.jpg)
សកម្មភាពចូលអានសៀវភៅក្នុងបណ្ណាល័យជាតិកាលពីកន្លងទៅ។ ហុង មិនា
ភ្នំពេញៈ ក្រសួងអប់រំ យុវជន និងកីឡាប្រកាសថា គិតត្រឹមសប្តាហ៍ទី ១ ខែឧសភានេះ គឺមានសៀវភៅសិក្សាជាង ៨០០ ចំណងជើង ត្រូវបានសម្រេចឱ្យគ្រឹះស្ថានឧត្ដមសិក្សារៀបរៀង និពន្ធ និងកែលម្អក្នុងចំណោមសំណើជាង ១ ពាន់ចំណងជើង តាមរយៈមូលនិធិស្រាវជ្រាវគំនិតច្នៃប្រឌិត និងនវានុវត្តន៍ (មូលនិធិ ស.គ.ន) បន្ទាប់ពីក្រសួងបានប្រកាសឱ្យមានការចូលរួមកាលពីខែតុលា ឆ្នាំមុន។
តាមសេចក្ដីប្រកាសព័ត៌មានរបស់ក្រសួងអប់រំ យុវជន និងកីឡាកាលពីម្សិលមិញ តួលេខ «សៀវភៅសិក្សាលើសពី ១ ០០០ ចំណងជើង» ដែលបានស្នើឡើងនេះ បានបង្កើតជាបរិយាកាសគួរជាទីមោទនៈសម្រាប់និស្សិត និងអ្នកស្រាវជ្រាវកម្ពុជាដែលមានបំណងប្រាថ្នាដ៏ថ្លៃថ្លាក្នុងការទទួលបានសៀវភៅសិក្សានៅកម្រិតឧត្តមសិក្សា «មុខវិជ្ជា ១ ត្រូវមានសៀវភៅសិក្សា ១ ក្បាល»។
ក្រសួងអប់រំបញ្ជាក់ថា គិតត្រឹមសប្តាហ៍ទី១ ខែឧសភានេះ មានគ្រឹះស្ថានឧត្តមសិក្សារដ្ឋ និងឯកជនចំនួន ១៩ បានដាក់ពាក្យស្នើសុំអនុវត្តថវិកាស្រាវជ្រាវ ដើម្បីអភិវឌ្ឍន៍សម្រាប់ការរៀបរៀង និពន្ធ និងកែលម្អសៀវភៅសិក្សាសរុបចំនួន ១ ០៨៨ ចំណងជើង។
បន្ទាប់មកសាស្ត្រាចារ្យ និងអ្នកស្រាវជ្រាវ ដែលជាម្ចាស់ស្នាដៃបានដាក់ជូនក្រុមប្រឹក្សាវិទ្យាសាស្ត្រ ឬក្រុមប្រឹក្សាអប់រំនៃគ្រឹះស្ថានឧត្តមសិក្សាត្រួតពិនិត្យ និងវាយតម្លៃទៅលើខ្លឹមសារនៃ ១- សេចក្តីព្រាងមាតិកានៃសៀវភៅ ២-ការបរិយាយលើមុខវិជ្ជា (Course description) និង ៣- សេចក្តីសង្ខេបនៃសៀវភៅ (Synopsis ឬ Abstract) រួមជាមួយការអនុម័តពីគណៈគ្រប់គ្រងនៃគ្រឹះស្ថានឧត្តមសិក្សានីមួយៗដែលជាលទ្ធផលគឺមានសៀវភៅចំនួន ៨៨៧ ចំណងជើងត្រូវបានអនុម័ត។
បន្ទាប់មកមូលនិធិ ស.គ.ន បានពិនិត្យជាបន្ត និងសម្រេចផ្តល់ថវិកាសម្រាប់ដំណើរការរៀបរៀងនិពន្ធ និងកែលម្អសៀវភៅសិក្សាចំនួន ៨២៤ ចំណងជើងនៃគ្រឹះស្ថានឧត្ដមសិក្សាទាំង ១៩ ដែលបានស្នើសុំថវិកា។ នេះបើតាមការបញ្ជាក់នៅក្នុងសេចក្ដីប្រកាសព័ត៌មាន។
ជាមួយគ្នានេះ ក្រសួងអប់រំបានរំឭកជាថ្មីដល់សិស្សដែលមានបំណងបន្តការសិក្សានៅកម្រិតឧត្តមសិក្សាថា ភាពសម្បូរបែបនៃសៀវភៅសិក្សា និងធនធានសិក្សាគឺជាផ្នែកមួយដ៏សំខាន់នៃក្របខ័ណ្ឌវាយតម្លៃគុណភាពអប់រំរបស់គ្រឹះស្ថានឧត្តមសិក្សា។ ក្នុងន័យនេះលោក ហង់ជួន ណារ៉ុន រដ្ឋមន្ត្រីក្រសួងអប់រំបានថ្លែងថា៖ «សៀវភៅកំណត់ចំណេះដឹង ចំណេះដឹងកំណត់ការអប់រំ ការអប់រំកំណត់ការអភិវឌ្ឍ បើគ្មានសៀវភៅ គ្មានទេការអភិវឌ្ឍ»។
ក្រសួងបញ្ជាក់ថា សៀវភៅសិក្សាជាផ្នែកមួយនៃការទទួលស្គាល់គុណភាពអប់រំនៃគ្រឹះស្ថានឧត្តមសិក្សា និងជាធនធានសិក្សាជាមូលដ្ឋានមួយដ៏សំខាន់ក្នុងការគាំទ្រដល់ការបង្រៀន និងរៀន ហើយត្រូវមានបរិមាណគ្រប់គ្រាន់ឆ្លើយតបទៅនឹងកម្មវិធីអប់រំ និងតម្រូវការសិក្សាស្រាវជ្រាវ។
បើតាមក្រសួងអប់រំ ជាគោលការណ៍ គ្រឹះស្ថានឧត្តមសិក្សាត្រូវមានសៀវភៅសិក្សាដែលប្រើជាគោលសម្រាប់មុខវិជ្ជានីមួយៗ។ ចំនួនសៀវភៅសម្រាប់សិក្សាត្រូវមានយ៉ាងតិច ១ ចំណងជើងក្នុង ១ មុខវិជ្ជាហើយត្រូវតម្កល់យ៉ាងតិច ២ ច្បាប់ក្នុងបណ្ណាល័យ ឬអាចរកបានតាមប្រព័ន្ធអេឡិចត្រូនិក។
លោក រស់ សុវាចា អ្នកនាំពាក្យក្រសួងអប់រំបានថ្លែងថា៖ «ការរៀបរៀងសៀវភៅរាប់ពាន់ក្បាលនេះបង្ហាញពីការបន្តលើកកម្ពស់គុណភាពការអប់រំកម្រិតឧត្ដមសិក្សាតាមរយ:ការពង្រឹង និងពង្រីកធនធានសិក្សាស្រាវជ្រាវសម្រាប់អ្នកសិក្សា និងអ្នកស្រាវជ្រាវក៏ដូចជា ការផ្តល់ឱកាសជូនអ្នកស្រាវជ្រាវ និពន្ធក្នុងន័យចូលរួមបង្កើនផលិតស្នាដៃថ្មីៗសម្រាប់អ្នកសិក្សា និងបុគ្គលិកអប់រំ»។
មូលនិធិ ស.គ.ន.នៃក្រសួងអប់រំត្រូវបានបង្កើតឡើងក្រោមគំនិតផ្តួចផ្តើមពីក្រសួងសេដ្ឋកិច្ច និងហិរញ្ញវត្ថុ និងក្រសួងអប់រំ ដើម្បីរួមចំណែកលើកកម្ពស់វប្បធម៌នៃការស្រាវជ្រាវ បំផុសគំនិតច្នៃប្រឌិត និងជំរុញការធ្វើនវានុវត្តន៍ វិស័យអប់រំដែលឆ្លើយតបនឹងទីផ្សារពលកម្ម និងសកលភាវូបនីយកម្ម។
ការរៀបរៀង និពន្ធ និងកែលម្អ សៀវភៅសិក្សា (Textbook) ដែលនឹងត្រូវប្រើប្រាស់នៅកម្រិតឧត្តមសិក្សាជាអាទិភាពនៃការប្រើប្រាស់ថវិកាមូលនិធិសម្រាប់ឆ្នាំ ២០២០។
ទាក់ទងនឹងការងារនេះ ក្រសួងអប់រំបានបន្ដលើកទឹកចិត្តដល់សាស្ត្រាចារ្យ អ្នកនិពន្ធ និងអ្នកស្រាវជ្រាវនៅតាមគ្រឹះស្ថានសិក្សាឱ្យបន្តចូលរួមក្នុងគម្រោងនេះក្នុងស្មារតីជំរុញឱ្យសៀវភៅសិក្សាមានបរិមាណគ្រប់គ្រាន់ មានគុណភាពខ្ពស់ និងមានសមធម៌។
ចំពោះគ្រឹះស្ថានឧត្តមសិក្សាដែលនៅពុំទាន់បានដាក់ពាក្យស្នើសុំថវិកាមូលនិធិ ឬមានបំណងទទួលព័ត៌មានបន្ថែមស្តីពីដំណើរការ និងនីតិវិធីនៃការស្នើសុំថវិកាសម្រាប់ការរៀបរៀងសៀវភៅនៅកម្រិតឧត្តមសិក្សាអាចផ្ញើលិខិតមកកាន់អ៊ីមែល event@moeys.gov៕
