កំពង់ចាមៈ ខណៈយុទ្ធនាការកាត់បន្ថយគ្រោះថ្នាក់ចរាចរណ៍ និងពិនិត្យការប្រើប្រាស់គ្រឿងស្រវឹងនៅលើផ្លូវកំពុងបន្ត នគរបាលខេត្តកំពង់ចាមបានបញ្ឈប់អ្នកបើកបររថយន្តដឹកជញ្ជូនចំនួន ៦៤៨ នាក់ និងសហការីរបស់ពួកគេដែលក្នុងនោះ ៩៥ នាក់ត្រូវបានធ្វើតេស្តឃើញមានសារជាតិគ្រឿងញៀនចាប់តាំងពីខែឧសភាមក។
កាលពីថ្ងៃអង្គារអ្នកបើកបររថយន្តដឹកជញ្ជូនចំនួន ១៦៧ នាក់ ព្រូ និងកម្មកររថយន្តរបស់ពួកគេរួមជាមួយនឹងរថយន្តដឹកជញ្ជូនចំនួន ៧៦ គ្រឿងត្រូវបានបញ្ឈប់ដើម្បីពិនិត្យ ហើយ ២០ នាក់ក្នុងចំណោមពួកគេត្រូវបានធ្វើតេស្តឃើញមានសារជាតិគ្រឿងញៀនវិជ្ជមាន។
អ្នកទាំង ២០ នាក់នោះមានវ័យជាង ៣០ ឆ្នាំដែលរួមមានអ្នកបើករថយន្ត ៧ នាក់ ព្រូ ៥ នាក់ និងកម្មករ ៨ នាក់។
លោក អ៊ិត ដារ៉ា ស្នងការរងនគរបាលបានថ្លែងថាពួកគេបានចាប់ផ្តើមយុទ្ធនាការពិនិត្យអ្នកបើកបរប្រើប្រាស់គ្រឿងញៀន ដើម្បីកាត់បន្ថយគ្រោះថ្នាក់ចរាចរណ៍នៅលើដងផ្លូវចាប់តាំងពីខែឧសភាឆ្នាំនេះដោយមានគោលការណ៍ណែនាំពីអាជ្ញាធរខេត្ត។
លោកបានថ្លែងថា៖ «យើងបានពិនិត្យមនុស្សប្រុស ១៦៧ នាក់។ យើងពិនិត្យតែរថយន្តដឹកជញ្ជូនដើម្បីកាត់បន្ថយគ្រោះថ្នាក់ចរាចរណ៍»។ លោកបានបន្ថែមថាពួកគេកំពុងរៀបចំឯកសារដើម្បីបញ្ជូនបុរសទាំងនោះទៅតុលាការ។
លោក ដារ៉ា បានបន្ថែមថាវាជាលើកទី ៥ ហើយដែលពួកគេបានពិនិត្យ ហើយ ៩៥ នាក់ក្នុងចំណោមបុរស ៦៤៨ នាក់ត្រូវបានធ្វើតេស្តរកឃើញប្រើប្រាស់គ្រឿងញៀនវិជ្ជមាននៅក្នុងស្រុកជើងព្រៃ ស្រុកបាធាយ និងស្រុកកំពង់សៀម ក្នុងខេត្តកំពង់ចាម។
លោកបានបន្តថា៖ «គោលបំណងនៃយុទ្ធនាការនេះគឺដើម្បីកាត់បន្ថយការប្រើប្រាស់គ្រឿងញៀន និងដើម្បីកាត់បន្ថយគ្រោះថ្នាក់ចរាចរណ៍នៅលើដងផ្លូវ»។
លោក ដារ៉ា បានគូសបញ្ជាក់អំពីគ្រោះថ្នាក់គួរឲ្យខ្លាចដែលបង្កឡើងដោយអ្នកបើកបរក្រោមឥទ្ធិពលគ្រឿងញៀន។ គាត់បានបើករថយន្តចុះពីស្ពាន ហើយបុកផ្ទះមួយកាលពីខែឧសភា។
លោកបានថ្លែងថា៖ «អ្នកបើកបរបានបើកចុះពីស្ពាន ហើយបុកផ្ទះតែម្តង បន្ទាប់មកយើងបានរកឃើញគ្រឿងញៀនចំនួន ២ ថង់។ គាត់ដឹកទំនិញ ប៉ុន្តែយើងបានរកឃើញគ្រឿងញៀន ហើយគាត់ត្រូវបានធ្វើតេស្តរកឃើញប្រើប្រាស់គ្រឿងញៀនវិជ្ជមាន»។
លោក រុន រ័ត្នវាសនា ប្រធាននាយកដ្ឋានសណ្តាប់ធ្នាប់សាធារណៈក្រសួងមហាផ្ទៃបានថ្លែងថា ការពិនិត្យគ្រឿងញៀន និងគ្រឿងស្រវឹងនៅលើដងផ្លូវជារៀងរាល់ថ្ងៃគឺជាការងារចម្បងរបស់នគរបាលដើម្បីកាត់បន្ថយគ្រោះថ្នាក់ចរាចរណ៍ និងការប្រើប្រាស់គ្រឿងញៀន។
លោកបានថ្លែងថា៖ «ចំពោះរថយន្តដឹកជញ្ជូននៅពេលយប់ អ្នកបើកបរបានប្រើប្រាស់វាជាញឹកញាប់ ហើយនៅពេលពួកគេប្រើជ្រុល ពួកគេមានទំនោរបំពានលើអ្នកដទៃដែលបើកបរនៅលើដងផ្លូវដូចគ្នា»។
លោកបានអះអាងថា៖ «នៅពេលពួកគេប្រើប្រាស់គ្រឿងញៀន ពួកគេមិនអាចគ្រប់គ្រងអារម្មណ៍របស់ខ្លួនបាន។ យើងពិនិត្យវា ប៉ុន្តែវានៅតែជាក្តីបារម្ភរបស់យើងថាអ្នកបើកបរកំពុងប្រើប្រាស់គ្រឿងញៀន ខណៈកំពុងប្រើប្រាស់ផ្លូវ ហើយការផ្តោតរបស់យើងមិនមានសមត្ថភាពទៅគ្រប់ដងផ្លូវនោះទេ»។
លោក អៀរ ចរិយា នាយកវិទ្យាស្ថានសុវត្ថិភាពចរាចរណ៍ផ្លូវគោកបានថ្លែងថា នៅពេលអ្នកបើកបរប្រើប្រាស់គ្រឿងញៀនវាធ្វើឲ្យគាត់មិនអាចគ្រប់គ្រងអារម្មណ៍របស់ខ្លួនបាន ដោយសារគ្រឿងញៀនគឺដូចគ្រឿងស្រវឹងដែរ។
លោកបានបន្តថា៖ «យើងក៏បានចែងច្បាប់ផងដែរថា អ្នកប្រើប្រាស់គ្រឿងញៀនមិនត្រូវបានអនុញ្ញាតឲ្យបើកបរទេ។ ប្រសិនបើគាត់ប្រើប្រាស់គ្រឿងញៀន គាត់មិនអាចប្រើប្រាស់ផ្លូវថ្នល់ប្រកបដោយសុវត្ថិភាពទេ»។
លោកថារដ្ឋាភិបាលក៏គួរពិនិត្យផងដែរទៅលើអ្នកបើកបររថយន្តដឹកកម្មករកាត់ដេរដោយសាររាល់ករណីគ្រោះថ្នាក់ចរាចរណ៍ជាមួយកម្មករតែងតែពាក់ព័ន្ធជាមួយកម្មករ និងមានរបួសជាច្រើន។
លោក សួន វ៉ាន់ហុង អគ្គនាយករងនៃអគ្គនាយកដ្ឋានដឹកជញ្ជូនក្រសួងការធារណការ និងដឹកជញ្ជូនបានថ្លែងថាយានយន្តប្រមាណ ៦០ ម៉ឺនគ្រឿងត្រូវបានចុះបញ្ជីនៅក្រសួងលោកដែលរួមមានរថយន្តក្រុង រថយន្តភីកអាប់ និងរថយន្តដឹកជញ្ជូនជាដើម។
លោក មាស វីរិទ្ធ អ្នកនាំពាក្យអាជ្ញាធរជាតិប្រយុទ្ធប្រឆាំងគ្រឿងញៀនបានថ្លែងថា ពួកគេនៅបន្តយុទ្ធនាការប្រយុទ្ធប្រឆាំងគ្រឿងញៀនរបស់ខ្លួន។
លោកបានថ្លែងថាច្បាប់ចែងរួចហើយថា ការប្រើប្រាស់គ្រឿងញៀនក៏ផ្តល់ទុក្ខទោសដល់អ្នកបើកបរលើដងផ្លូវផងដែរ។
លោកបានបន្តថា៖ «នៅក្នុងយុទ្ធនាការរបស់យើង យើងក៏ធ្វើវាផងដែរ។ ដំបូងយើងបានណែនាំទៅក្រុមហ៊ុនដឹកជញ្ជូនទាំងអស់រួចហើយ ឲ្យចូលរួមនៅក្នុងសកម្មភាពរបស់យើង។ ពួកគេពិនិត្យទៅលើបុគ្គលិករបស់ខ្លួននៅក្នុងក្រុមហ៊ុនដឹកជញ្ជូនរបស់ពួកគេដោយសារយើងគិតថា អ្នកដែលធ្វើការពេលយប់ អាចធ្លាក់ចូលទៅក្នុងការប្រើប្រាស់គ្រឿងញៀនហើយពេលខ្លះពួកគេប្រើប្រាស់ជ្រុលវាបង្កឲ្យមានបញ្ហា»។
លោកបានថ្លែងថាផ្នែកនៃយុទ្ធនាការនេះពួកគេក៏បានជួបជាមួយតំណាងក្រុមហ៊ុនទាំងនោះដើម្បីកាត់បន្ថយការប្រើប្រាស់គ្រឿងញៀន និងបញ្ឈប់ការជួញដូរគ្រឿងញៀន។
លោកបានបន្តថា៖ «យើងបានប្រាប់ពួកគេឲ្យពិនិត្យ និងបានអញ្ជើញពួកគេឲ្យស្តាប់ការណែនាំរបស់យើង។ យើងព្យាយាមកំណត់អត្តសញ្ញាណអ្នកដែលទំនងជាប្រើប្រាស់គ្រឿងញៀន ហើយយើងបានធ្វើការពិនិត្យទឹកនោមទូទាំងប្រទេស»៕ PS