ភ្នំពេញ៖ បេក្ខជនដែលនឹងប្រឡងសញ្ញាបត្រមធ្យមសិក្សាទុតិយភូមិ ឬបាក់ឌុបនៅថ្ងៃទី ២១-២២ ខែ ធ្នូ ឆ្នាំ ២០២០ មានចំនួន ១២១ ២០១ នាក់ គឺមានការកើនឡើងជាងឆ្នាំមុនប្រមាណជា ៥ ភាគរយ ដោយក្នុងនោះចំនួនបេក្ខនារី ក៏មានចំនួនច្រើនជាងមុនផងដែរ។
លោក រស់ សុវាចា អ្នកនាំពាក្យក្រសួងអប់រំ យុវជន និងកីឡាបានប្រាប់ភ្នំពេញប៉ុស្តិ៍កាលពីថ្ងៃទី ២៣ ខែកញ្ញា ថា យោងតាមរបាយការណ៍ស្ថិតិបេក្ខជនដាក់ពាក្យប្រឡងតាមរាជធានី-ខេត្តទាំង ២៥ ដែលគិតត្រឹមថ្ងៃទី ២២ ខែកញ្ញា បេក្ខជនសរុបមានចំនួន ១២១ ២០១ នាក់ ក្នុងនោះបេក្ខនារីមានចំនួន ៦៣ ៩៣៧ នាក់ និងបេក្ខជនបុរស ៥៧ ២៦៤ នាក់។ បើប្រៀបធៀបជាមួយនឹងបេក្ខជនប្រឡងកាលពីឆ្នាំ ២០១៩ គឺមានការកើនឡើងជិត ៦ ០០០ នាក់ ឬប្រមាណជា ៥ ភាគរយ។
ក្នុងចំណោមបេក្ខជនទាំងនោះ មានបេក្ខជនប្រឡងថ្នាក់វិទ្យាសាស្ត្រចំនួន ៤០ ៧៦៥ នាក់ស្មើនឹង ៣៣,៦៣% (ស្រី ២៣ ៦៣៦ នាក់) និងថ្នាក់វិទ្យាសាស្ត្រសង្គម មានបេក្ខជនចំនួន ៨០ ៤៣៦ នាក់ ស្មើនឹង ៦៦,៣៧% (ស្រី ៤០ ៣០១ នាក់)។
បើតាមរបាយការណ៍ក្រសួងអប់រំក្នុងចំណោមបេក្ខជនសរុបទាំងអស់នោះមានបេក្ខជនចំណេះទូទៅចំនួន ១០២ ០៣៧ នាក់ស្មើ ៨៤,១៩% (ស្រី ៥៥ ៣៧៥ នាក់) បេក្ខជនស្វ័យរិន ១៣ ៩៩១ នាក់ ស្មើ ១១,៥៤% (ស្រី ៧ ០៥៧ នាក់) បេក្ខជនបំពេញវិជ្ជា ៣ ២៦០ នាក់ ស្មើ ២,៧% (ស្រី ១ ០៧៧ នាក់) និងបេក្ខជនស្វ័យរិនបំពេញវិជ្ជាចំនួន ១ ៩១៣ ស្មើ ៦,៥៧% (ស្រី ៤២៨ នាក់)។ ចំពោះមណ្ឌលប្រឡងមាន ២៣៧ មណ្ឌល (កើន ៣៥ មណ្ឌល) និងចំនួនបន្ទប់ចំនួន ៤ ៨៩១ បន្ទប់ (កើន ១៦៧ បន្ទប់)។
លោក សុវាចា ថ្លែងថា៖ «ចំនួនបេក្ខជនកើន ឬថយមិនមានមូលហេតុណាមួយគួរឱ្យកត់សម្គាល់នោះទេ ដោយសារជារៀងរាល់ឆ្នាំទិន្នន័យចំនួនបេក្ខជនមានការប្រែប្រួលមិនដូចគ្នានោះទេ វាអាស្រ័យទៅលើសិស្សដែលរៀនជាក់ស្តែង ហើយនឹងចំនួនសិស្សដែលមានបេក្ខភាពប្រឡង»។ បើតាមលោក សុវាចា អ្វីដែលថ្មីនៅក្នុងឆ្នាំនេះ គឺបេក្ខជនប្រឡងមិនមានការដកបេក្ខភាពទេ មានន័យថា ឱ្យតែបេក្ខជនដាក់ពាក្យស្នើសុំមក គឺគាត់បានសិទ្ធិប្រឡងតែម្តង ដែលខុសពីឆ្នាំកន្លងទៅមានការដកបេក្ខភាពប្រឡងនៅពេលបេក្ខជនដាក់ពាក្យស្នើសុំប្រឡងដោយយោងលើចំនុចមួយចំនួនដូចជា អវត្តមានច្រើន លទ្ធផលប្រឡងឆមាសទី១ និងទី២ មិនបានល្អជាដើម។
ក្រសួងអប់រំកំពុងរៀបចំលិខិតស្នើសុំបន្តកិច្ចសហការពីសំណាក់ក្រសួងស្ថាប័នពាក់ព័ន្ធដូចជា ក្រសួងមហាផ្ទៃ អង្គភាពប្រឆាំងអំពើពុករលួយ សហភាពសហព័ន្ធយុវជនកម្ពុជា (សសយក) និងក្រសួងសុខាភិបាលជាដើម។ លោកថា ក្រសួងនឹងបញ្ជាក់ពីការចូលរួមសង្កេតការណ៍របស់ក្រសួងស្ថាប័នពាក់ព័ន្ធក្រោយពីមានការឆ្លើយតបពីស្ថាប័នទាំងនោះ។
ទោះយ៉ាងណា ក្រសួងអប់រំនៅតែបន្តអនុវត្តគោលការណ៍ច្បាប់ យុត្តិធម៌ តម្លាភាព និងលទ្ធផលអាចទទួលយកបានទន្ទឹមពេលនឹងការអនុវត្តវិធានការសុវត្ថិភាពសុខភាពសម្រាប់ការប្រឡងបាក់ឌុបឆ្នាំនេះ។
គួរបញ្ជាក់ថា បេក្ខជនដែលបានមកប្រឡងបាក់ឌុបកាលពីឆ្នាំមុនសម័យប្រឡងថ្ងៃទី ១៩ សីហា ២០១៩ មានចំនួនសរុប ១១៥ ២០៦ នាក់ ក្នុងនោះបេក្ខនារីមានចំនួន ៥៩ ៧៣២ នាក់។
លោកស្រី អ៊ុក ឆាយាវី ប្រធានសមាគមគ្រូបង្រៀនកម្ពុជាឯករាជ្យ (CITA) បានលើកឡើងថា សិស្សានុសិស្សនៅឆ្នាំនេះរៀនបានតិច និងមិនជាប់លាប់ដូចបណ្តាឆ្នាំមុនៗដោយសារបញ្ហាជំងឺកូវីដ ១៩ ហើយលោកស្រីរំពឹងថា ក្រសួងអាចនឹងមានការបន្ធូរបន្ថយកម្រិតនៃវិញ្ញាសាសម្រាប់បេក្ខជនប្រឡង។ លោកស្រីថា៖ «ខ្ញុំគិតថាប្រឡងបាក់ឌុបឆ្នាំនេះអាចនឹងធូរជាងឆ្នាំមុន ដែលសិស្សអាចធ្វើបាន និងមិនគួររឹតបន្តឹងខ្លាំងផងដែរ»៕