រតនគិរី: ប្រធានមន្ទីរពេទ្យបង្អែកខេត្តរតនគិរីលោក ហ៊ីងផាន សគន្ធា បានសម្រេចដកតំណែងលោក ចាន់ សុខជា មុខជំនាញបច្ចេកទេសគិលានុបដ្ឋាកបឋមបម្រើការងារនៅផ្នែកពិគ្រោះជំងឺក្រៅឲ្យមកបម្រើការនៅផ្នែករដ្ឋបាលហិរញ្ញវត្ថុវិញ បន្ទាប់ពីអ្នកជំងឺម្នាក់បានចោទលោកថាបានច្របាច់កគាត់ក្នុងទំនាស់ពាក្យសម្ដីគ្នា ប៉ុន្ដែគ្រូពេទ្យរូបនេះបានបដិសេធ។
តាមលិខិតចាត់តាំងរបស់លោក ហ៊ីងផាន សគន្ធា ចុះថ្ងៃទី ១៣ ខែវិច្ឆិកា ដែលភ្នំពេញប៉ុស្ដិ៍ទទួលបានពីថ្ងៃម្សិលមិញឲ្យដឹងថា លោក ចាន់ សុខជា អាយុ ៣៤ ឆ្នាំ មុខជំនាញបច្ចេកទេសគិលានុបដ្ឋាកបឋមបម្រើការនៅផ្នែកពិគ្រោះជំងឺក្រៅ ត្រូវបានផ្អាកការងារបណ្ដោះអាសន្នឲ្យមកបម្រើការងារនៅផ្នែករដ្ឋបាលហិរញ្ញវត្ថុ (វត្តមានចាំបាច់នៅផ្នែករដ្ឋបាលរាល់ម៉ោងធ្វើការ)។
លោក ហ៊ីងផាន សគន្ធា បានប្រាប់ភ្នំពេញប៉ុស្ដិ៍កាលពីម្សិលមិញថា ករណីនេះលោកបានចាត់វិធានការតាមនីតិវិធីរដ្ឋបាលរួចរាល់ហើយ ។
លោកបានបញ្ជាក់ថា៖ «រឿងហ្នឹងខ្ញុំបានដឹកនាំកិច្ចប្រជុំស្រាវជ្រាវហើយគឺអតិថិជនម្នាក់ហ្នឹងនិយាយមួលបង្កាច់មកលើក្រុមគ្រូពេទ្យខុសពីការពិត ប៉ុន្ដែយ៉ាងណា យើងធ្វើការងារបញ្ចប់រួចរាល់ហើយ ខ្ញុំគ្មានអ្វីជម្រាបច្រើនទេ។ អ្នកជំងឺចង់ទៅចេញពីមន្ទីរពេទ្យបង្អែកខេត្ត ហើយទៅរកសេវាខាងក្រៅ ប៉ុន្ដែខ្ញុំអត់ដឹងពីមូលហេតុដែលគាត់ចង់ចេញពីមន្ទីរពេទ្យទេ កូនគាត់មានជំងឺគ្រុនឈាមទៀត»។
លោក គង់ វេង អនុប្រធានមន្ទីរសុខាភិបាលខេត្តរតនគិរីមិនមានមតិអ្វីបន្ថែមជុំវិញករណីនេះទេ ខណៈលោកប្រធានមន្ទីរពេទ្យបានចាត់វិធានការរួចរាល់ហើយនោះ «រឿងហ្នឹងខ្ញុំទទួលបានហើយ ឥឡូវប្រធានអ្នកគ្រប់គ្រងមន្ទីរពេទ្យបង្អែកខេត្ត គាត់បានធ្វើរួចរាល់ហើយ ខ្ញុំអត់មានអ្វីនិយាយច្រើនទេ»។
អ្នកស្រី អាន មីនា អាយុ ២៨ ឆ្នាំ រស់នៅភូមិថ្មី សង្កាត់ឡាបានសៀក ក្រុងបានលុង ខេត្តរតនគិរី ជាម្ដាយអ្នកជំងឺឈ្មោះ លី ម៉ៃយ៉ា ភេទស្រី អាយុ ៧ ខែ បាននាំកូនស្រីគាត់មកព្យាបាលនៅមន្ទីរពេទ្យបង្អែកខេត្តរតនគិរី ហើយមានទំនាស់ជាមួយលោកគ្រូពេទ្យ ចាន់ សុខជា។ នេះបើតាមកំណត់ហេតុរបស់មន្ទីរពេទ្យបង្អែកខេត្តរតនគិរី។ ប៉ុន្ដែកាលពីម្សិលមិញភ្នំពេញប៉ុស្ដិ៍មិនអាចទាក់ទងសុំការបញ្ជាក់បន្ថែមជុំវិញករណីនេះបានទេ។
យ៉ាងណាក្ដី បើតាមវីដេអូដែលអ្នកស្រី អាន មីនា បានបង្ហោះតាមហ្វេសប៊ុក បានអះអាងថាគ្រូពេទ្យម្នាក់ឈ្មោះ ចាន់ សុខជា បានប្រើពាក្យសម្ដីអសុរោះដាក់អ្នកស្រី។ ក្រោយមកគ្រូពេទ្យនោះបានចេញពីបន្ទប់ខ្លួន ស្ទុះមកយកទូរស័ព្ទពីដៃគាត់ដែលកំពុងថតរូប ប៉ុន្ដែអ្នកស្រីបានស្រែកថា គ្រូពេទ្យចង់ច្របាច់កអ្នកស្រី តែមានក្រុមគ្រូពេទ្យមកចាប់បំបែក ទើបគាត់ត្រឡប់ចូលក្នុងបន្ទប់វិញ។
តាមកំណត់ហេតុរបស់មន្ទីរពេទ្យបង្អែកខេត្តរតនគិរីដែលលោក ចាន់ សុខជា បានឆ្លើយបំភ្លឺប្រាប់ក្រុមគណៈកម្មការដោះស្រាយទំនាស់ឲ្យដឹងថា៖ «កាលពីព្រឹកថ្ងៃទី ១៣ ខែវិច្ឆិកា ឆ្នាំ ២០១៩ មានបងស្រីម្នាក់បានមកសុំធ្វើសំណុំបែបបទសុំចេញពីមន្ទីរពេទ្យ ដើម្បីយកកូនរបស់គាត់ទៅព្យាបាលខាងក្រៅ»។
លោកបន្តថា ស្របពេលនោះមានអតិថិជនរង់ចាំធ្វើឯកសារច្រើន ហើយក្រុមគ្រូពេទ្យបានប្រាប់ឲ្យគាត់រង់ចាំសិន ។ ប៉ុន្តែពេលនោះគាត់ [អ្នកស្រី អាន មីនា] បានក្រោធខឹង និងបានប្រើពាក្យអសុរោះដាក់ក្រុមគ្រូពេទ្យ និងបានយកកាមេរ៉ាទូរស័ព្ទមកថតរូបក្រុមគ្រូពេទ្យ។
លោកថា ដោយឃើញសកម្មភាពបែបនេះលោកក៏បានប្រាប់ពីក្នុងបន្ទប់ថា មិនអនុញ្ញាតឲ្យថតរូបទេ តែគាត់មិនព្រមឈប់។ ពេលនោះលោកក៏បានដើរចេញពីក្នុងបន្ទប់ដើម្បីសុំទូរស័ព្ទពីគាត់ ដោយលោកយល់ថាជាការធ្វើខុសបទបញ្ជាផ្ទៃក្នុងរបស់មន្ទីរពេទ្យ។
លោកថា៖ «ខ្ញុំមិនបានប្រើកាយវិការច្របាច់ករបស់គាត់ដូចនៅក្នុង Video Clip ដែលគាត់បានចោទប្រកាន់នោះទេ ហើយខណៈពេលនោះក៏មានអតិថិជន និងក្រុមគ្រូពេទ្យនៅកន្លែងកើតនោះដែរ»។
លិខិតកំណត់ហេតុបញ្ជាក់ថា៖ «តាមរយៈការពិភាក្សាយ៉ាងល្អិតល្អន់ អង្គប្រជុំបានមូលមតិសន្និដ្ឋានថា លោក ចាន់ សុខជា មិនបានជម្រាបពីគោលបំណង មុននឹងអនុវត្តទៅលើអតិថិជនដូចជា ការស្នើសុំដកទូរស័ព្ទដៃមិនឲ្យថត»។
គួររំឭកថាកាលពីថ្ងៃទី ២៥ ខែ កក្កដា ឆ្នាំ ២០១៩ កន្លងទៅ ក្រសួងសុខាភិបាលធ្លាប់បានដាក់វិន័យអ្នកគ្រូពេទ្យម្នាក់ឈ្មោះ ណុប យ៉ុម ជំនាញគិលានុបដ្ឋាយិកាមធ្យមនៃមន្ទីរពេទ្យខាងលើឲ្យស្ថិតក្នុងភាពទំនេរគ្មានប្រាក់បៀវត្សរ៍រយៈពេល ១ ឆ្នាំ គិតពីថ្ងៃទី ១ ខែ សីហា ឆ្នាំ ២០១៩ ដល់ថ្ងៃទី ៣១ ខែ កក្កដា ឆ្នាំ ២០២០ ប៉ុន្តែនៅរក្សាទុកក្របខ័ណ្ឌដដែល បន្ទាប់ពីគ្រូពេទ្យរូបនេះបានទះកំផ្លៀងអ្នកជំងឺម្នាក់ ដោយសារខឹងគ្មានប្រាក់បង់សេវា៕