ព្រះសីហនុៈ ចោរប្លន់ប្រដាប់អាវុធជនជាតិចិនម្នាក់ក្នុងចំណោមបក្ខពួក ៤ នាក់ដែលជិះឡានទំនើបលំដាប់សេដ្ឋីប្លន់អ្នករត់តាក់ស៊ីម្នាក់កាលពីយប់ថ្ងៃទី ២២ ខែមិថុនាត្រូវបានឃុំខ្លួននៅពន្ធនាគារខេត្ត បន្ទាប់ពីតុលាការបានចោទប្រកាន់កាលពីថ្ងៃសៅរ៍ពីបទ «ប្លន់ និងប្រើប្រាស់អាវុធខុសច្បាប់» ខណៈសមត្ថកិច្ចកំពុងស្រាវជ្រាវតាមរកចាប់ជនសង្ស័យ ៣ នាក់ផ្សេងទៀត។
ស្នងការរងខេត្តព្រះសីហនុលោក កុល ផាលី បានឲ្យដឹងកាលពីម្សិលមិញថា បុរសជនជាតិចិនម្នាក់ឈ្មោះ Ly Ker Xing អាយុ ២៤ ឆ្នាំត្រូវបានកម្លាំងនគរបាលខេត្តព្រះសីហនុចាប់ឃាត់ខ្លួនពាក់ព័ន្ធករណីប្លន់ អ្នកបើករថយន្តតាក់ស៊ីជនជាតិខ្មែរម្នាក់កាលពីយប់ថ្ងៃទី ២២ ខែមិថុនា ឆ្នាំ ២០១៨ នៅសង្កាត់ ៣ ក្រុង-ខេត្តព្រះសីហនុ។
លោក ផាលី ថ្លែងថា៖ «នៅពេលឃាត់ខ្លួន សមត្ថកិច្ចបានរឹបអូសអាវុធខ្លីម៉ាករ៉ូឡូមួយដើមមានគ្រាប់ ៣ គ្រាប់ និងរថយន្តម៉ាក Rolls-Royce ពណ៌ស្លែ ពាក់ស្លាកលេខភ្នំពេញ ២BP-៦៦៦៦ មួយគ្រឿងព្រមទាំងវត្ថុតាងដែលបានប្លន់ពីជនរងគ្រោះមួយចំនួនទៀតរួមមានលុយចំនួន ៥០០ ដុល្លារ ប័ណ្ណបើកបរ ១ សន្លឹក ប័ណ្ណសម្គាល់រថយន្ត ១ សន្លឹក អត្តសញ្ញាណប័ណ្ណ សញ្ជាតិខ្មែរ ១ សន្លឹក»។
លោកបន្តថានៅពេលនេះជនសង្ស័យកំពុងត្រូវបានឃុំខ្លួននៅពន្ធនាគារខេត្តព្រះសីហនុ បន្ទាប់ពីតុលាការសម្រេចចោទប្រកាន់ពីបទ «ប្លន់ និងប្រើប្រាស់អាវុធខុសច្បាប់»។ ជាមួយគ្នានេះក្រុមកម្លាំងសមត្ថកិច្ចកំពុងបន្តធ្វើការស្រាវជ្រាវស្វែងរកចាប់ខ្លួនក្រុមជនសង្ស័យជនជាតិចិន 3 នាក់ទៀតដែលពាក់ព័ន្ធក្នុងករណីប្លន់ប្រដាប់អាវុធខាងលើនេះ។
យោងតាមរបាយការណ៍របស់នគរបាលខេត្តព្រះសីហនុនៅវេលាម៉ោង ៨ និង ៤០ នាទីយប់ថ្ងៃទី ២២ ខែមិថុនាឆ្នាំ ២០១៨ មានជនរងគ្រោះម្នាក់ ឈ្មោះ គង់ ទីប៉ោ ភេទប្រុសអាយុ ៣១ ឆ្នាំ ជាអ្នកបើករថយន្តតាក់ស៊ីមានទីលំនៅសង្កាត់ដង្កោ រាជធានីភ្នំពេញបានមកដាក់ពាក្យបណ្ដឹងស្នើសុំកិច្ចអន្តរាគមន៍ដោយក្នុងពាក្យបណ្ដឹងនោះ ជនរងគ្រោះបានរៀបរាប់ថាមានជនជាតិចិនមានគ្នា ៤ នាក់បានទូរស័ព្ទហៅគាត់តាមប្រព័ន្ធ We-Chat ដោយប្រាប់ថាឲ្យគាត់មកយកលិខិតឆ្លងដែនរបស់ពួកគេទៅបន្តទិដ្ឋាការ។
លុះពេលគាត់ទៅដល់ទីតាំងកើតហេតុខាងលើក្រុមជនសង្ស័យដែលជិះរថយន្តម៉ាក Rolls-Royce ពណ៌ស្លែ ពាក់ស្លាកលេខភ្នំពេញ ២BP-៦៦៦៦ ក៏បានធ្វើសកម្មភាពភ្ជង់ប្លន់យកទ្រព្យសម្បត្តិ និងសម្ភាររបស់គាត់មួយចំនួនរួមមាន លុយ ៥០០ ដុល្លារ ប័ណ្ណបើកបរ ១ សន្លឹក ប័ណ្ណសម្គាល់រថយន្ត ១ សន្លឹកអត្តសញ្ញាណប័ណ្ណសញ្ជាតិខ្មែរ ១ សន្លឹក ។
របាយការណ៍ដដែលបន្តថាក្រោយទទួលបានបណ្ដឹងជនរងគ្រោះក្រុមកម្លាំងនគរបាលព្រហ្មទណ្ឌខេត្តព្រះសីហនុ រួមទាំងកម្លាំងនគរបាលមូលដ្ឋានបានចុះធ្វើការស្រាវជ្រាវរហូតដល់ម៉ោង ១១ យប់ថ្ងៃដដែលទើបប្រទះឃើញរថយន្តជនសង្ស័យចតនៅមុខក្លិបកម្សាន្ត Casa ក្រុងព្រះសីហនុ ហើយក៏បានធ្វើការហ៊ុមព័ទ្ធចាប់បានជនសង្ស័យខាងលើម្នាក់ដែលជាអ្នកបើកបររថយន្ត។
គួរបញ្ជាក់ផងដែរថា កាលពីថ្ងៃទី ២១ ខែមិថុនាឆ្នាំ ២០១៨ កន្លងទៅនេះកម្លាំងនគរបាលខេត្តព្រះសីហនុបានចាប់ឃាត់ខ្លួនជនជាតិចិន ៧ នាក់ដែលបានប្រើអំពើហិង្សាព្រួតគ្នាវាយ និងកាប់ប្រហារជនជាតិចិនដូចគ្នា ២ នាក់ឲ្យរងរបួស៕