.jpg)
លោក ផាន អូន អគ្គនាយក ក.ប.ប. ក្នុងកិច្ចប្រជុំជាមួយមន្ត្រីថ្ងៃទី ២៦ ឧសភា។ រូប សហការី
ភ្នំពេញៈ ក្រសួងពាណិជ្ជកម្មតាមរយៈអគ្គនាយកដ្ឋានការពារអ្នកប្រើប្រាស់ កិច្ចការប្រកួតប្រជែង និងបង្ក្រាបការក្លែងបន្លំ (ក.ប.ប.) នៅសប្ដាហ៍ទី ២ ខែមិថុនា ខាងមុខនឹងប្រាប់ឲ្យបណ្ដាក្រុមហ៊ុនធ្វើស្ប៉តផ្សព្វផ្សាយពាណិជ្ជកម្មទាំងអស់មកបំភ្លឺពាក់ព័ន្ធទៅនឹងការផ្សាយពាណិជ្ជកម្មផ្ដល់រង្វាន់ដែលអាចមានការភូតកុហក និងបោកប្រាស់។ នេះបើតាមមន្ត្រីជាន់ខ្ពស់នៃស្ថាប័ននេះប្រាប់ពីម្សិលមិញ។
លោក ផាន អូន អគ្គនាយកនៃអគ្គនាយកដ្ឋាន ក.ប.ប. នៃក្រសួងពាណិជ្ជកម្ម ថ្លែងថាកាលពីថ្ងៃទី ២៦ ឧសភា ក្រោយទទួលបានការផ្ដល់ភារកិច្ចពីលោក ប៉ាន សូរស័ក្តិ រដ្ឋមន្ត្រីក្រសួងពាណិជ្ជកម្មប្រាប់ឲ្យពង្រឹងការអនុវត្តច្បាប់ និងពិនិត្យករណីពាក់ព័ន្ធទៅនឹងការផ្សាយពាណិជ្ជកម្មផ្ដល់រង្វាន់ដែលអាចមានការភូតកុហក និងបោកប្រាស់ អគ្គនាយកដ្ឋាន ក.ប.ប. បានបើកកិច្ចប្រជុំជាមួយមន្ដ្រីជំនាញស្តីអំពីការត្រួតពិនិត្យលើស្ប៉តពាណិជ្ជកម្ម។ ព្រោះស្ប៉តពាណិជ្ជកម្មនោះមានការភូតកុហក បោកប្រាស់សេចក្តីទុកចិត្តរបស់អ្នកប្រើប្រាស់នេះម្ដងរួចហើយ។
លោកថ្លែងថា៖ «ឯកឧត្តមរដ្ឋមន្ដ្រីបានផ្ដល់ភារកិច្ចឲ្យអគ្គនាយកដ្ឋាន ក.ប.ប. ពង្រឹងការអនុវត្តច្បាប់ (ច្បាប់ស្តីពីការគ្រប់គ្រងគុណភាព សុវត្ថិភាពលើផលិតផល ទំនិញ និងសេវា និងច្បាប់ស្តីពីកិច្ចការពារអ្នកប្រើប្រាស់) ពាក់ព័ន្ធនឹងការផ្តល់រង្វាន់ដែលអាចមានការភូតកុហក និងមានការបោកប្រាស់»។
លោកបញ្ជាក់ថា៖ «ផែនការរបស់អគ្គនាយកដ្ឋាន ក.ប.ប. គ្រោងនឹងអញ្ជើញបណ្តាក្រុមហ៊ុនដែលមានស្ប៉តផ្សាយមកបំភ្លឺនៅសប្តាហ៍ទី ២ នៃខែមិថុនា ខាងមុខនេះ។ ត្រង់ថាស្ប៉តប្រភេទណាខ្លះដែលមានការភូតកុហក និងមានការបោកប្រាស់ យើងមិនទាន់អាចសន្និដ្ឋានបាននៅឡើយ រង់ចាំ ការបំភ្លឺ និងការបង្ហាញឯកសារពាក់ព័ន្ធពីក្រុមហ៊ុនជាមុនសិន»។
លោក យង់ គិមអេង នាយកប្រតិបត្តិមជ្ឈមណ្ឌលប្រជាពលរដ្ឋ ដើម្បីការអភិវឌ្ឍ និងសន្តិភាព (PDP-Center) សម្ដែងការសោកស្ដាយចំពោះការផ្សាយពាណិជ្ជកម្មផ្ដល់រង្វាន់ដែលអាចមានការភូតកុហក និងបោកប្រាស់ប្រជាពលរដ្ឋពីក្រុមហ៊ុនផលិតស្ប៉តផ្សព្វផ្សាយបែបនេះ។ លោកថាកន្លងមក PDP-Center ក៏ធ្លាប់បានស្នើរាជរដ្ឋាភិបាលឲ្យពន្លឿនការធ្វើសេចក្ដីព្រាងច្បាប់ពាក់ព័ន្ធទៅនឹងការគ្រប់គ្រងការផ្សាយពាណិជ្ជកម្មបែបនេះ។
លោកថ្លែងថា៖ «ប៉ុន្ដែការផ្សព្វផ្សាយដែលគ្រោះថ្នាក់បំផុតនោះគឺការផ្សព្វផ្សាយពាណិជ្ជកម្មគ្រឿងស្រវឹងយ៉ាងផុសផុល និងដោយសេរីនៅប្រទេសកម្ពុជានេះតែម្តង ដែលគួរតែដាក់កម្រិតឲ្យបានតឹងរ៉ឹង។ ផលិតផលគ្រឿងស្រវឹងនេះបានបង្កផលប៉ះពាល់ខ្លាំងទៅដល់សង្គមជាតិ និងសុខភាពប្រជាពលរដ្ឋដែលបញ្ហានេះគឺជារឿងសំខាន់ដែលរាជរដ្ឋាភិបាលគួរតែយកចិត្ដទុកដាក់ និងពន្លឿនការអនុវត្ដច្បាប់ឲ្យបានឆាប់»។
លោកលើកឡើងថា ពាក់ព័ន្ធទៅនឹងការផ្សាយពាណិជ្ជកម្មផ្ដល់រង្វាន់ដែលអាចមានការភូតកុហក និងបោកប្រាស់នេះគ្រាន់តែជាផ្នែកតូចមួយ។ ប៉ុន្ដែការផ្សព្វផ្សាយពាណិជ្ជកម្មផលិតផលប្រកបដោយគ្រោះថ្នាក់ ដូចជាគ្រឿងស្រវឹងជាដើម រដ្ឋាភិបាលគួរតែប្រកាសជំហរបញ្ឈប់ការលើកទឹកចិត្ដឲ្យផ្សព្វផ្សាយបន្តទៀត។ លោកថា បញ្ហាជាច្រើនក្នុងសង្គមដោយសារការផ្សព្វផ្សាយពីគ្រឿងស្រវឹងនោះដូចជា បញ្ហាគ្រឿងញៀន គ្រោះថ្នាក់ចរាចរណ៍អំពើហិង្សាក្នុងគ្រួសារ និងការរំលោភបំពានផ្លូវភេទជាដើម៕
វីដេអូ៖
