ខេមបូឌា អ៊ែរវ៉េ នឹងចាប់ផ្តើមបើកជើងហោះហើរអន្តរជាតិដំបូងរបស់ខ្លួនដោយឆ្ពោះត្រង់ពីរាជធានីភ្នំពេញ ទៅកាន់ទីក្រុង ម៉ាកាវ នៅថ្ងៃអាទិត្យ ទី២២ ខែកក្កដា ឆ្នាំ ២០១៨។ ដើម្បីធ្វើឲ្យប្រតិបត្តិការហោះហើរអន្តរជាតិនេះប្រព្រឹត្តទៅដោយមានភាពជោគជ័យ និងមានភាពងាយស្រួល ខេមបូឌា អ៊ែរវ៉ែ នឹងចាប់ផ្តើមសេវាហោះហើររបស់ខ្លួនទៅកាន់ទីក្រុង ម៉ាកាវ ចំនួន ៤ ដង ក្នុងមួយសប្តាហ៍ ពោលគឺរៀងរាល់ថ្ងៃអង្គារ ពុធ សុក្រ និងអាទិត្យ។
ជើងហោះហើរអន្តរជាតិដំបូងរបស់ ខេមបូឌា អ៊ែរវេ KR511 នឹងធ្វើការហោះហើរនៅម៉ោង ១០:៤៥ នាទីពីអាកាសយានដ្ឋានអន្តរជាតិភ្នំពេញ ហើយនឹងធ្វើការចុះចតនៅព្រលានយន្តហោះអន្តរជាតិនៅទីក្រុង ម៉ាកាវ វេលាម៉ោង ១៤:០៥ នាទី។ ជើងហោះហើរ KR512 នេះ នឹងធ្វើការហោះហើរត្រឡប់មកពីទីក្រុង ម៉ាកាវ វិញ នៅវេលាម៉ោង ២១:៤០ នាទីយប់ហើយនឹងចុះចតនៅព្រលានយន្តហោះអន្តរជាតិភ្នំពេញ នៅវេលាម៉ោង ២៣:២៥ នាទីយប់។
ខេមបូឌា អ៊ែរវ៉េ សម្រេចធ្វើការហោះហើរទៅទីក្រុង ម៉ាកាវ ដោយសារ ខេមបូឌា អ៊ែវវ៉េ ក៏មានទីផ្សារគាំទ្រពីភ្នាក់ងារទេសចរណ៍ជាដៃគូរួមជាមួយនឹងតម្រូវការជាច្រើនពីទីនោះផងដែរ។ ភាគច្រើន ភ្ញៀវទេសចរ ជាជនជាតិចិនដែលមកពីតាមបណ្តាទីក្រុង និងខេត្តផ្សេងៗនៃប្រទេសចិន ឆ្លងកាត់តាមទីក្រុង ម៉ាកាវ មុននឹងពួកគាត់ធ្វើដំណើរមកកាន់ប្រទេសកម្ពុជា។
ដោយហេតុនេះហើយទើប ខេមបូឌា អ៊ែរវ៉េ សម្រេចជ្រើសរើសការហោះហើរអន្តរជាតិដំបូងទៅកាន់ទីក្រុងមួយនេះ។ ក្រៅពីការបើកឲ្យមានដំណើរការហោះហើរទៅទីក្រុង ម៉ាកាវ នេះហើយ ខេមបូឌា អ៊ែរវ៉េ នឹងចាប់ផ្តើមបន្តការហោះឆ្ពោះទៅកាន់ទីក្រុង ហុងកុង តៃវ៉ាន់ កូរ៉េខាងត្បូង ជប៉ុន រួមទាំងប្រទេស ចិន និងបណ្តាប្រទេសក្នុងតំបន់អាស៊ីអាគ្នេយ៍ដែលមានដូចជា ប្រទេសថៃ សិង្ហបុរី ហ្វីលីពីន ផងដែរ។
ចំពោះគម្រោងបន្ទាប់ក្រុមហ៊ុននឹងពង្រីកជើងហោះហើរឲ្យកាន់តែទូលំទូលាយ ទៅកាន់ប្រទេសខាងបែកអឺរ៉ុប និងប្រទេស អូស្ត្រាលី។
បន្ថែមពីលើចំណុចនេះថ្នាក់ដឹកនាំនៃប្រទេស កម្ពុជា និង ម៉ាកាវ ក៏ធ្លាប់បានជួបពិភាក្សាគ្នាកាលពីប៉ុន្មានខែកន្លងទៅអំពីការពង្រីកសហប្រតិបត្តិការក្នុងវិស័យទេសចរណ៍ និងពាណិជ្ជកម្មរវាងប្រទេស កម្ពុជា និងទីក្រុង ម៉ាកាវ នៃប្រទេស ចិន ព្រមទាំងលើកទឹកចិត្តដល់ការវិនិយាគ លើវីស័យអាកាសចរណ៍ឲ្យមានការហោះហើរត្រង់រវាងទីក្រុង ម៉ាកាវ និងប្រទេសកម្ពុជា។
ខេមបូឌា អ៊ែរវ៉េ សង្ឃឹមថា ការហោះហើរអន្តរជាតិលើកដំបូងនេះ នឹងជួយជំរុញដល់ការអភិវឌ្ឍរបស់ប្រទេសកម្ពុជា មិនថាបច្ចុប្បន្ន និងទៅថ្ងៃអនាគត ព្រោះថា កម្ពុជាមានតំបន់ទេសចរណ៍ ដែលមានភាពទាក់ទាញទាំងចំពោះភ្ញៀវជាតិ និងអន្តរជាតិ និងមានធនធានធម្មជាតិដ៏សម្បូរបែប ក៏ដូចជា វប្បធម៌ជាតិ និងតំបន់បុរេប្រវត្តិសាស្ត្រគួរឲ្យចាប់អារម្មណ៍ជាច្រើនកន្លែងផងដែរ៕