ភ្នំពេញៈ អគ្គិសនីកម្ពុជា កាលពីថ្ងៃចន្ទ បានចេញសេចក្ដីប្រកាសព័ត៌មានមួយដោយបានបង្ហាញអំពីកិច្ចខិតខំប្រឹងប្រែងរបស់ខ្លួន នៅក្នុងការស្វែងរកដំណោះស្រាយឆ្លើយតបជាបន្ទាន់ នូវបញ្ហាកង្វះការផ្គត់ផ្គង់អគ្គិសនី ដល់អ្នកប្រើប្រាស់ នារដូវប្រាំងនេះ ខណៈដែលកង្វះអគ្គិសនីនៅតាមតំបន់នានា អាចនឹងអូសបន្លាយរហូតដល់មានភ្លៀងធ្លាក់។
ក្នុងសេចក្ដីប្រកាសនោះ អគ្គិសនីកម្ពុជា បានលើកឡើងថា ក្នុងគោលដៅនៃការអភិវឌ្ឍវិស័យអគ្គិសនី ដល់ឆ្នាំ ២០៣០ រាជរដ្ឋាភិបាលកម្ពុជាបានរៀបចំផែនកាអភិវឌ្ឍប្រភពអគ្គិសនីរួមមាន វារីអគ្គិសនី រោងចក្រអគ្គិសនីដើរដោយធ្យូងថ្ម និងប្រភពផ្សេងៗទៀត ដូចជា ថាមពលពន្លឺព្រះអាទិត្យ ផ្គុំជាមួយនឹងការនាំចូលប្រភពអគ្គិសនី ពីប្រទេសជិតខាង ដោយបានដាក់ឲ្យដំណើការ គម្រោងជាបន្តបន្ទាប់ តាមផែនការដែលបានគ្រោងទុក។
លើសពីនេះ អគ្គិសនីកម្ពុជា ក៏បាននិងកំពុងសិក្សាប្រភពបន្ថែមជាលក្ខណៈប្រញាប់ដទៃទៀតដែលអាចមាន ដោយរក្សាគោលការណ៍មិនឲ្យមានការដំឡើងថ្លៃអគ្គិសនី ហើយនៅតែអាចចុះថ្លៃភ្លើង ជូនពលរដ្ឋនៅឆ្នាំក្រោយថែមទៀត។
ដោយសារស្ថិរភាពនយោបាយក្រោយការបោះឆ្នោតសកលឆ្នាំ ២០១៨ និងគោលនយោបាយនៃការបញ្ចុះថ្លៃអគ្គិសនី បានធ្វើឲ្យចំនួនអ្នកប្រើប្រាស់ និងការវិនិយោគពីក្នុងនិងក្រៅប្រទេសមានកំណើនខ្ពស់។ ប៉ុន្តែចាប់ពីខែមករា អាកាសធាតុក្តៅខ្លាំង និងការខ្វះទឹកខុសប្រក្រតី ធ្វើឲ្យតម្រូវការប្រើប្រាស់ថាមពលអគ្គិសនី នៅឆ្នាំ ២០១៩ បានកើនឡើងយ៉ាងគំហុក លើសពីការរំពឹងទុក។
សេចក្តីប្រកាសបានគូសបញ្ជាក់ថា៖ «ការខ្វះទឹកនេះ ធ្វើឲ្យសមត្ថភាពផ្គត់ផ្គង់ចេញពីប្រភពវារីអគ្គិសនី ថយចុះ មិនអាចធានាដល់ការផ្គត់ផ្គង់ថាមពលអគ្គិសនី ពេញលេញទូទាំងប្រទេសដល់ចុងរដូវប្រាំងដូចសព្វមួយដង»។
សេចក្តីប្រកាសបានបន្តថា ដើម្បីដោះស្រាយបញ្ហានេះ អគ្គិសនីកម្ពុជា បានទំនាក់ទំនងប្រទេសជិតខាងឲ្យជួយបង្កើនការផ្គត់ផ្គង់អគ្គិសនីបន្ថែមដល់កម្ពុជា។ ជាលទ្ធផល ប្រទេស ថៃ បានជួយបង្កើនការផ្គត់ផ្គង់បន្ថែម ៨០MW ប្រទេសឡាវ បន្ថែម ១០MW និង ប្រទេស វៀតណាម បានជួយរក្សាការផ្គត់ផ្គង់អគ្គិសនីឲ្យនៅដដែល ទោះបីជាភាគខាងត្បូងប្រទេស វៀតណាម កំពុងជួបបញ្ហាខ្វះខាតអគ្គិសនី ប្រើប្រាស់ដូចគ្នាក្តី។
អគ្គិសនីកម្ពុជា បានគូសបញ្ជាក់នៅក្នុងសេចក្តីប្រកាសទៀតថា៖ «ទោះបីយ៉ាងនេះក៏ដោយ យើងនៅមានកង្វះថាមពលប្រមាណ ១៣% ដែលតម្រូវឲ្យអគ្គិសនីកម្ពុជា ធ្វើការកាត់បន្ថយការផ្គត់ផ្គង់ខ្លះរហូតដល់រដូវវស្សាមកដល់។ ការកាត់បន្ថយការផ្គត់ផ្គង់នេះ ធ្វើនៅពេលថ្ងៃ តាមកន្លែងឆ្លាស់គ្នា ដើម្បីរក្សាការផ្គត់ផ្គង់នៅពេលយប់ ដែលជាពេលប្រជាពលរដ្ឋត្រូវការប្រើប្រាស់ចាំបាច់»។
ជាមួយគ្នានោះ អគ្គិសនីកម្ពុជា ក៏បានគិតគូរឲ្យអស់លទ្ធភាពផ្គុំគ្នាជាមួយការជួយដំណើរការម៉ាស៊ីនភ្លើងផ្ទាល់ខ្លួន ក្នុងការផ្គត់ផ្គង់ពេលថ្ងៃ សម្រាប់ដំណើរការផ្នែកឧស្សាហកម្ម ការកិនស្រូវអង្ករ (សម្រាប់នាំចេញ) មន្ទីរពេទ្យ រដ្ឋាករទឹក ស្ថានទូតនិងស្ថាប័នរាជរដ្ឋាភិបាល។
ក្នុងរយៈពេលដែលមានការលំបាក ៧២ ថ្ងៃ រហូតចុងខែឧសភា ដោយឡែកថ្ងៃបុណ្យជាតិរួមនឹងថ្ងៃអាទិត្យ ដែលជាថ្ងៃឈប់សម្រាកការងារសរុប ២៣ ថ្ងៃអគ្គិសនីកម្ពុជានឹងរក្សាការផ្គត់ផ្គង់ឲ្យមានជាធម្មតា។ ប្រសិនបើមានភ្លៀងធ្លាក់មុនចុងខែឧសភា ការផ្គត់ផ្គង់នឹងមានជាប្រក្រតីឡើងវិញ។
អគ្គិសនីកម្ពុជា ក៏បានអំពាវនាវផងដែរដល់បងប្អូនប្រជាពលរដ្ឋទាំងអស់ មេត្តាយោគយល់ អធ្យាស្រ័យ និងជួយសន្សំសំចៃ ការប្រើប្រាស់ អគ្គិសនី ដើម្បីបន្ថយការលំបាក ដែលកំពុងជួបប្រទះក្នុងរយៈពេលអន្តរកាលនេះ។
ជាមួយគ្នានេះដែរ អគ្គិសនីកម្ពុជា ក៏បានណែនាំដល់អតិថិជនឲ្យតាមដានពិនិត្យមើលព័ត៌មានពីកម្មវិធីកាត់ចរន្តនៅតាមគេហទំព័របណ្ដាញសង្គម Facebook ផ្លូវការរបស់អគ្គិសនីកម្ពុជា «អគ្គិសនីកម្ពុជា-EDC» ឬ អាចទំនាក់ទំនងតាមរយៈលេខទូរស័ព្ទ Hotline 1298 ដែលមានក្រុមការងារអគ្គិសនីកម្ពុជា រង់ចាំបម្រើសេវា ២៤ ម៉ោងលើ ២៤ ម៉ោង៕