ភ្នំពេញៈ គណៈកម្មាធិការសហប្រតិបត្តិការដើម្បីកម្ពុជា (CCC) និងជាតំណាងឲ្យអង្គការសង្គមស៊ីវិលដែលមានសមាជិកធំជាងគេនៅកម្ពុជាបានអះអាងនៅចំពោះមុខមន្ត្រីនគរបាលជាន់ខ្ពស់នៃក្រសួងមហាផ្ទៃកាលពីម្សិលមិញអំពីក្ដីព្រួយបារម្ភនារយៈពេល ១ ឆ្នាំចុងក្រោយចំពោះការភ្ជាប់ពួកគេទៅនឹងបរិបទនយោបាយ និងចលនាប្រឆាំងនានានៅក្នុងបដិវត្តន៍ពណ៌ដែលបានកើតឡើងក្រោយការបោះឆ្នោតថ្នាក់ជាតិក្នុងឆ្នាំ ២០១៣ ដែលរដ្ឋាភិបាលចាត់ទុកជាចលនាផ្ដួលរំលំគណបក្សកំពុងកាន់អំណាច។
ការបង្ហាញនូវក្ដីបារម្ភនេះបានធ្វើឡើងនៅក្នុងវេទិកាស្ដីពីភាពជាដៃគូរវាងរដ្ឋាភិបាល និងអង្គការសង្គមស៊ីវិលដែលរៀបចំដោយក្រសួងមហាផ្ទៃដើម្បីសហការគ្នាក្នុងការចូលរួមលើកកម្ពស់លទ្ធិប្រជាធិបតេយ្យ ដែលមានមន្ត្រីនគរបាលជាន់ខ្ពស់ តំណាងឲ្យអង្គការសង្គមស៊ីវិល និងដៃគូរអភិវឌ្ឍន៍ប្រមាណជិត ៤០០ នាក់ចូលរួម។
លោក សឿង សារឿន ប្រធានអង្គការ CCC បានថ្លែងសុន្ទរកថានៅក្នុងវេទិកាថា៖ «បើទោះបីជាស្ថានភាពទូទៅនៃកិច្ចសហប្រតិបត្តិការរវាងរាជរដ្ឋាភិបាល និងអង្គការសង្គមស៊ីវិលមានភាពល្អប្រសើរជិត ៣ ទសវត្សរ៍កន្លងមក ប៉ុន្តែសង្គមស៊ីវិលបានទទួលរងនូវក្ដីព្រួយបារម្ភមួយចំនួនដូចជាការភ្ជាប់អង្គការសង្គមស៊ីវិលទៅនឹងបរិបទនយោបាយ និងចលនាប្រឆាំងនានាដូចជា អង្គការសង្គមស៊ីវិលចូលរួមក្នុងបដិវត្តន៍ពណ៌ជាដើម។ល។»។
លោក សារឿន ថ្លែងផងដែរថា៖ «យើងខ្ញុំសង្ឃឹមយ៉ាងមុតមាំថា សង្គមស៊ីវិលនឺងទទួលបាននូវបរិយាកាសអំណោយផលលំហប្រជាធិបតេយ្យ កិច្ចសហប្រតិបត្តិការ និងមានការអនុវត្តក្របខ័ណ្ឌច្បាប់ ប្រកបដោយគតិយុត្ត សុចរិត យុត្តិធម៌និងមិនលម្អៀង»។
ទោះបីយ៉ាងណាក៏ដោយលោក ស ខេង រដ្ឋមន្ត្រីក្រសួងមហាផ្ទៃក៏បានអះអាងនៅក្នុងវេទិកាផងដែរថារាជរដ្ឋាភិបាលមិនបានភ្ជាប់អង្គការសង្គមស៊ីវិលណាមួយទៅនឹងចលនាបដិវត្តន៍ពណ៌នោះឡើយ ប៉ុន្តែអង្គការសង្គមស៊ីវិលមួយចំនួនបានធ្វើសកម្មភាពបំផុសប្រជាពលរដ្ឋឲ្យធ្វើការតវ៉ាប្រឆាំងនឹងការអនុវត្តច្បាប់ក្រោមហេតុផលសិទ្ធិមនុស្ស និងលទ្ធិប្រជាធិបតេយ្យ។
លោករដ្ឋមន្ត្រីបានថ្លែងផងដែរថាក្នុងឱកាសកម្ពុជាកំពុងរៀបចំការបោះឆ្នោតជ្រើសតាំងតំណាងរាស្ត្រនៅខែកក្កដានេះ រាជរដ្ឋាភិបាលបានធានាឲ្យការបោះឆ្នោតប្រព្រឹត្តទៅដោយសេរី ត្រឹមត្រូវ យុត្តិធម៌ និងជំរុញលើកកម្ពស់ដំណើរការប្រជាធិបតេយ្យ។
លោក ស ខេង ថ្លែងថា៖ «ខ្ញុំសង្ឃឹមយ៉ាងមុតមាំថាវេទិកាថ្ងៃនេះនឹងធ្វើឲ្យរាជរដ្ឋាភិបាល និងអង្គការសង្គមស៊ីវិលមានការយល់គ្នាកាន់តែច្បាស់លាស់»។
លោក ស ខេង ថ្លែងផងដែរថា៖ «ដូច្នេះអង្គការសង្គមស៊ីវិលគួរដាក់ខ្លួនឲ្យឆ្ងាយ មិនមែនគំរាមទេ បើមានភ័ស្តុតាងគ្រប់គ្រាន់ អង្គការ ឬមិនអង្គការត្រូវទទួលខុសត្រូវចំពោះមុខច្បាប់ បើអង្គការសង្គមស៊ីវិលភ្ជាប់ខ្លួនទៅនឹងរឿងហ្នឹងហើយទៅចូលរួមដៃជើង ចូលរួមនឹងបដិវត្តន៍ពណ៌មិនលេងជាមួយទេ។ ពង្រឹងភាពជាដៃគូ យើងទាំងអស់គ្នាមិនគួរចាត់ទុកគ្នាជាគូបដិបក្ខទេក្នុងនាមរាជរដ្ឋាភិបាល ក្រសួងមហាផ្ទៃ និងខ្ញុំបន្តចូលរួមលើកកម្ពស់លទ្ធិប្រជាធិបតេយ្យ។
យោងតាមឯកសាររបស់នគរបាលជាតិឆ្នាំ ២០១៧ បានបង្ហាញថាបដិវត្តន៍ពណ៌ដែលដឹកនាំដោយគណបក្សប្រឆាំងមិនត្រឹមតែអង្គការសង្គមស៊ីវិល និងអង្គការក្រៅរដ្ឋាភិបាលប៉ុណ្ណោះទេថែមទាំងមានធនាគារ និងគ្រឹះស្ថានមីក្រូហិរញ្ញវត្ថុទៀតផង។ ក្នុងនោះមានអង្គការសមធម៌កម្ពុជា អង្គការសិទិ្ធលំនៅឋាន អង្គការសិទ្ធិមនុស្ស អង្គការក្រៅសមាគមធាងត្នោត និងសហជីពចំនួន ១១ រួមទាំងមាន វិទ្យុអាស៊ីសេរី វិទ្យុសំឡេងសហរដ្ឋអាមេរិក និងសំឡេងលទ្ធិប្រជាធិបតេយ្យថែមទៀត។
ពាក់ព័ន្ធនឹងបដិវត្តន៍ពណ៌នេះផងដែរតុលាការកំពូលកាលពីចុងឆ្នាំ ២០១៧ បានសម្រេចឃុំខ្លួនលោក កឹម សុខា ប្រធានគណបក្សសង្គ្រោះជាតិ និងរំលាយគណបក្សប្រឆាំងមួយនេះដោយរងការចោទប្រកាន់ពីអំពើក្បត់ជាតិ និងហាមសិទ្ធិនយោបាយ ៥ ឆ្នាំលើមន្ត្រីចំនួន ១១៨ នាក់៕