.jpg)
តំណាងរាស្ត្រអតីតគណបក្សសង្រ្គោះជាតិ ពេលត្រូវក្រុមអង្គរក្សវាយ កាលពីឆ្នាំ ២០១៥។
ភ្នំពេញៈ ក្រុមមេធាវីការពារអតីតតំណាងរាស្ត្រនៃអតីតគណបក្សសង្គ្រោះជាតិ ដែលត្រូវក្រុមអង្គរក្សលោកនាយករដ្ឋមន្ត្រី ហ៊ុន សែន វាយឲ្យរងរបួសកាលពីឆ្នាំ ២០១៥ បានដាក់បណ្ដឹងសារទុក្ខទៅតុលាការកំពូលប្រឆាំងនឹងសាលក្រមតុលាការជាន់ទាបដែលផ្តល់សំណងតិចតួចដល់ជនរងគ្រោះ។
លោក កែត ឃី មេធាវីម្នាក់ដែលការពារអតីតតំណាងរាស្ត្រនៃអតីតគណបក្សសង្គ្រោះជាតិ ២ រូបគឺលោក ញ៉យ ចំរើន និងលោក គង់ សភា បានថ្លែងកាលពីម្សិលមិញថា៖ «ខ្ញុំ និងមេធាវីតំណាងផ្សេងទៀតបានដាក់ពាក្យបណ្តឹងទៅតុលាការកំពូលហើយកាលពីពេលថ្មីៗនេះដើម្បីប្រឆាំងនឹងការសម្រេចទាំងស្រុងរបស់សាលាដំបូងរាជធានីភ្នំពេញ និងសាលដីការបស់សាលាឧទ្ធរណ៍»។
លោក ឃី បានអះអាងថា៖ «ដោយសារតែការកាត់ហ្នឹងវាអត់សមល្មមនឹងសំណើដែលគាត់ទាមទារ។ កាលដែលគាត់រងគ្រោះទំហំនៃការអន្តរាយវាច្រើន។ យើងបានជម្រាបតុលាការហើយថា គ្រាន់តែឡានគាត់ខូចនោះឡាននីមួយៗសុទ្ធតែអស់ជាង ១ ម៉ឺនហើយឡាន ២ គ្រឿងវាអស់ជាង ២ ម៉ឺន។ តែពេលគេកាត់ឲ្យសង ឲ្យសងតែ ១ ម៉ឺន (សម្រាប់ជនរងគ្រោះម្នាក់) ស្មើនឹង ៤០ លានរៀល។ ហើយគាត់មើលជំងឺអស់ច្រើនជាងយើងបានដាក់វិក្កយប័ត្រទៅ។ ប៉ុន្តែសំណងវាតិចមិនធន់ល្មមនឹងអ្វីដែលគាត់អន្តរាយទៅដោយសារតែជននោះបង្ក»។
កាលពីថ្ងៃទី ២៦ ខែតុលា ឆ្នាំ ២០១៥ មានបាតុកម្មមួយរបស់អ្នកគាំទ្រលោកនាយករដ្ឋមន្ត្រី ហ៊ុន សែន ដើម្បីទាមទារទម្លាក់លោក កឹម សុខា ពីអនុប្រធានទី ១ នៃរដ្ឋសភា។
បាតុកម្មនេះកើតមានក្រោយពេលមានបាតុកម្មប្រឆាំងនឹងលោក ហ៊ុន សែន នៅប្រទេសបារាំងនៅខែតុលា ២០១៥។ ក្រោយពេលបាតុករបានរំសាយ សមាជិកសភា ២ រូបពីគណបក្សប្រឆាំងគឺលោក ញ៉យ ចំរើន និងលោក គង់ សភា ត្រូវបានបាតុកររុំមុខអូសទាញចេញពីឡានហើយវាយតប់បណ្ដាលឲ្យរងរបួសយ៉ាងដំណំ។ ក្រោយមកមនុស្ស ៣ នាក់ដែលបម្រើការនៅបញ្ជាការដ្ឋានអង្គរក្សលោកនាយករដ្ឋមន្ត្រីត្រូវចាប់ខ្លួនក្រោយពេលចូលសារភាព។
នៅខែឧសភា ឆ្នាំ ២០១៦ តុលាការក្រុងភ្នំពេញបានកាត់ទោសជនជាប់ចោទទាំង ៣ នាក់គឺ ចាយ សារិទ្ធ លោក ម៉ៅ ហឿន និងលោក សុត វណ្ណនី ពីបទហិង្សាដោយចេតនាមានស្ថានទម្ងន់ទោសហើយផ្តន្ទាទោសពួកគេដាក់ពន្ធនាគារ ៤ ឆ្នាំ តែអនុវត្តទោសតែ ១ ឆ្នាំ ហើយ ៣ ឆ្នាំទៀតត្រូវបានព្យួរ។ សាលក្រមក៏តម្រូវឲ្យជនទាំង ៣ បង់ប្រាក់ពិន័យ ៦ លានរៀលចូលថវិការដ្ឋក្នុងម្នាក់ៗ និងរួមគ្នាសងសំណងរដ្ឋប្បវេណីចំនួន ៨០ លានរៀលដល់ជនរងគ្រោះ។ សាលក្រមនេះត្រូវបានសាលាឧទ្ធរណ៍តម្កល់ទុកជាបានការកាលពីថ្ងៃទី ១១ មិថុនា ២០១៨។
លោក ឃី ថ្លែងថា៖ «យើងដើមបណ្ដឹងរដ្ឋប្បវេណីគឺមានសិទ្ធិត្រឹមតែទារសំណងរដ្ឋប្បវេណីដែលមិនសមល្មមនឹងការខូចខាត យើងមិនអាចប្តឹងរឿងទណ្ឌកម្មបានទេ»៕
