.jpg)
លោក ហ៊ុន សែន និងលោក ង្វៀន សួនហ៊្វុក និងប្រតិភូពិសារអាហាររួមគ្នានៅក្រុងហាណូយ។ រូបថត SPM
ភ្នំពេញៈ លោក ហ៊ុន សែន នាយករដ្ឋមន្ត្រីនៃព្រះរាជាណាចក្រកម្ពុជា និងលោក ង្វៀន សួនហ៊្វុក នាយករដ្ឋមន្ត្រីវៀតណាម បានឯកភាពជំរុញឲ្យអ្នកជំនាញកិច្ចការព្រំដែននៃប្រទេសទាំង ២ ពន្លឿនការដោះស្រាយ និងបញ្ចប់ព្រំដែនគោកដែលនៅសល់ប្រមាណ ១៦ ភាគរយដោយផ្អែកលើស្មារតីមិត្តភាព និងអ្នកជិតខាងល្អ។
ការឯកភាពគ្នានៃប្រទេសទាំង ២ បានធ្វើឡើងនៅក្នុងដំណើរទស្សនកិច្ចជាផ្លូវការរបស់លោកនាយករដ្ឋមន្ត្រីទៅកាន់ប្រទេសវៀតណាមកាលពីថ្ងៃទី ៧-៨ ខែធ្នូ ដើម្បីពង្រីក និងពង្រឹងទំនាក់ទំនងដែលមានស្រាប់នៃប្រទេសទាំង ២។
នៅក្នុងសន្និសីទកាសែតរួមនៃនាយករដ្ឋមន្ត្រីទាំង ២ ដែលបានធ្វើឡើងនៅក្នុងទីក្រុងហាណូយ លោកនាយករដ្ឋមន្ត្រី ហ៊ុន សែន បានថ្លែងថា៖ «បញ្ហាសេសសល់ទៅលើបញ្ហាព្រំដែន យើងក៏បានខិតខំដោះស្រាយ ហើយថ្ងៃនេះក៏បានរកឃើញនូវចំណុចដើម្បីជំរុញការដោះស្រាយបន្តដើម្បីបញ្ចប់ការងារនេះឲ្យឆាប់ ខ្ញុំពិតជាមានការរីករាយ ដោយព្រំដែនកម្ពុជា-វៀតណាម បច្ចុប្បន្ននេះក្លាយទៅជាព្រំដែនមិត្តភាព ហើយកំពុងមានការអភិវឌ្ឍយ៉ាងខ្លាំងមានកន្លែងមួយចំនួនដែលជាអតីតសមរភូមិសង្គ្រាមកំពុងតែក្លាយទៅជាទីផ្សាររួចស្រេចទៅហើយ»។
យោងតាមសេចក្តីថ្លែងការណ៍របស់ក្រសួងការបរទេសដែលបានចេញផ្សាយកាលពីថ្ងៃទី ៨ ខែធ្នូឆ្នាំ ២០១៨ បានឲ្យដឹងថា៖ «សម្ដេចតេជោ ហ៊ុន សែន និងឯកឧត្តម ង្វៀន សួនហ៊្វុក បានពិភាក្សាយ៉ាងទូលំទូលាយអំពីការដោះស្រាយបញ្ហាព្រំដែន។ ថ្នាក់ដឹកនាំទាំង ២ ស្វាគមន៍សមិទ្ធផលនៃការងារខណ្ឌសីមា និងបោះបង្គោលព្រំដែនកន្លងមក និងបានឯកភាពគ្នាជំរុញឲ្យគណៈកម្មការចម្រុះខណ្ឌសីមាព្រំដែនទាំងសងខាងពន្លឿនការដោះស្រាយ បញ្ចប់បញ្ហាព្រំដែនគោកដែលនៅសេសសល់ចំនួន ១៦ ភាគរយផ្អែកលើស្មារតីនៃមិត្តភាព និងភាពជាអ្នកជិតខាងល្អ សំដៅកសាងខ្សែបន្ទាត់ព្រំដែនរួមប្រកបដោយមិត្តភាព សន្តិភាព ស្ថិរភាព និងសហប្រតិបត្តិការរឹងមាំយូរអង្វែងសម្រាប់ប្រជាជនជំនាន់ក្រោយ»។
លោក ហ៊ុន សែន បានថ្លែងផងដែរថា៖ «អ្វីដែលជាលទ្ធផលធំបំផុតនៅក្នុងដំណើរទស្សនកិច្ចនេះគឺការពង្រឹង និងពង្រីកនៃទំនាក់ទំនងដែលមានស្រាប់រវាងប្រទេសទាំង ២ កិច្ចព្រមព្រៀង និងអនុស្សរណៈដែលបានចុះហត្ថលេខាគឺជាការបន្តពង្រីក និងពង្រឹងកិច្ចសហប្រតិបត្តិការ និងជំរុញទំនាក់ទំនងរវាងប្រទេសទាំង ២ ឲ្យកាន់តែប្រសើរឡើង»។
ប្រធានគណៈកម្មការព្រំដែនកម្ពុជាលោក វ៉ា គឹមហុង បានថ្លែងប្រាប់កាសែតភ្នំពេញប៉ុស្តិ៍កាលពីម្សិលមិញថា រាជរដ្ឋាភិបាលប្រទេសកម្ពុជា-វៀតណាមបានចុះហត្ថលេខាទទួលស្គាល់លទ្ធផល ៨៤ ភាគរយនៃការបោះបង្គោលព្រំដែន ហើយបានប្តេជ្ញាប្រឹងប្រែងបោះបង្គោលព្រំដែនហើយនៅសល់ ១៦ ភាគរយទៀត ប្រទេសកម្ពុជា និងប្រទេសវៀតណាមបានស្នើទៅប្រទេសបារាំងធ្វើការចម្លងផែនទីពីផែនទីខ្នាត 1/100.000 មកផែនទី UTM ខ្នាត 1/50.000 វិញនិងថាខាងប្រទេសបារាំងបានឯកភាពហើយក៏បានស្នើឲ្យប្រទេសទាំង ២ គឺប្រទេសកម្ពុជា និងប្រទេសវៀតណាមធ្វើបែបបទនីតិវិធីបន្ថែម។
លោកបានបញ្ជាក់ថា៖ «គាត់ (បារាំង) បានស្នើឲ្យយើងបញ្ជូនបែបបទបន្ថែមទៅ យើងមានការយឺតយ៉ាវលើបែបបទ បច្ចេកទេសដោយសារយើងមិនទាន់ឯកភាពគ្នាពីព្រោះវាជាឯកសារលម្អិត ហើយខ្ញុំមិនអាចជម្រាបជូនបានទេ ហើយយើងនិយាយមិនទាន់ចុះសម្រុងគ្នា។ យើងនឹងខិតខំធ្វើបញ្ចប់ក្នុងពេលខាងមុខតាមការណែនាំរបស់នាយករដ្ឋមន្ត្រីទាំង ២ ហើយអាចបញ្ជូនបែបបទទៅបារាំងហើយគេបញ្ជូនអ្នកបច្ចេកទេសគេមក»។
ក្នុងពេលចូលរួមពិធីលាងសាយភោជនដែលរៀបចំដោយនាយករដ្ឋមន្ត្រីវៀតណាម លោក ង្វៀន សួនហ៊្វុក នៅយប់ថ្ងៃទី ៧ ខែធ្នូ ឆ្នាំ ២០១៨ នៅទីក្រុងហាណូយ លោក ហ៊ុន សែន បានថ្លែងថាប្រទេសកម្ពុជា និងវៀតណាម នៅតែអាចរក្សាបានទំនាក់ទំនងល្អប្រសើរ បើទោះបីស្ថានការណ៍នយោបាយនៅលើពិភពលោកនាពេលបច្ចុប្បន្នមានការប្រែប្រួលយ៉ាងស្រួចស្រាល់ក្តី។
លោក ហ៊ុន សែន ថ្លែងថា៖ «ទោះបីសភាពការណ៍នយោបាយនៅលើសកលលោកមានការប្រែប្រួលយ៉ាងស្រួចស្រាល់ ឆាប់រហ័ស និងពិបាកប៉ាន់ស្មានយ៉ាងណាក៏ដោយ ក៏ប្រទេសយើងទាំង ២ រក្សាបាននូវមិត្តភាពមនោសញ្ចេតនា និងការយោគយល់គ្នាប្រកបដោយស្មារតីជឿជាក់គ្នាទៅវិញទៅមកក្នុងភាពជាប្រទេសភូមិផងរបងតែមួយ»។
លោកថ្លែងបន្ថែមថា៖ «ជាមួយនឹងការជឿជាក់ និងភាតរភាពនេះកម្ពុជា និងវៀតណាមត្រូវរួមគ្នាអនុវត្តឲ្យម៉ឺងម៉ាត់ ដើម្បីសម្រេចឲ្យបានជោគជ័យរាល់ទិសដៅដែលប្រទេសទាំង ២ បានដាក់ចេញ។ ក្នុងនោះត្រូវខិតខំរួមគ្នាបន្តដោះស្រាយឲ្យបានឆាប់នូវបញ្ហាមួយចំនួនដែលនៅសេសសល់ដូចជាខណ្ឌសីមា និងបោះបង្គោលព្រំដែន»។
លោកនាយករដ្ឋមន្ត្រី ហ៊ុន សែន និងលោក ង្វៀន ហ៊្វូជុង ប្រធានរដ្ឋវៀតណាម កាលពីថ្ងៃទី ៧ ខែធ្នូ ឆ្នាំ ២០១៨ នៅទីក្រុងហាណូយ ប្រទេសវៀតណាម។ រូបថត ហ្វេសប៊ុក SPM
ប្រទេសកម្ពុជា និងវៀតណាមមានព្រំដែនគោកជាប់គ្នាប្រវែង ១២៧០ គីឡូម៉ែត្រដែលត្រូវការបោះបង្គោលព្រំដែនសរុបចំនួន ៣១៤ បង្គោល។
លោក ហ៊ុន សែន បានថ្លែងប្រាប់លោក ង្វៀន សួនហ៊្វុក និងក្រុមមន្ត្រីវៀតណាមផងដែរថា ការឃោសនាដែលថាប្រទេសកម្ពុជាមានការត្រៀមរៀបចំកសាងមូលដ្ឋានយោធាបរទេស វាគឺជាព័ត៌មានមិនពិត កុហក និងបំផ្លិចបំផ្លាញហើយថារដ្ឋធម្មនុញ្ញកម្ពុជាមិនអនុញ្ញាតឲ្យមានមូលដ្ឋានកងទ័ពបរទេសនៅកម្ពុជានោះទេហើយការលើកឡើងនេះប្រសិនការឃោសនានោះបន្តទៅទៀត វានឹងធ្វើឲ្យប្រទេសជិតខាង និងក្នុងតំបន់មានការព្រួយបារម្ភ។
លោកថ្លែងថា៖ «វាអាចនឹងក្លាយទៅជាកង្វល់នៃបណ្តាប្រទេសជិតខាង រួមទាំងប្រទេសក្នុងតំបន់ផងដែរ ប្រសិនបើការឃោសនានេះបន្តតទៅទៀត ហើយខ្ញុំសង្ឃឹមថានឹងបញ្ចប់នូវពាក្យចចាមអារ៉ាមដ៏អាក្រក់មួយនេះសម្រាប់កម្ពុជា»។
លោក ហ៊ុន សែន បានលើកឡើងដែរថាក្នុងឱកាសប្រារព្ធខួប ៤០ ឆ្នាំនៃថ្ងៃជ័យជម្នះ ៧ មករានៅឆ្នាំ ២០១៩ ខាងមុខនេះកម្ពុជានឹងរៀបចំប្រារព្ធពិធីឲ្យបានអធិកអធម ដើម្បីបង្ហាញនូវសច្ចភាពប្រវត្តិសាស្ត្រថ្ងៃ ៧ មករាដែលបានរំដោះប្រទេស រំដោះជីវិតប្រជាពលរដ្ឋកម្ពុជាហើយថា ប្រទេសវៀតណាមមានតួនាទីយ៉ាងសំខាន់ក្នុងការជួយរំដោះប្រទេស និងទប់ស្កាត់កុំឲ្យរបបខ្មែរក្រហមវិលត្រឡប់មកវិញហើយរដ្ឋាភិបាលកម្ពុជា និងប្រជាជនកម្ពុជា ចងចាំជានិច្ចចំពោះការលះបង់ និងការជួយជ្រោមជ្រែងរបស់រដ្ឋាភិបាល និងប្រជាជនវៀតណាមក្នុងការជួយរំដោះប្រទេស និងប្រជាជនកម្ពុជាចេញពីរបបខ្មែរក្រហម។
លោកបានបញ្ជាក់ថា៖ «កម្ពុជានឹងរៀបចំប្រារព្ធពិធីឲ្យបានអធិកអធមដើម្បីបង្ហាញឲ្យកាន់តែច្បាស់អំពីគុណតម្លៃនៃថ្ងៃ ៧ មករា ការរស់រានមានជីវិតជាថ្មីរបស់ប្រជាជន និងការរីកចម្រើនរបស់កម្ពុជាពិសេសរំលេចឲ្យឃើញច្បាស់នូវតួនាទី និងគុណបំណាច់របស់វៀតណាមក្នុងបុព្វហេតុរំដោះកម្ពុជា និងជួយទប់ស្កាត់ការវិលត្រឡប់មកវិញនៃរបបវាលពិឃាតខ្មែរក្រហម»។
ប្រទេសកម្ពុជាបានចុះហត្ថលេខាជាមួយប្រទេសវៀតណាមលើឯកសារសំខាន់ៗចំនួន ៦ រួមមាន៖ អនុស្សរណៈនៃការយោគយល់គ្នាស្តីពីយុទ្ធសាស្ត្រសហប្រតិបត្តិការលើវិស័យដឹកជញ្ជូនសម្រាប់រយៈពេល ៧ ឆ្នាំពីឆ្នាំ ២០១៨-២០២៥ វិសោធនកម្មពិធីសារ (ឆ្នាំ ២០០៥) សម្រាប់ការអនុវត្តកិច្ចព្រមព្រៀងនៃការដឹកជញ្ជូនតាមផ្លូវគោក (ឆ្នាំ ១៩៩៨) វិសោធនកម្មកិច្ចព្រមព្រៀងស្តីពីការដឹកជញ្ជូនផ្លូវទឹក (ឆ្នាំ ២០០៩) កិច្ចព្រមព្រៀងពាណិជ្ជកម្មតាមព្រំដែន កម្ពុជា-វៀតណាម កិច្ចសម្របសម្រួលជំរុញពាណិជ្ជកម្មទ្វេភាគីកម្ពុជា-វៀតណាមសម្រាប់ឆ្នាំ ២០១៨-២០១៩ ស្តីពីការអនុគ្រោះលើពន្ធបន្ទាត់ ពន្ធគយឲ្យគ្នាទៅវិញទៅមក និង កិច្ចព្រមព្រៀងស្តីពីការទប់ស្កាត់ការជួញដូរ ការជីកកកាយដោយខុសច្បាប់ និងការនាំត្រឡប់មកវិញនូវសម្បត្តិបេតិកភណ្ឌនៃប្រទេសទាំង ២ កម្ពុជា-វៀតណាម។
លោកនាយករដ្ឋមន្ត្រី ហ៊ុន សែន បានថ្លែងថានឹងសម្រេចឲ្យបានទំហំពាណិជ្ជកម្ម ៥ ពាន់លានដុល្លារនៅឆ្នាំ ២០២០ និងការតភ្ជាប់គ្រប់វិស័យរវាងកម្ពុជា និងវៀតណាម និងការទប់ស្កាត់ ទង្វើខុសច្បាប់គ្រប់ទម្រង់ និងគ្រប់រូបភាពនៅតាមព្រំដែនជាដើម៕
