ភ្នំពេញ: បុរសជនជាតិនីហ្សេរីយ៉ាម្នាក់ និងស្ត្រីខ្មែរចំនួន ២ នាក់ ត្រូវបានសមត្ថកិច្ចប្រឆាំងបទល្មើសគ្រឿងញៀនបញ្ជូនទៅសាលាដំបូងរាជធានីភ្នំពេញកាលពីម្សិលមិញ បន្ទាប់ពីឃាត់ខ្លួននៅសង្កាត់វាលវង់ខណ្ឌ ៧ មករា កាលពីថ្ងៃទី ១១ ខែវិច្ឆិកា ពាក់ព័ន្ធករណីលាក់គ្រឿងញៀនជិត ៦ គីឡូ ក្នុងធុងបាស់ ១ គ្រឿង គ្រោងជួញទៅប្រទេស វៀតណាម។
លោក សាន សុទ្ធី នាយករងមន្ទីរប្រឆាំងបទល្មើសគ្រឿងញៀននៃក្រសួងមហាផ្ទៃបានប្រាប់ភ្នំពេញប៉ុស្ដិ៍ពីម្សិលមិញថា ជនសង្ស័យទាំង ៣ នាក់នេះ ត្រូវបានកម្លាំងជំនាញ (ក៥) នៃមន្ទីរប្រឆាំងបទល្មើសគ្រឿងញៀនសួររួចហើយ មុនពេលបញ្ជូនពួកគេ និងសំណុំរឿងទៅសាលាដំបូងរាជធានីភ្នំពេញដើម្បីចាត់ការបន្តទៅតាមនីតិវិធីច្បាប់។
លោកថា៖ «យើងបានសាកសួរពួកគាត់ទាំង ៣ នាក់ហ្នឹងរួចហើយ យើងត្រូវបញ្ជូនពួកគាត់ទៅតុលាការនៅល្ងាចថ្ងៃទី ១៤ ខែវិច្ឆិកានេះ។ យើងបានស៊ើបអង្កេតហើយគឺគាត់នៅមានបក្ខពួកគាត់ទៀត ប៉ុន្ដែពួកគេកំពុងលាក់ខ្លួន កម្លាំងជំនាញយើងកំពុងស្រាវជ្រាវបន្តទៀត ហើយបើយើងចាប់បានជនល្មើសបន្ថែមទៀតគឺយើងក៏បន្តបញ្ជូនទៅតុលាការជាបន្តបន្ទាប់ទៀតដែរដើម្បីចាត់ចែងតាមច្បាប់»។
លោក គុជ គឹមឡុង អ្នកនាំពាក្យ និងជាព្រះរាជអាជ្ញារងនៃសាលាដំបូងរាជធានីភ្នំពេញមិនអាចទាក់ទងសុំការបញ្ជាក់ជុំវិញសំណុំរឿងនេះបានទេកាលពីម្សិលមិញ។
តាមគេហទំព័រអគ្គស្នងការដ្ឋាននគរបាលជាតិផ្សាយកាលពីម្សិលមិញឲ្យដឹងថា កាលពីថ្ងៃទី ១១ ខែវិច្ឆិកា កម្លាំងជំនាញ (ក៥) នៃមន្ទីរប្រឆាំងបទល្មើសគ្រឿងញៀនដឹកនាំដោយលោក សាន សុទ្ធី នាយករងមន្ទីរសហការជាមួយក្រុមហ៊ុនដឹកជញ្ជូនអ្នកដំណើរ ដានដាន អិចប្រេសបើស ដឹកនាំសម្របសម្រួលពីលោក ស៊ិត វណ្ណៈ ព្រះរាជអាជ្ញារងនៃអយ្យការអមសាលាដំបូងរាជធានីភ្នំពេញបានត្រួតពិនិត្យកញ្ចប់បញ្ញើមានភាពមិនប្រក្រតីមួយដែលផ្ញើពីរាជធានីភ្នំពេញទៅទីក្រុងហូជីមិញប្រទេស វៀតណាម។
អគ្គស្នងការដ្ឋាននគរបាលជាតិបន្តថា ការប្រតិបត្តិការនេះធ្វើឡើងនៅក្រុមហ៊ុន ដានដាន ស្ថិតនៅសង្កាត់វាលវង់ ខណ្ឌ ៧ មករាដោយរកឃើញសារធាតុញៀនប្រភេទមេតំហ្វេតាមីន (ICE) ៦ កញ្ចប់ធំ ស្មើនឹង ៥ ៨៩៥,៨២ ក្រាមដែលបង្កប់នៅក្នុងធុងបាស់ធំ ១ គ្រឿង។
គេហទំព័រដដែលថា បន្ទាប់មកសមត្ថកិច្ចជំនាញបានបន្តការស៊ើបអង្កេតដោយកំណត់បានមុខសញ្ញាពាក់ព័ន្ធឈានទៅចាប់ខ្លួនជនសង្ស័យចំនួន ៣ នាក់ដែលមានឈ្មោះ ប៉ុក ស្រីល័ក្ខ ភេទស្រី ជនជាតិខ្មែរមុខរបរលក់ដូរ (អ្នកដឹកជញ្ជូនគ្រឿងញៀនឆ្លងដែន),ឈ្មោះ យុន ស្រីនូ ភេទស្រី ជនជាតិខ្មែរ មុខរបរលក់ដូរ (អ្នកដឹកជញ្ជូនគ្រឿងញៀនឆ្លងដែន) និងឈ្មោះ NDUKWU JONATHAN CHUKWUJEKWU ភេទប្រុស ជនជាតិនីហ្សេរីយ៉ា មុខរបរកីឡាករបាល់ទាត់ (មេខ្លោងដឹកជញ្ជូនគ្រឿងញៀនឆ្លងដែន)។
អគ្គស្នងការដ្ឋាននគរបាលជាតិបញ្ជាក់ថា៖ «នៅថ្ងៃដដែលនោះ សមត្ថកិច្ចបានបន្តឆែកឆេរផ្ទះជួលរបស់ឈ្មោះ NDUKWU JONATHAN CHUKWUJEKWU ភូមិសន្សំកុសល សង្កាត់បឹងទំពុន ខណ្ឌមានជ័យ ដោយរកឃើញវត្ថុតាងមួយចំនួនទៀតរួមមាន៖ កញ្ឆាក្រៀម ៩ ក្រាម, ជញ្ជីងថ្លឹង ១ គ្រឿង, ម៉ាស៊ីនបាញ់ទឹក ៨ គ្រឿង, ម៉ាស៊ីនបូមធូលី ១ គ្រឿង, ធុងបាស់ ១ គ្រឿង,ទូរស័ព្ទ ៣ គ្រឿង និងលិខិតឆ្លងដែន ៣ ក្បាល។ បើសរុបវត្ថុតាងគ្រឿងញៀនដែលចាប់បាន មានមេតំហ្វេតាមីន (ICE) ចំនួន ៥ ៨៩៥,៨២ ក្រាម និងកញ្ឆាក្រៀម ៩ ក្រាមបន្ថែមទៀត៕