.jpg)
លោកប្រាក់ សុខុន ចាប់ដៃជាមួយឯកអគ្គរាជទូតជប៉ុនលោក Hidehisa Horinouchi។ ហេង ជីវ័ន
ភ្នំពេញៈ រដ្ឋាភិបាលជប៉ុន បានផ្ដល់ជំនួយអភិវឌ្ឍន៍ផ្លូវការដល់កម្ពុជា ប្រមាណជាង ១៣៤ លានដុល្លារអាមេរិក ក្នុងនោះ ជំនួយឥតសំណងប្រមាណជិត ២០ លានដុល្លារ និងឥណទានសម្បទានប្រមាណជាង ១១៤ លានដុល្លារនៅឆ្នាំ ២០១៨ កន្លងទៅនេះ។ នេះបើតាមការលើកឡើងរបស់រដ្ឋមន្ត្រីការបរទេស កម្ពុជា លោក ប្រាក់ សុខុន កាលពីម្សិលមិញ។
ការលើកឡើងនេះ ក្នុងកម្មវិធីចុះហត្ថលេខាស្ដីពី «ការផ្ដល់ឥណទានសម្បទាន និងហិរញ្ញប្បទានឥតសំណងរបស់ជប៉ុនចំនួនប្រមាណ ៤៣,៣៦ លានដុល្លារអាមេរិក សម្រាប់អនុវត្តលើគម្រោងចំនួន ២ គឺគម្រោងកែលម្អ និងស្ដារប្រព័ន្ធស្រោចស្រព និងប្រព័ន្ធរំដោះទឹកភាគខាងលិចបឹងទន្លេសាប ក្នុងជំហានទី ២» រវាងលោក ប្រាក់ សុខុន ឧបនាយករដ្ឋមន្ត្រី និងជារដ្ឋមន្ត្រីក្រសួងការបរទេស និងសហប្រតិបត្តិការអន្តរជាតិ និងលោក Hidehisa HORINOUCHI ឯកអគ្គរាជទូតជប៉ុនប្រចាំកម្ពុជា នៅទីស្ដីការក្រសួងការបរទេស។
លោក ប្រាក់ សុខុន បានថ្លែងថា គិតចាប់ពីខែមេសា ឆ្នាំ ២០១៨ ដល់ ខែមីនា ២០១៩ នេះ សរុបមក កម្ពុជានិងជប៉ុនបានចុះហត្ថលេខាលើឯកសារសី្តពីជំនួយអភិវឌ្ឍន៍ផ្លូវការរបស់ជប៉ុនដែលផ្តល់ឲ្យរាជរដ្ឋាភិបាលកម្ពុជាសរុបចំនួន ១៤ ៩៩៧ លានយ៉េន គិតជាដុល្លារអាមេរិកប្រមាណ ១៣៤,៣៨ លានដុល្លារ ក្នុងនោះជំនួយឥតសំណងប្រមាណ ១៩,៤២ លានដុល្លារ និងឥណទានសម្បទាន ប្រមាណ ១១៤, ៩៦ លានដុល្លារអាមេរិក។
បន្ថែមលើនេះ លោកបន្តថា រដ្ឋាភិបាលជប៉ុនបានផ្ដល់ហិរញ្ញប្បទានដែលមានទឹកប្រាក់សរុបចំនួន ៤ ៩៣៩ លានយ៉េន (ប្រមាណ ៤៣,៣៦ លានដុល្លារអាមេរិក) កាលពីម្សិលមិញនេះ។ ក្នុងនោះឥណទានសម្បទានចំនួន ៣ ៥៩៩ លានយ៉េន (ប្រមាណ៣១,៥៦ លានដុល្លារអាមេរិក) សម្រាប់អនុវត្ត «គម្រោងកែលម្អ និងស្ដារប្រព័ន្ធស្រោចស្រព និងប្រព័ន្ធរំដោះទឹកភាគខាងលិចបឹងទន្លេសាប ក្នុងជំហានទី ២» និងហិរញ្ញប្បទានឥតសំណងចំនួន ១ ៣៤០ លានយ៉េន (ប្រមាណ ១១,៨ លានដុល្លារអាមេរិក) សម្រាប់អនុវត្ត «គម្រោងអភិវឌ្ឍន៍ប្រព័ន្ធផ្លាស់ប្ដូរទិន្នន័យអគ្គិសនីនៅកំពង់ផែ ដើម្បីធ្វើទំនើបកម្មកំពង់ផែ»។
លោក ប្រាក់ សុខុន បញ្ជាក់ថា ជំនួយឥតសំណង និងឥណទានសម្បទានដែលទើបត្រូវបានចុះហត្ថលេខានេះ នឹងរួមចំណែកយ៉ាងសំខាន់ក្នុងការបន្តអនុវត្តយុទ្ធសាស្ត្រចតុកោណដំណាក់កាលទី ៤ របស់រដ្ឋាភិបាលកម្ពុជាដែលស្របទៅនឹងមុំទី ២ និងទី ៤ ដែលបានសង្កត់ធ្ងន់លើ «ការកែលម្អប្រព័ន្ធឡូជីស្ទីក (Logistics) ការលើកកម្ពស់ការតភ្ជាប់ផ្នែកដឹកជញ្ជូនថាមពល និងឌីជីថល» និង «ការលើកស្ទួយកសិកម្ម និងការអភិវឌ្ឍជនបទ ការគ្រប់គ្រងធម្មជាតិ និងវប្បធម៌ប្រកបដោយចីរភាព» ដែលទាំងនេះជាចលករជួយជំរុញឲ្យកម្ពុជាសម្រេចបាននូវឋានៈជាប្រទេសចំណូលមធ្យមកម្រិតខ្ពស់នៅឆ្នាំ ២០៣០ ខាងមុខ។
លោកថ្លែងថា៖ «ជប៉ុនគឺជាប្រទេសផ្តល់ជំនួយដ៏ធំបំផុតមួយ ដែលបានគាំទ្រគម្រោងអភិវឌ្ឍន៍អាទិភាព របស់រាជរដ្ឋាភិបាលកម្ពុជា តាំងពីដើមទសវត្សរ៍ ១៩៩០ ជាពិសេសការកែលម្អប្រព័ន្ធ Logistics សុខាភិបាល អប់រំ ការអភិវឌ្ឍធនធានមនុស្ស កសិកម្ម និងលើកកម្ពស់ជីវភាពរស់នៅរបស់ប្រជាជន»។
លោក Hidehisa HORINOUCHI ឯកអគ្គរដ្ឋទូតជប៉ុនប្រចាំនៅកម្ពុជា បានថ្លែងក្នុងកម្មវិធីនោះថា រហូតមកទល់ពេលនេះ ប្រទេស ជប៉ុន បាននិងកំពុងពង្រឹងកិច្ចសហប្រតិបត្តិការលើគ្រប់វិស័យជាមួយប្រទេស កម្ពុជា ជាពិសេសជំនួយសម្រាប់កិច្ចសហប្រតិបត្តិការលើគម្រោងកំពង់ផែ វានឹងជួយពង្រឹងសមត្ថកិច្ចមន្ត្រីគ្រប់គ្រងកំពង់ផែ។ ចំណែកជំនួយផ្នែកស្រោចស្រពនេះ ក៏ជាផ្នែកមួយលើកស្ទួយវិស័យកសិកម្ម រុក្ខាប្រមាញ់ និងនេសាទ ក៏ដូចជា ការកែលម្អប្រព័ន្ធបង្ហូរទឹក និងវិស័យពាក់ព័ន្ធផ្សេងៗទៀត ។
លោកបានបន្តថា៖ «ខ្ញុំគិតថា សកម្មភាពរបស់ជប៉ុនទាំងនេះ នឹងរួមចំណែកបង្កើនផលិតកម្មផ្នែកកសិកម្មយ៉ាងខ្លាំងក្លាថែមទៀតដើម្បីឆ្លើយតបកំណើននៃតម្រូវការពិភពលោក និងទំហំពាណិជ្ជកម្មនាំចេញរបស់ប្រទេស កម្ពុជា ជាពិសេសការអភិវឌ្ឍវិស័យកំពង់ផែ និងកសិកម្ម គឺជាអាទិភាពសំខាន់របស់កម្ពុជា ដើម្បីគាំទ្រកំណើនសេដ្ឋកិច្ច» ។
លោក សន ជ័យ ប្រធានអង្គការសម្ព័ន្ធគណនេយ្យភាពសង្គមកម្ពុជា លើកឡើងថា គេសង្កេតឃើញជំនួយរបស់ជប៉ុនតែងតែផ្ដោតសំខាន់លើការអភិវឌ្ឍតាមបែបរូបវន្ដ ហើយការអភិវឌ្ឍបែបនេះ គឺជាតម្រូវការចាំបាច់របស់ប្រជាជននៅក្នុងជីវភាពប្រចាំថ្ងៃ។ ទោះយ៉ាងណា ក៏លោកលើកទឹកចិត្តឲ្យមានការអនុវត្តគម្រោង និងការប្រើប្រាស់ធនធានដែលជាជំនួយជប៉ុនផ្ដល់ឲ្យនេះ ត្រូវប្រកាន់ខ្ជាប់លើគុណភាព និងតម្លាភាព។
លោក សន ជ័យ បានថ្លែងថា៖ «ខ្ញុំសង្កេតឃើញថា ជំនួយរបស់ជប៉ុន គឺគាត់ជួយលើប្រព័ន្ធហេដ្ឋារចនាសម្ព័ន្ធដូចជា ផ្លូវថ្នល់ ស្ពាន សាលារៀន មន្ទីរពេទ្យ និងសមិទ្ធផលផ្សេងទៀត គឺពួកគាត់ចុះធ្វើដោយផ្ទាល់តែម្ដង ហើយយើងឃើញមានប្រសិទ្ធភាពខ្ពស់។ យើងក៏ចង់ឃើញការអនុវត្តជំនួយរបស់ប្រទេសផ្សេងៗទៀតឲ្យមានតម្លាភាពនិងប្រើប្រាស់ឲ្យមានប្រសិទ្ធភាពដើម្បីជាប្រយោជន៍ដល់ប្រជាពលរដ្ឋយើង»៕
