.jpg)
ពលរដ្ឋនៅខេត្តក្រចេះ ក្នុងពេលកំពុងព្យាបាលអាការពុល កាលពីថ្មីៗនេះ ។ រូបថត ហ្វេសប៊ុក
ភ្នំពេញៈ ក្រសួងបរិស្ថាន នៅថ្ងៃព្រហស្បតិ៍នេះ បានបង្ហាញពីការរកឃើញសារធាតុ «ហ្សានីដ» ខ្លះៗ ទាក់ទងនឹងករណីពុលដ៏ចម្រូងចម្រាសនៅខេត្ត ក្រចេះ កាលពីដើមខែនេះ ដែលអាចជាផ្នែកមួយធ្វើឲ្យពលរដ្ឋ ១៤ នាក់ស្លាប់ និង ជិត ៣០០ នាក់ទៀតធ្លាក់ខ្លួនឈឺ និង ត្រូវបានសង្គ្រោះដោយក្រុមគ្រូពេទ្យ ។
ថ្លែងក្រោយបញ្ចប់សុន្ទរកថា ក្នុងពិធីបើកសិក្ខាសាលាបណ្ដុះបណ្ដាលស្ដីពី «ការប្រែប្រួលអាកាសធាតុ សម្រាប់ថ្នាក់ដឹកនាំវ័យក្មេង និង យុវជនរាជធានីភ្នំពេញ» នៅឯសណ្ឋាគារកាំបូឌីយ៉ាណា រាជធានី ភ្នំពេញ នាព្រឹកថ្ងៃព្រហស្បតិ៍នេះ លោក ទិន ពន្លក អគ្គលេខាក្រុមប្រឹក្សាជាតិអភិវឌ្ឍន៍ដោយចីរភាពនៃក្រសួងបរិស្ថាន បានប្រាប់អ្នកសារព័ត៌មានយ៉ាងខ្លីថា ការធ្វើសំណាកឈាមលើជនរងគ្រោះដែលស្លាប់ក្នុងឧប្បទ្ទវហេតុពុល នៅខេត្តក្រចេះ កាលពី ៣ សប្ដាហ៍មុននេះ បានរកឃើញមានសារធាតុ «ហ្សានីដ» ប៉ុន្តែក្នុងកម្រិតតិចតួចបំផុត។
លោកបានបញ្ជាក់ថា៖ «ខ្ញុំមិនទាន់ហ៊ាន [អធិប្បាយរឿង] នេះទេ ប៉ុន្តែ បើតាមខ្ញុំមើលជំហានដំបូង ដូចជា គ្មានកម្រិតខ្ពស់ប៉ុន្មានទេនៅក្នុងស៊ែមផល [សំណាក] ដូចជាមាន ១-២ ទេ។ តែ ខ្ញុំសូមអធ្យាស្រ័យ ការងារហ្នឹងប្រហែលជានៅក្នុងកម្រិតជំនាញ គាត់ត្រូវបកស្រាយទៀត។ លទ្ធផលដំបូងនេះ គឺគ្រាន់តែប្រាប់យើងថា កម្រិតណាៗទេ តែការបកស្រាយធៀបជាមួយស្តង់ដារជាតិ ស្ដង់ដារយើងហ្នឹង គឺជារឿងមួយផ្សេងទៀត ដើម្បីពន្យល់ថា កម្រិតគ្រោះថ្នាក់ហ្នឹងវាប៉ុនណា និង ដើម្បីត្រូវចាត់វិធានអីទៀត»៕
