ភ្នំពេញៈ ផ្ទៃដីមានមីនចំនួន ២៤៦,៥ គីឡូម៉ែត្រការ៉េ ត្រូវបានរកឃើញ និងសម្អាត ដោយបានបំផ្លាញចោលមីនប្រឆាំងមនុស្សជិត ៧ ម៉ឺនគ្រាប់ មីនប្រឆាំងរថក្រោះជិត ១ ៥០០ គ្រាប់ និងសំណល់ជាតិផ្ទុះពីសង្គ្រាមជាង ២១ ម៉ឺនគ្រាប់ គិតចាប់ពីឆ្នាំ ២០០៦ រហូតដល់ខែកក្កដា ឆ្នាំ ២០២០ ខណៈពលរដ្ឋប្រមាណជាង ១ លាននាក់ទទួលផលប្រយោជន៍ពីគម្រោងនេះតាមរបាយការណ៍របស់អាជ្ញាធរមីនឲ្យដឹងពីថ្ងៃទី ៩ កញ្ញា ថា គិតចាប់ពីឆ្នាំ ២០០៦ ដល់ខែកក្កដា ឆ្នាំ ២០២០ ផ្ទៃដីមានមីនចំនួន ២៤៦,៥ គីឡូម៉ែត្រការ៉េត្រូវបានរកឃើញ និងបានបំផ្លាញចោលមីនប្រឆាំងមនុស្សចំនួន ៦៩ ៨១៥ គ្រាប់មីនប្រឆាំងរថក្រោះចំនួន ១ ៤៩៦ គ្រាប់ និងសំណល់ជាតិផ្ទុះពីសង្គ្រាមចំនួន ២១២ ៥៥៥ គ្រាប់ដែលបានផ្តល់ផលប្រយោជន៍ជាប្រយោលដល់ប្រជាជនក្នុងសហគមន៍ប្រមាណ ១ ០២៨ ៦៨៣ នាក់ ក្នុងនោះ ៥០ ភាគរយជាស្ត្រី។
របាយការណ៍បន្តថា ចំពោះខេត្តបន្ទាយមានជ័យគឺជាខេត្តមួយក្នុងចំណោមខេត្តដែលមានជនរងគ្រោះថ្នាក់ដោយគ្រាប់មីន ច្រើនជាងគេនៅក្នុងប្រទេសកម្ពុជា។ ផ្ទៃដីមានមីនចំនួន ២២៣ គីឡូម៉ែត្រការ៉េ ត្រូវបានបោសសម្អាត និងយកមកប្រើប្រាស់ ហើយនៅសល់ផ្ទៃដីប្រមាណ ១៤៧ គីឡូម៉ែត្រការ៉េដែលនៅមានការគំរាមដោយសារមីន។ គិតត្រឹមខែមិថុនា ឆ្នាំ ២០២០ ខេត្តបន្ទាយមានជ័យមានជនរងគ្រោះដោយសារមីន និងគ្រាប់ ៨ ៨៨២ នាក់ ស្មើនឹង ១៤% នៃគ្រោះថ្នាក់ទូទាំងប្រទេស។
របាយការណ៍បញ្ជាក់ថា៖ «ដោយឡែក ឃុំអូរបីជាន់គឺជាឃុំ ១ ក្នុងចំណោមឃុំ ដែលមានមីនច្រើនបំផុតក្នុងខេត្តបន្ទាយមានជ័យមានអ្នកស្លាប់ និងរបួសចំនួន ១៣៨ នាក់ (ស្រី ១០ នាក់) ដោយសារមីនចំនួន ១២៨ នាក់។ ឃុំអូរបីជាន់មានផ្ទៃដីដែលបានបោសសម្អាតមីនរួចចំនួន ១៧.៤ គីឡូម៉ែត្រការ៉េ ហើយនៅសល់ផ្ទៃដីសង្ស័យមានមីនចំនួន ១៦,៥ គីឡូម៉ែត្រការ៉េទៀត»។
លោក លី ធុជ ទេសរដ្ឋមន្ត្រីទទួលបន្ទុកបេសកកម្មពិសេស និងជាអនុប្រធានទី ១ នៃអាជ្ញាធរមីនថ្លែងថា នៅថ្ងៃទី ៩ ខែកញ្ញានេះលោកបានដឹកនាំតំណាងប្រទេសម្ចាស់ជំនួយគម្រោងបោសសម្អាតមីន រួមមាន អូស្ត្រាលី សាធារណរដ្ឋកូរ៉េ និងអង្គការ UNDP ចុះទស្សនកិច្ចប្រតិបត្តិការបោសសម្អាតមីនរបស់ប្រតិបត្តិករស៊ីម៉ាក់ស្ថិតនៅភូមិប្រាសាទ ឃុំអូរបីជាន់ និងបានជួបសំណេះសំណាលជាមួយអ្នកទទួលផលលើដីបោសសម្អាតមីនរួចផងដែរ។
លោកថា លើសពីនេះកម្ពុជាបានទទួលថវិកាពីម្ចាស់ជំនួយ និងប្រទេសជាមិត្តដ៏ឆ្នើមដទៃទៀតរួមមាន សហរដ្ឋអាមេរិក អង់គ្លេស ជប៉ុន អាល្លឺម៉ង់ ស្វ៊ីស ចិន ន័រវែសកាណាដា អៀរឡង់ និង UNICEF។ ក្រៅពីនេះមានមូលនិធិអង្គការសង្គមស៊ីវិល និងសប្បុរសជនមួយចំនួនទៀត ដើម្បីដោះស្រាយបញ្ហាមីន និងរួមចំណែកក្នុងការសម្រេចឲ្យបាននូវផែនការយុទ្ធសាស្ត្រជាតិសកម្មភាពមីនឆ្នាំ ២០១៨-២០២៥។
លោក លី ធុជ បញ្ជាក់ថា៖ «យើងបានជួបសំណេះសំណាលដោយផ្ទាល់ជាមួយអ្នកទទួលផលពីដីដែលបានបោសសម្អាតមីនរួចព្រមទាំងបានប្រគល់ជូននូវលិខិតបញ្ជាក់ដល់ភូមិចំនួន ៥ ដែលជាភូមិអស់ការគំរាមដោយសារមីន។ ខេត្តបន្ទាយមានជ័យត្រូវបានយកចិត្តទុកដាក់ខ្ពស់ពីរាជរដ្ឋាភិបាលកម្ពុជា និងម្ចាស់ជំនួយលើការងារបោសសម្អាតមីន»។
គេហទំព័ររបស់អង្គការកម្មវិធីអភិវឌ្ឍន៍សហប្រជាជាតិប្រចាំកម្ពុជា (UNDP Cambodia) នៅថ្ងៃទី ៩ ខែកញ្ញា បានឲ្យដឹងថា បើទោះបីក្នុងអំឡុងពេលជំងឺកូវីដ១៩ក៏ដោយ ក៏គម្រោងបោសសម្អាតមីននៅតែបន្តមានសមត្ថភាពពេញលេញក្នុងការបន្តជួយសង្គ្រោះជីវិតប្រជាជនដែលរងផលប៉ះពាល់ដោយសារមីន។ ក្នុងនោះមានការគាំទ្រដោយ UNDP រដ្ឋាភិបាលអូស្ត្រាលី សាធារណរដ្ឋកូរ៉េប្រទេសនូវែលសេឡង់ និងម្ចាស់ជំនួយដទៃទៀត ខណៈអាជ្ញាធរមីនជាអ្នកអនុវត្តគម្រោងនេះ។
UNDP បន្តថា នាថ្ងៃនោះដែរ មន្ត្រីជាន់ខ្ពស់ និងតំណាងនៃអាជ្ញាធរមីន UNDP រដ្ឋាភិបាលអូស្ត្រាលី សាធារណរដ្ឋកូរ៉េ និងនូវែលសេឡង់បានចុះពិនិត្យចម្ការមីន ១ ក្នុងឃុំអូរបីជាន់នៃខេត្តបន្ទាយមានជ័យ។ ក្នុងឃុំនេះមានចម្ការមីនចំនួន ២៤៣ ដែលត្រូវបានបោសសម្អាតមីន និងយុទ្ធភណ្ឌសល់ពីសង្គ្រាមរួចរាល់សម្រាប់សហគមន៍បង្កបង្កើនផល និងប្រើប្រាស់ដី។
កាលពីខែកុម្ភៈ ឆ្នាំ ២០២០ លោកនាយករដ្ឋមន្ត្រី ហ៊ុន សែន មានប្រសាសន៍ថា កម្ពុជាប្តេជ្ញាក្នុងការបោសសម្អាតមីនក្នុងតំបន់ដែលរងផលប៉ះពាល់ឲ្យអស់ត្រឹមឆ្នាំ ២០២៥។ លោកថា កម្ពុជាត្រូវការថវិកាប្រមាណ ៣៧៧ លានដុល្លារអាមេរិក សម្រាប់ធ្វើការបោសសម្អាតគ្រាប់មីន និងគ្រាប់សំណល់ជាតិផ្ទុះពីសង្គ្រាមដែលនៅសល់ផ្សេងទៀតលើផ្ទៃដីប្រមាណ ៨០៦ គីឡូម៉ែត្រការ៉េ៕