ភ្នំពេញៈ អយ្យការអមសាលាដំបូងរាជធានីភ្នំពេញបានសម្រេចដោះលែង កូនប្រសា និងកូនស្រីបង្កើតលោកឧកញ៉ា ហេង សៀ ឱ្យមានសេរីភាពវិញ បន្ទាប់ពីនគរបាលរាជធានីភ្នំពេញបានបញ្ជូនបុរសជាកូនប្រសា ទៅតុលាការបានប៉ុន្មានម៉ោង ខណៈដែលកូនស្រីលោក ហេង សៀ កំពុងស្ថិតនៅស្នងការដ្ឋាននគរបាលរាជធានីនៅឡើយ។
នៅពីព្រឹកថ្ងៃទី ១៧ ឧសភា នគរបាលរាជធានីភ្នំពេញបានបញ្ជូនខ្លួនកូនប្រសាឧកញ៉ា ហេង សៀ គឺលោក ឃន ឈុនតារា ទៅតុលាការពាក់ព័ន្ធនឹងការរកឃើញភ័ស្តុតាងថ្មីទៅនឹងការជួលមនុស្សប្រុសស្រីថតពាក់ព័ន្ធនឹងរឿងក្តីរវាងកញា មាន ពេជ្ររីតា និងឧកញ៉ា ហេង សៀ។
លោក ឃន ឈុនតារា ដែលត្រូវជាកូនប្រសា និងអ្នកស្រី តាំង គីមហៀង ជាកូនស្រីបង្កើតលោក ហេង សៀ ត្រូវបានសមត្ថកិច្ចឃាត់ខ្លួនជាបន្តបន្ទាប់កាលពីយប់ថ្ងៃទី ១៥ ខែ ឧសភា ឆ្នាំ ២០២១ ដើម្បីយកទៅសាកសួរ។
យ៉ាងណាក្តី ក្រោយទទួលបានសំណុំរឿងនេះ មិនទាន់បានប៉ុន្មានម៉ោងផង អយ្យការអមសាលាដំបូងរាជធានីភ្នំពេញបានចេញសេចក្តីថ្លែងការណ៍មួយ ដោយសម្រេចដោះលែងប្តីប្រពន្ធទាំង ២ នាក់នេះ ឱ្យមានសេរីភាពវិញ ដោយបញ្ជាក់ថា ពួកគេមិនមានជាប់ពាក់ព័ន្ធនោះទេ។
សេចក្តីថ្លែងការណ៍នេះបានរៀបរាប់ថា ក្រោយការសួរនាំលោក ឃន ឈុនរា និងអ្នកស្រី តាំង គីមហៀង ពួកគេទាំង ២ បញ្ជាក់ថា គឺពិតជាបានជ្រើសរើសមនុស្ស ២ នាក់ គឺស្រីម្នាក់ និងបុរសម្នាក់ដែលមានលក្ខណៈភិនភាគប្រហាក់ប្រហែលកញ្ញា មាន ពេជ្ររីតា និងឈ្មោះ ហេង សៀ ដើម្បីថតសម្ដែងត្រាប់តាមអង្គហេតុជម្លោះដែលកើតមានឡើងកាលពីថ្ងៃទី ៤ ឧសភាក្នុងរថយន្តកើតហេតុ។
ជាមួយនឹងការបញ្ជាក់នេះ អយ្យការអមសាលាដំបូងរាជធានីភ្នំពេញបានបង្ហាញថា សមត្ថកិច្ចមានវីដេអូនៃការធ្វើត្រាប់អង្គហេតុក្នុងរថយន្តនេះជាភ័ស្តុតាង សំអាង ប៉ុន្តែពុំមានភ័ស្តុតាងណាមួយអំពីការផលិតជាវីដេអូអាសអាភាស ឬរូបភាពអាសអាភាស ដែលត្រូវបានចែកចាយក្នុងបណ្តាញសង្គម ផលិតដោយប្តីប្រពន្ធ ២ នាក់នេះឡើយ។
បន្ថែមពីនេះ តាមចម្លើយរបស់ពួកគេទាំង ២ ក៏បានបង្ហាញដែរថា ពួកគេបានទទួលរូបភាពអាសអាភាសដែលមានប្រភពមិនច្បាស់លាស់តាមបណ្តាញសង្គម និងបានចែករំលែករូបភាពទាំងនេះតាមប្រព័ន្ធ WhatsApp និង Telegram ឱ្យមនុស្សចំនួន ៧ នាក់។
សេចក្តីថ្លែងការណ៍នេះបានបញ្ជាក់ថា៖ «អយ្យការរាជធានីភ្នំពេញបានទទួលពិនិត្យយ៉ាងហ្មត់ចត់នូវលទ្ធផលនៃការស៊ើបអង្កេតខាងលើនេះ និងបានសម្រេចដោះលែងឈ្មោះ ឃន ឈុនតារា និងឈ្មោះ តាំង គីមហៀង។ សម្រេចបន្តការស៊ើបអង្កេតស្រាវជ្រាវ ប្រភពការផលិតរូបភាពអាសអាភាស ដែលត្រូវបានចែកចាយលើបណ្តាញសង្គម ដែលអំពើផលិតរូបភាពអាសអាភាស ដើម្បីចែកចាយជាសាធារណ:នេះ គឺជាអំពីធ្វើឱ្យប៉ះពាល់ដល់ប្រពៃណីខ្មែរ សីលធម៌សង្គម និងសេចក្តីថ្លៃថ្នូររបស់ស្ត្រី និងដែលត្រូវផ្តន្ទាទោសតាមច្បាប់កម្ពុជា»។
ភ្នំពេញប៉ុស្តិ៍មិនអាចទាក់ទងលោក ឃន ឈុនតារា និងអ្នកស្រី តាំង គីមហៀង ដើម្បីសុំការបកស្រាយបន្ថែមជុំវិញករណីនេះបានទេនៅថ្ងៃទី ១៧ ឧសភាដោយសារលេខទូរស័ព្ទពួកគាត់ មិនអាចទាក់ទងបាន។
យ៉ាងណាក្តីយោងតាមលិខិតបំភ្លឺ និងសុំអភ័យទោសរបស់លោក ឃន ឈុនដារ៉ា ចុះថ្ងៃទី ១៧ ឧសភា បញ្ជាក់ថា កាលពីថ្ងៃទី ១៤ ខែឧសភា លោកពិតជាបានចែករំលែករូបភាពមិនសមរម្យ ១ សន្លឹកទៅមនុស្ស ៧ នាក់ តាមប្រព័ន្ធ WhatsApp និង ប្រព័ន្ធ Talegram ក្រោយពីទទួលបានរូបនេះបន្តពីអ្នកដទៃ ដោយពុំបានដឹងពីប្រភពដើម។
លិខិតនោះបញ្ជាក់ថា៖ «ខ្ញុំពិតជាមានការសោកស្តាយ ដោយបានចែករំលែករូបភាពមិនសមរម្យនេះ។ ប្រសិនបើរូបភាពនេះអាចបង្កើតឱ្យមានការភាន់ច្រឡំ ធ្វើឱ្យប៉ះពាល់ដល់កិត្តិយស និងសេចក្តីថ្លៃថ្នូររបស់ កញ្ញា មាន ពេជ្រវីតា ខ្ញុំសូមអភ័យទោសចំពោះការចែករំលែករូបភាព មិនសមរម្យនេះ និងសន្យាថា នឹងមិនឱ្យករណីនេះកើតមានជាថ្មីទៀតឡើយ»។
ក្រៅពីនេះលោក ឃន ឈុនតារា ក៏បានទទួលស្គាល់នូវសកម្មភាពដែលលោកបានស្វែងរក និងជ្រើសរើសមនុស្សចំនួន ២ នាក់ ដើម្បីថតជាវីដេអូឃ្លីប ធ្វើត្រាប់តាមអង្គហេតុដែលបានកើតឡើងក្នុងរថយន្ត ដោយសំអាងថា ការធ្វើនេះ គឺដើម្បីស្វែងយល់ឱ្យបានច្បាស់លាស់អំពីដំណើររឿងហេតុ ដែលបានកើតឡើងនៅក្នុងរថយន្តនេះប៉ុណ្ណោះ។
លោកស្រី មាស ស៊ីថន សហមេធាវីការពារក្តីកញ្ញា មាន ពេជ្ររីតា ប្រាប់ភ្នំពេញប៉ុស្តិ៍នៅថ្ងៃ ១៧ ឧសភាថា ក្រុមមេធាវីមិនទាន់សម្រេចយ៉ាងណាទេ ដោយសុំពេលដើម្បីពិភាក្សាជាមុន និងចង់ឱ្យកូនក្តីបានសម្រាកមួយរយៈ បន្ទាប់ពីទទួលរងការប៉ះពាល់ផ្លូវចិត្តធ្ងន់ធ្ងរ៕