ថា៖ «ក្រសួងរៀបចំដែនដី នគរូបនីយកម្ម និងសំណង់ កំពុងយកចិត្តទុកដាក់បន្ថែមទៀតដើម្បីស្វែងរកមធ្យោបាយក្នុងការផ្តល់លំនៅឋានតម្លៃសមរម្យជូនប្រជាជនដែលមានប្រាក់ចំណូលទាបនៅទូទាំងប្រទេស ដើម្បីឱ្យពួកគេមានលំនៅឋានប្រកបដោយផាសុកភាព ភាពថ្លៃថ្នូរ និងសុវត្ថិភាព»។
លោក ជា សុផារ៉ា បានបន្តថាក្រសួងកំពុងធ្វើការជាមួយក្រសួងសេដ្ឋកិច្ច និងហិរញ្ញវត្ថុ ដើម្បីសិក្សា និងរៀបចំដាក់តម្លៃសម្រាប់លំនៅឋានមានតម្លៃសមរម្យ និងលើកទឹកចិត្តខាងផ្នែកពន្ធដារ និងនិយតកម្មដើម្បីជំរុញដល់វិស័យឯកជនឱ្យបំពេញភារកិច្ចនេះ។
ទោះជាយ៉ាងណាក៏ដោយរហូតមកដល់ពេលនេះមានតែគម្រោងចំនួន ៣ ប៉ុណ្ណោះដែលបានទទួលការគាំទ្រពីរាជរដ្ឋាភិបាល។
គម្រោងលំនៅឋានមានតម្លៃសមរម្យដំបូងត្រូវបានអភិវឌ្ឍដោយក្រុមហ៊ុន Worldbridge Land កាលពីខែមករាឆ្នាំ ២០១៧។ គម្រោងនេះមានចម្ងាយប្រហែល ១៨ គីឡូម៉ែត្រពីរាជធានីភ្នំពេញដោយស្ថិតនៅក្នុងស្រុកស្អាង ខេត្តកណ្តាល។ គម្រោងតម្លៃ ១០០ លានដុល្លារនេះមានកម្ពស់ ២ ជាន់ ស្មើនឹង ២២៩៧។ ផ្ទះនីមួយៗមានតម្លៃចន្លោះពី ២៥០០០ ទៅ ៣០០០០ ដុល្លារអាស្រ័យលើទំហំ និងប្រភេទផ្ទះ។
គម្រោងនេះផ្តោតលើមន្ត្រីរាជការដែលមានប្រាក់ខែទាប ហើយមិនមានលទ្ធភាពទិញផ្ទះក្នុងតម្លៃទីផ្សារ។ បន្ទាប់ពីមន្ត្រីរាជការ គ្រួសារធម្មតាដែលបំពេញតាមលក្ខខណ្ឌក្រុមហ៊ុន និងដែលមានប្រាក់ចំណូលប្រចាំខែតិចជាង ៥០០ ដុល្លារក៏អាចមានសិទ្ធិទិញបានដែរ។
គម្រោងនេះចាប់ផ្ដើមបើកលក់កាលពីដើមឆ្នាំ ២០១៨ នេះ។ លោក សៀ រិទ្ធី ប្រធានក្រុមប្រឹក្សាភិបាលនៃក្រុមហ៊ុន WorldBridge Group បានមានប្រសាសន៍ថារហូតមកដល់ពេលនេះយើងបានលក់ផ្ទះជាង ៥០០ ខ្នងហើយទៅឱ្យប្រជាជនសាមញ្ញ។ តម្លៃនេះនៅតែសមរម្យសម្រាប់មន្ត្រីរាជការ និងគ្រួសារដែលមានចំណូលទាប។
លោក រិទ្ធី បន្ថែមទៀតថា៖ «ដោយសារយើងមិនទាន់ទទួលបានបញ្ជីឈ្មោះមន្ត្រីរាជការដែលមានសិទ្ធិទទួលបានលំនៅឋាននេះយើងមិនទាន់បានលក់លំនៅឋានណាមួយដល់ពួកគេទេ។ ឥឡូវនេះយើងកំពុងរង់ចាំភាគីរដ្ឋាភិបាលដើម្បីផ្តល់ឈ្មោះឱ្យយើង។ បន្ទាប់ពីទទួលបានឈ្មោះហើយ យើងនឹងលក់ផ្ទះទៅឱ្យពួកគេ»។
ទន្ទឹមនឹងនេះលោក យុគ សុធិរិទ្ធិ អ្នកគ្រប់គ្រងក្រុមហ៊ុន Worldbridge Home និយាយថា រាជរដ្ឋាភិបាលបានជួយសាងសង់ហេដ្ឋារចនាសម្ព័ន្ធសម្រាប់គម្រោងរបស់លោក។ ការសាងសង់ហេដ្ឋារចនាសម្ព័ន្ធនៅពេលនេះស្ទើរតែចប់ ១០០ ភាគរយហើយ ដូច្នេះក្រុមហ៊ុនអាចនឹងចាប់ផ្ដើមសង់លំនៅឋានក្នុងរយៈពេលប៉ុន្មានខែទៀតខាងមុខ។ លោកបានបន្តថាក្រុមហ៊ុនមានផែនការសាងសង់លំនៅឋានតម្លៃសមរម្យមួយកន្លែងទៀត ដែលទទួលបានការសហការជាមួយរដ្ឋាភិបាលនៅពេលខាងមុខផងដែរ។
គម្រោងលំនៅឋានមានតម្លៃសមរម្យទី ២ ត្រូវបានអភិវឌ្ឍដោយក្រុមហ៊ុន ប៊ុន ជេស្ឋ គ្រុប បន្ទាប់ពីក្រសួងរៀបចំដែនដី នគរូបនីយកម្ម និងសំណង់បានចុះអនុស្សរណៈយោគយល់គ្នា (MoU) កាលពីខែមីនាឆ្នាំ ២០១៧ ជាមួយក្រុមហ៊ុនដើម្បីសហការលើគម្រោងលំនៅឋានសមរម្យដែលមានតម្លៃ ៨៨ លានដុល្លារមួយនេះ។
មានទីតាំងនៅក្នុងស្រុកពញាឮ ខេត្តកណ្តាល គម្រោងលំនៅឋាននេះនឹងផ្តោតទៅលើមន្ត្រីរាជការស៊ីវិល កងកម្លាំងប្រដាប់អាវុធក៏ដូចជាប្រជាពលរដ្ឋដែលមានប្រាក់ចំណូលទាប និងមធ្យម។ ផ្ទះនីមួយៗមានតម្លៃចាប់ពី ២៣៥០០ ទៅ ២៤៨០០ ដុល្លារ ហើយអ្នកទិញត្រូវបង់ប្រាក់កក់ ៣០ ភាគរយជាមួយនឹងការបង់ប្រាក់ប្រចាំខែតិចជាង ២០០ ដុល្លារ។
លោក ប៊ុន ជេស្ឋ ស្ថាបនិក និងប្រធានក្រុមហ៊ុន ប៊ុន ជេស្ឋ គ្រុប ដែលមានឯកទេសក្នុងការកែលម្អគេហដ្ឋាន បាននិយាយថាក្រុមហ៊ុននឹងទទួលខុសត្រូវក្នុងការគ្រប់គ្រងការរចនា និងការចាប់ផ្តើមគម្រោងលំនៅឋាន។ គម្រោងនេះនឹងមានលំនៅឋានសរុបចំនួន ៥៣៤០ ព្រមទាំងមានសាលារៀន មន្ទីរពេទ្យ និងកន្លែងលក់ទំនិញផងដែរ។ រហូតមកដល់ពេលនេះគម្រោងរបស់យើងបានបញ្ចប់ ៦០ ភាគរយហើយ ខណៈការលក់នឹងចាប់ផ្ដើមបន្ទាប់ពីបុណ្យចូលឆ្នាំខ្មែរ។
លោកបានបន្តថាយើងសម្រេចចិត្តសាងសង់លំនៅឋានតម្លៃសមរម្យជូនប្រជាពលរដ្ឋ និងមន្ត្រីរាជការ បើទោះបីជាផលចំណេញមិនសូវទទួលបានច្រើនដូចការសាងសង់លំនៅឋានតម្លៃថ្លៃក៏ដោយ។ យ៉ាងណាក៏ដោយ តម្រូវការលំនៅឋានតម្លៃសមរម្យមានតម្រូវការខ្ពស់ជាងតម្រូវការលំនៅឋានតម្លៃថ្លៃនាពេលបច្ចុប្បន្ន ដូច្នេះយើងសង្ឃឹមថានឹងលក់ដាច់លឿន។ ម្យ៉ាងវិញទៀតយើងចង់ជួយដល់សង្គមដើម្បីកុំឱ្យមានវិបត្តិលំនៅឋាននៅថ្ងៃខាងមុខ។
គម្រោងលំនៅឋានដែលមានតម្លៃសមរម្យទី៣ ដែលត្រូវបានបង្កើតឡើងដោយសហការជាមួយក្រសួងរៀបចំដែនដី នគរូបនីយកម្ម និងសំណង់ ត្រូវបាន អភិវឌ្ឍដោយក្រុមហ៊ុនអចលនទ្រព្យធំមួយរបស់ជប៉ុនឈ្មោះ Arakawa ក្នុងខែវិច្ឆិកា ឆ្នាំ ២០១៧ ដោយមានទីតាំងស្ថិតនៅសង្កាត់ទឹកថ្លា ខណ្ឌសែនសុខ។ Arakawa គឺជាគម្រោងខុនដូដែលមានតម្លៃ ៧០ លានដុល្លារដែលមានទំហំ ១៣ ៦៨០ ម៉ែត្រការ៉េ។
លោក Alex Yasumoto ប្រធានក្រុមហ៊ុន Arakawa បានថ្លែងក្នុងពិធីសម្ពោធគម្រោងកាលពីឆ្នាំមុនថា ទឹកប្រាក់ប្រហែល ៤០ លានដុល្លារនឹងត្រូវចំណាយក្នុងដំណាក់កាលទី ១ ហើយទឹកប្រាក់ ៣០ លានដុល្លារបន្ថែមទៀតនឹងត្រូវបណ្តាក់ទុនក្នុងដំណាក់កាលទី ២។ ដំណាក់កាលទី ១ មានបន្ទប់ខុនដូចំនួន ២០០០ យូនីត ហើយនឹងចំណាយពេល ៣ ឆ្នាំកន្លះដើម្បីបញ្ចប់។ តម្លៃផ្ទះនឹងមានចាប់ពី ២០០០០ ទៅ ៣០០០០ ដុល្លារក្នុង ១ យូនីត។
លោក សឿង សារ៉ាន់ នាយកប្រតិបត្តិសមាគមធាងត្នោតដែលជាអង្គការក្រៅរដ្ឋាភិបាលដើម្បីលើកកម្ពស់សិទ្ធិលំនៅឋាន និយាយថាទោះបីជាមានគម្រោងលំនៅឋានតម្លៃសមរម្យ ដែលទទួលបានការគាំទ្រពីសំណាក់រដ្ឋាភិបាលក៏ដោយ ក៏ការផ្គត់ផ្គង់នៅមិនទាន់អាចឆ្លើយតបតាមតម្រូវការបានទេ។
ស្របពេលដែលលោក សឿង សារ៉ាន់ សរសើរគំនិតផ្ដួចផ្ដើមរបស់រដ្ឋាភិបាលដើម្បីជួយដោះស្រាយបញ្ហាជូនប្រជាពលរដ្ឋតាមរយៈការលើកទឹកចិត្តដល់វិស័យឯកជនដើម្បីសាងសង់លំនៅឋានតម្លៃសមរម្យ លោកក៏បានលើកឡើងដែរថាក្រុមហ៊ុនអភិវឌ្ឍន៍ត្រូវការការលើកទឹកចិត្តបន្ថែមទៀតដើម្បីបំពេញតម្រូវការទាំងនោះ។
លោកបានបញ្ជាក់ថាដើម្បីទទួលបានជោគជ័យ រដ្ឋាភិបាលគួរផ្ដល់ការលើកទឹកចិត្តបន្ថែមទៀតដល់ក្រុមហ៊ុនអភិវឌ្ឍន៍ ហើយស្របពេលជាមួយគ្នា ក្រុមហ៊ុនអភិវឌ្ឍន៍ក៏គួរតែចូលរួមចំណែកជួយសង្គមផងដែរ តាមរយៈការសាងសង់លំនៅឋានតម្លៃសមរម្យ។ ជាធម្មតាក្រុមហ៊ុនអភិវឌ្ឍន៍តែងតែចង់បានផលចំណេញខ្ពស់ដោយសាងសង់លំនៅឋានតម្លៃថ្លៃ ហើយមិនសូវចង់សង់លំនៅឋាន តម្លៃសមរម្យនោះទេ ដូច្នេះការលើកទឹកចិត្តដល់ក្រុមហ៊ុនអភិវឌ្ឍន៍ដើម្បីបង្វែរមកសាងសង់លំនៅឋានតម្លៃសមរម្យវិញគឺជាការចាំបាច់។
លោកនិយាយថា៖ «បើមិនមានការចូលរួមពីសំណាក់វិស័យឯកជន គោលនយោបាយលំនៅឋានជាតិអាចនឹងបរាជ័យក្នុងការឆ្លើយតបនឹងកំណើនប្រជាជនក្រុងដែលនឹងកើនចំនួនដ៏ឆាប់រហ័សនៅពេលខាងមុខ។ ប្រការនេះអាចនឹងនាំទៅដល់វិបត្តិលំនៅឋាន»។
ទាក់ទងនឹងប្រធានបទនេះលោក សេង ឡូត អ្នកនាំពាក្យក្រសួងរៀបចំដែនដី នគរូបនីយកម្ម និងសំណង់មិនអាចពន្យល់បានទេដោយលោកប្រាប់ថាជាប់រវល់ប្រជុំ៕