ភ្នំពេញៈ ខណៈដែលស្ពានជ្រោយចង្វារ នៅរាជធានីភ្នំពេញ នឹងត្រូវបើកឲ្យដំណើរការឡើងវិញ នៅថ្ងៃទី ៤ ខែ មេសា គឺនៅមុនថ្ងៃបុណ្យចូលឆ្នាំខ្មែរជាងមួយសប្តាហ៍ ជប៉ុនក៏នៅបន្តជួយលើគម្រោងដោះស្រាយវិបត្តិកកស្ទះចរាចរណ៍ផងដែរ។
ស្ពានជ្រោយចង្វារ ត្រូវបានជួសជុលឡើងវិញ ចាប់តាំងពីខែ តុលា ឆ្នាំ ២០១៧ ដោយប្រាក់ជំនួយឥតសំណងចំនួន ៣០ លានដុល្លារ ដែលត្រូវបានផ្តល់ដោយទីភ្នាក់ងារសហប្រតិបត្តិការអន្តរជាតិជប៉ុន (JICA) និងស្ថានទូតជប៉ុនប្រចាំកម្ពុជា។
កម្មករសាងសង់មានភាពមមាញឹក ក្នុងការលាបពណ៌គ្រឿងតុបតែងភ្ជាប់ស្ពាន និងភ្ជាប់បង្កាន់ដៃការពារកាលពីដើមសប្តាហ៍នេះ នៅពេលដែលសមាជិកចំនួន ២៧ រូប នៃអង្គភាពសារព័ត៌មានមួយចំនួន បានចុះទៅទីតាំងនោះដើម្បីពិនិត្យមើល តាមការរៀបចំពីសំណាក់ JICA។
ស្ពានជ្រោយចង្វារត្រូវបានដាក់ឈ្មោះជាផ្លូវការថា ស្ពានមិត្តភាពកម្ពុជា-ជប៉ុន។ ស្ពាននេះ មិនត្រឹមតែបម្រើដល់តម្រូវការធ្វើដំណើនិងដឹកជញ្ជូនរបស់ព្រះរាជាណាចក្រកម្ពុជាប៉ុណ្ណោះទេថែមទាំងមានតួនាទីដ៏សំខាន់ ក្នុងកិច្ចសហប្រតិបត្តិការរវាងជប៉ុន-កម្ពុជា ផងដែរ។
ដើមដំបូងឡើយស្ពាននេះ ត្រូវបានកសាងក្នុងឆ្នាំ ១៩៦៣ ដោយជំនួយបច្ចេកទេស ពីប្រទេស ជប៉ុន ហើយវាត្រូវបានបំផ្លាញស្ទើរតែទាំងស្រុងអំឡុងសង្រ្គាមស៊ីវិល ក្នុងទស្សវត្សរ៍ឆ្នាំ ១៩៧០។ ជំនួយឥតសំណងពីមុនឆ្នាំ ១៩៩២ បានដំណើរការសាងសង់ឡើងវិញ មុនពេលដែល វាបើកឲ្យប្រើប្រាស់នៅឆ្នាំ ១៩៩៦។
លោក Hidehisa Horinouchi ឯកអគ្គរាជទូតជប៉ុន ប្រចាំកម្ពុជាមានប្រសាសន៍ថា៖ «ក្នុងរយៈពេល ៣០ ឆ្នាំចុងក្រោយនេះ ប្រទេស ជប៉ុន កំពុងផ្តល់ការគាំទ្រដល់កម្ពុជា ចាប់ពីដំណើរការសន្តិភាពដំបូង តាមរយៈការសាងសង់ឡើងវិញជាបន្ទាន់ និងរហូតដល់ ការអភិវឌ្ឍសេដ្ឋកិច្ច»។
ស្ពាននេះមានប្រវែង ៧០៩ ម៉ែត្រ តភ្ជាប់រាជធានីភ្នំពេញទៅខេត្តចំនួន ៩ នៅប៉ែកឦសាន រួមទាំងការដឹកជញ្ជូនទំនិញផងដែរ។
សេចក្តីថ្លែងការណ៍មួយចេញផ្សាយដោយ JICA និងស្ថានទូតជប៉ុននៅកម្ពុជា បានឲ្យដឹងថា គម្រោងជួសជុលនេះ មានគោលបំណង «លុបបំបាត់ការកកស្ទះចរាចរណ៍ ហើយរួមចំណែកនៅក្នុងផែនការអភិវឌ្ឍយុទ្ធសាស្រ្តថ្នាក់ជាតិកម្ពុជា»។
សេចក្តីថ្លែងការណ៍នេះបានបន្តថា៖ «គម្រោងសាងសង់ និងកែលម្អផ្លូវ ត្រូវបានលើកស្ទួយតាមរយៈជំនួយពីប្រទេស ជប៉ុន និងម្ចាស់ជំនួយផ្សេងៗ ដោយផ្តោតជាចម្បងលើផ្លូវជាតិ ក្នុងប្រទេសនេះ»។
ទឹកប្រាក់ជំនួយឥតសំណងចំនួន ៣០ លានដុល្លារ សម្រាប់គម្រោងនេះ មិនតម្រូវឲ្យភាគី កម្ពុជាសងទេ ផ្ទុយទៅវិញ ប្រាក់ជំនួយនេះនឹងត្រូវបានប្រគល់ឲ្យរដ្ឋាភិបាលរក្សាទុក បន្ទាប់ពីការងារជួសជុលនេះបានសម្រេចពេញលេញ។
JICA ក៏បានផ្តល់ប្រាក់ជំនួយឥតសំណងចំនួន ១៦ លានដុល្លារបន្ថែមទៀត សម្រាប់ការអភិវឌ្ឍប្រព័ន្ធគ្រប់គ្រងចរាចរណ៍ថ្មី នៅក្នុងរាជធានីភ្នំពេញ រួមទាំងប្រព័ន្ធតាមដាននៅសាលារាជធានី និងភ្លើងចរាចរណ៍ថ្មីចំនួន ១០០ កន្លែង។
យោងតាម JICA គម្រោងនេះ មានគោលបំណងកាត់បន្ថយគ្រោះថ្នាក់ចរាចរណ៍ នឹងអាចកាត់បន្ថយការប្រើនគរបាលចរាចរណ៍នៅចំណុចប្រសព្វបាន ២០ ភាគរយ។ ឧបករណ៍សម្រួល ចរាចរណ៍ដែលចាត់ចែងដោយនាយកដ្ឋានការងារសាធារណៈ រួមមាន ការគ្រប់គ្រងសញ្ញាចរាចរណ៍ការគ្រប់គ្រងដំណើរប្រព័ន្ធទូរទស្សន៍កាមេរ៉ា ការតាមដានបណ្តាញ និងជញ្ជាំងវីដេអូ។ ឧបករណ៍ទាំងនេះ បង្ហាញដោយស្វ័យប្រវត្តិនូវផ្នែកនានា ក្នុងក្រុងដែលទាមទារឲ្យមានការយកចិត្តទុកដាក់។
មន្រ្តីមកពីនាយកដ្ឋានការងារសាធារណៈមានប្រសាសន៍ថា ពួកគេបានកត់សម្គាល់ឃើញមានការកែលម្អនៅក្នុងស្ថានភាពចរាចរណ៍ តែពួកគេមិនអាចកំណត់បានអំពីបរិមាណថា កិច្ចការងារនេះប្រសើរបានច្រើនប៉ុនណានោះទេ ចាប់តាំងពីមជ្ឈមណ្ឌលគ្រប់គ្រងចរាចរណ៍ បានចាប់ផ្តើមដំណើរការកាលពីខែ កុម្ភៈ ឆ្នាំ ២០១៩ មកនោះ៕
Husain Haider