ក្រុងបាងកកៈ ការផ្គត់ផ្គង់លើសតម្រូវការកំពុងកើតឡើងនៅក្នុងទីផ្សារខុនដូនៅទីក្រុងបាងកក ដែលបានបណ្ដាលឲ្យក្រុមហ៊ុនអភិវឌ្ឍន៍មួយចំនួន ត្រូវពឹងផ្អែកខ្លាំងលើការលក់យូនីតរបស់ខ្លួនកាន់តែច្រើនឲ្យអ្នកទិញជាជនបរទេស ជាពិសេសជនជាតិចិនដែលបានក្លាយជាទីផ្សារដ៏សំខាន់មួយក្នុងរយៈពេល ២-៣ ឆ្នាំ ចុងក្រោយនេះ។ នេះបើយោងតាមកាសែតបាងកកប៉ុស្តិ៍។
មិនដូចក្រុមហ៊ុនអភិវឌ្ឍន៍លំនៅឋានគ្រួសារទោល និងផ្ទះប្រភេទ townhouse ក្រុមហ៊ុនអភិវឌ្ឍន៍ខុនដូមិនអាចបញ្ឈប់បានទេ នៅពេលពួកគេចាប់ផ្ដើមការសាងសង់។ ម៉្យាងវិញទៀត ក្រុមហ៊ុនអភិវឌ្ឍន៍រៀបចំគម្រោងរបស់ពួកគេជាដំណាក់កាល ហើយអាចពន្យារពេលដំណាក់កាលថ្មីមួយ បើតម្រូវការទីផ្សារចុះទាប។ នៅទីក្រុងបាងកក ដែលមានចំនួនប្រហែលពាក់កណ្ដាលនៃខុនដូទាំងអស់ក្នុងប្រទេស ថៃ ការផ្គត់ផ្គង់លើសតម្រូវការនៅទីក្រុងនេះកំពុងក្លាយជាបញ្ហាមួយ។
កាសែតបាងកកប៉ុស្តិ៍ បានរាយការណ៍ថា ទីក្រុងបាងកកមានខុនដូដែលបញ្ចប់ការសាងសង់រួច ៥៩១ ១៣៨ យូនីត កាលពីចុងឆ្នាំ ២០១៨។ ចំនួន ៩០ ០០០ យូនីតផ្សេងទៀតនៅពេលនេះកំពុងដំណើរការសាងសង់ដែលរំពឹងថា នឹងបញ្ចប់ក្នុងឆ្នាំ ២០១៩ និងនៅឆ្នាំបន្តបន្ទាប់ទៀត។ យូនីតដែលមិនទាន់លក់ចេញមានចំនួនសរុបប្រហែល ៤៨ ០០០ កាលពីចុងខែឧសភា ហើយចំនួននេះទំនងនឹងកើនឡើង ដោយសារអគារកាន់តែច្រើនត្រូវបានបញ្ចប់។
ក្រុមហ៊ុនអភិវឌ្ឍន៍ចុះបញ្ជីក្នុងផ្សារហ៊ុនថៃជាកត្តាជំរុញដ៏សំខាន់សម្រាប់ទីផ្សារខុនដូ ហើយវាពិបាកសម្រាប់ក្រុមហ៊ុនទាំងនោះក្នុងការបញ្ឈប់ការសាងសង់ដោយងាយស្រួល។ រៀងរាល់ឆ្នាំ ពួកគេប្រឈមសម្ពាធធ្វើឲ្យកើនឡើងប្រាក់ចំណូល និងប្រាក់ចំណេញ។ ខណៈដែលក្រុមហ៊ុនទាំងនេះបន្តដំណើរការគម្រោងថ្មីៗដែលពួកគេសង្ឃឹមថា នឹងទាក់ទាញអ្នកទិញ ពួកគេក៏កំពុងចំណាយពេលវេលាកាន់តែច្រើនផងដែរ ដើម្បីបញ្ចេញឲ្យអស់នូវយូនីតដែលលក់រួចហើយ។
ប៉ុន្តែអំណាចការទិញរបស់ប្រជាជនថៃ បានចុះខ្សោយក្នុងរយៈពេលប្រហែល ៥ ឆ្នាំចុងក្រោយ និងមិនទាន់ស្ទុះងើបឡើងវិញពេញលេញនៅឡើយទេ។ ប្រជាជនថៃជាច្រើននៅតែមានការបារម្ភអំពីស្ថានការណ៍នយោបាយ និងថា តើរដ្ឋាភិបាលថ្មីនេះអាចធ្វើឲ្យសេដ្ឋកិច្ចផ្លាស់ប្តូរជាថ្មីម្ដងទៀតដែរ ឬទេ។ ហេតុដូច្នេះហើយ ក្រុមហ៊ុនអភិវឌ្ឍន៍កំពុងស្វែងរកអ្នកទិញដែលមានអំណាចការទិញខ្ពស់ក្នុងបណ្ដាប្រទេសផ្សេងទៀត ជាពិសេសប្រជាជនចិននៅទីក្រុងហុងកុង និងចិនដីគោក និងអ្នកនិយាយភាសាចិនផ្សេងទៀត។
យោងតាមធនាគារកណ្ដាលថៃ អ្នកទិញបរទេសមកពីទីក្រុងហុងកុង និងប្រទេស ចិន ចូលរួមចំណែក ៤៣ ភាគរយ នៃទឹកប្រាក់ ៩២,១៦ ពាន់លានបាត (២,៩៨ ពាន់លានដុល្លារ) ដែលបានផ្ទេរមកពីបរទេសដោយជនបរទេសទាំងអស់ ដើម្បីទិញខុនដូនៅក្នុងប្រទេស ថៃ ក្នុងឆ្នាំ ២០១៨។
ប៉ុន្តែអ្នកទិញជនជាតិចិន នៅពេលថ្មីៗនេះ មានការបារម្ភយ៉ាងខ្លាំងអំពីថា តើពួកគេនឹងត្រូវចំណាយប្រាក់ក្នុងកម្រិតណា។ តម្លៃប្រាក់យន់ធៀបនឹងប្រាក់បាតបានធ្លាក់ចុះពី ១០ ទៅ ១២ ភាគរយ ចាប់តាំងពីដើមឆ្នាំ ២០១៧។ វាមិនមែនជាការធ្លាក់ចុះខ្លាំងនោះទេ ធៀបជាមួយនឹងអ្វីដែលកើតឡើងចំពោះប្រាក់រូប្លិ៍ (rouble) របស់រុស្ស៊ីក្នុងរយៈពេល ១ ទសវត្សរ៍កន្លងមកនេះ ប៉ុន្តែវាអាចធ្វើឲ្យប៉ះពាល់ដល់ទំនុកចិត្តអ្នកទិញជាជនជាតិចិនមួយចំនួន៕ LA