.jpg)
មន្ត្រី គ.ជ.ប ធ្វើសន្និសីទកាសែត កាលពីសប្តាហ៍មុន។ ផា លីណា
ភ្នំពេញៈ គណៈកម្មាធិការជាតិរៀបចំការបោះឆ្នោតបានទទួលស្គាល់ជាផ្លូវការ គណបក្សនយោបាយចំនួន ១៥ ហើយក្នុងចំណោមគណបក្សនយោបាយចំនួន ២០ ដែលបានចុះបញ្ជីឈ្មោះបោះឆ្នោត និងបញ្ជីបេក្ខជនឈរឈ្មោះសម្រាប់ការបោះឆ្នោតជាតិនាខែកក្កដាខាងមុខ។
លោក ឌឹម សុវណ្ណារុំ សមាជិក និងជាអ្នកនាំពាក្យ គ.ជ.ប បានថ្លែងថាគិតត្រឹមថ្ងៃទី ២០ ខែឧសភាមានគណបក្សចំនួន ១៥ ក្នុងចំណោមគណបក្ស ២០ ដែលបានចុះបញ្ជីនៅ គ.ជ.ប ត្រូវបានទទួលស្គាល់ជាផ្លូវការ។ លោកថ្លែងតាមប្រព័ន្ធទំនាក់ទំនងសង្គមតេលេក្រាមថា៖ «គ.ជ.ប បានទទួលស្គាល់គណបក្ស ២ ទៀតហើយចុះបញ្ជីជាផ្លូវការសរុប ១៥ គិតត្រឹមថ្ងៃនេះទី ២០ ខែឧសភា ឆ្នាំ ២០១៨ សម្រាប់នីតិកាលទី ៦ គឺគណបក្សខ្មែរក្រោកឈរនៅ៦ មណ្ឌល និងគណបក្សសាធារណរដ្ឋប្រជាធិបតេយ្យ ឈរនៅ ១៦ មណ្ឌល»។
គ.ជ.ប ប្រកាសឈប់ទទួលការចុះបញ្ជីគណបក្សថ្មីកាលពីថ្ងៃទី ១៤ ខែឧសភា បន្ទាប់ពីបានបើកឲ្យគណបក្សនយោបាយចុះឈ្មោះ និងបំពេញតាមនីតិវិធី ចាប់តាំងពីថ្ងៃទី ៣ ខែមេសាមក។
មន្ត្រី គ.ជ.ប បានកោតសរសើរពីចំនួនគណបក្សនយោបាយច្រើនចូលរួមប្រកួតប្រជែងដោយប្រៀបធៀបកាលពីការបោះឆ្នោតជាតិឆ្នាំ ២០១៣ ដែលមានគណបក្សតែ ៨ ចូលរួម ប៉ុន្តែអង្គការសង្គមស៊ីវិល និងអតីតគណបក្សប្រឆាំងបានលើកទឡ្ហីករថា ការបោះឆ្នោតនាពេលខាងមុខនេះនឹងមិនប្រព្រឹត្តទៅដោយសេរី និងយុត្តិធម៌នោះទេ ខណៈគណបក្សប្រឆាំងដ៏ធំត្រូវបានរំលាយមុនការបោះឆ្នោតមកដល់។
បើតាមលោក សុវណ្ណារុំ គណបក្ស ១៣ ទៀតដែលត្រូវបាន គ.ជ.ប ប្រកាសទទួលស្គាល់រួចហើយ រួមមានគណបក្សធម្មាធិបតេយ្យ ឈរនៅ ១០ មណ្ឌលគណបក្សមាតុភូមិយើងឈរនៅ ៦ មណ្ឌល គណបក្សខ្មែរឈប់ក្រ ឈរនៅ ២៥ មណ្ឌល គណបក្សសម្ព័ន្ធដើម្បីប្រជាធិបតេយ្យ ឈរនៅ ២៥ មណ្ឌលគណបក្សសំបុកឃ្មុំ សង្គមប្រជាធិបតេយ្យ ឈរនៅ ២៥ មណ្ឌលគណបក្សប្រជាធិបតេយ្យមូលដ្ឋាន ឈរនៅ ២៥ មណ្ឌល គណបក្សខ្មែរតែ ១ ឈរនៅ ១៦ មណ្ឌល គណបក្សពន្លឺថ្មីឈរនៅ ១៣ មណ្ឌល គណបក្សប្រជាជនកម្ពុជា ឈរនៅ ២៥ មណ្ឌល គណបក្សយុវជនកម្ពុជា ឈរនៅ ១៧ មណ្ឌល គណបក្សសញ្ជាតិកម្ពុជា ឈរនៅ ២៥ មណ្ឌល គណបក្សខ្មែររួបរួមជាតិ ឈរនៅ ២៥ មណ្ឌល និងគណបក្សហ៊្វុនស៊ិនប៉ិចឈរនៅ ២៥មណ្ឌល។ លោកបន្ថែមថានៅថ្ងៃទី ២១ ខែឧសភានេះ គ.ជ. ប នឹងទទួលស្គាល់គណបក្សដទៃទៀត។
លោក ផៃ ស៊ីផាន អ្នកនាំពាក្យទីស្ដីការគណៈរដ្ឋមន្ត្រីថ្លែងថាទោះបីគ្មានវត្តមានគណបក្សប្រឆាំងចូលរួមក៏លទ្ធិប្រជាធិបតេយ្យនៅកម្ពុជារីកចម្រើនដែរ។
លោកបន្តថា៖ «មិនមែនបាត់បង់គណបក្សមួយធ្វើឲ្យបាត់បង់លទ្ធិប្រជាធិបតេយ្យនៅកម្ពុជាទេ។ យ៉ាងហោចណាស់មានគណបក្សមួយចំនួនធំដែលមាននិន្នាការប្រជែងយកអំណាចជាមួយគណបក្សប្រជាជន។ ការប្រជែងយកអំណាចជាមួយគណបក្សប្រជាជនគឺជាការបង្កើននូវឥទ្ធិពល នៃអំណាចប្រជាពលរដ្ឋនេះឯង។ ដូច្នេះចំនួនគណបក្សដែលប្រជែងជាមួយគណបក្សប្រជាជនចុះឈ្មោះក្នុងបញ្ជីបោះឆ្នោតជាមួយគណកម្មាធិការជាតិរៀបចំការបោះឆ្នោតបង្ហាញថាអំណាចរបស់ប្រជាពលរដ្ឋ គឺកើនឡើងលទ្ធិប្រជាធិបតេយ្យរឹតតែរឹងមាំ»។
ប៉ុន្តែអតីតតំណាងរាស្ត្រអតីតគណបក្សសង្គ្រោះជាតិលោក អ៊ូ ចាន់រ័ត្ន បានថ្លែងកាលពីម្សិលមិញថា គណបក្សដែលបានចុះឈ្មោះចូលរួមប្រកួតទាំង ២០ នោះមិនអាចនាំយកនូវលទ្ធិប្រជាធិបតេយ្យត្រឡប់មកវិញបានទេ ដោយសារតែសំឡេងរបស់ពួកគេ «មិនមានប្រសិទ្ធភាព ពួកគេខ្សោយ និងតូចពេក»។ លោកបន្ថែមថា៖ «ពួកគេអាចតំណាងប្រជាពលរដ្ឋក្នុងចំនួនតូចណាស់។ វានឹងមិនឆ្លុះបញ្ចាំងឆន្ទៈរបស់ប្រជាពលរដ្ឋទេ»។
លោក សម រង្ស៊ី អតីតប្រធានអតីតគណបក្សសង្គ្រោះជាតិ និងបច្ចុប្បន្នជាប្រធានចលនាសង្គ្រោះជាតិបានថ្លែងកាលពីចុងសប្ដាហ៍មុនថា បើទោះបីជាមានចំនួនគណបក្សចូលរួម ២០ ឬ ២០០ ឬច្រើនជាងនេះក៏ការបោះឆ្នោតនាពេលខាងមុខនេះគ្មានន័យដែរ។
លោកបានអះអាងថា៖ «ក្នុងចំណោមគណបក្ស ២០ ដែលបានប្រកាសគណបក្ស ១៩ ជាគណបក្សអំពិលអំពែកដោយសារលក្ខណៈសិប្បនិម្មិត និងភាពមិនស្ថិតស្ថេររបស់ពួកគេដែលដើរតួតែមួយគត់គឺជួយគណបក្សប្រជាជនកម្ពុជារបស់លោក ហ៊ុន សែន ដែលគណបក្សនេះត្រូវការយ៉ាងខ្លាំងដើម្បីទទួលបានភាពស្របច្បាប់សម្រាប់ការបោះឆ្នោតក្លែងក្លាយ ដែលត្រូវបានថ្កោលទោសដោយប្រទេសប្រជាធិបតេយ្យទាំងអស់»៕ PS
