.jpg)
ទន្លេមេគង្គនៅរាជធានីភ្នំពេញ ថតនៅឆ្នាំ ២០២០។ ហេង ជីវ័ន
ភ្នំពេញៈ រដ្ឋាភិបាលបារាំងបានផ្ដល់ជំនួយជាថវិកាចំនួន ១,៥ លានអឺរ៉ូ ដល់គណៈកម្មការទន្លេមេគង្គ (MRC) សម្រាប់រយៈពេល ៤ ឆ្នាំ ដើម្បីគ្រប់គ្រងដំណើរការប្រតិបត្តិការគម្រោងហេដ្ឋារចនាសម្ព័ន្ធទឹកនៅតាមដងទន្លេមេគង្គ ឱ្យកាន់តែមានប្រសិទ្ធភាពខ្ពស់។
សេចក្តីប្រកាសរបស់ MRC ចេញផ្សាយនៅថ្ងៃទី ១៧ ខែឧសភា ឱ្យដឹងថា ប្រទេសបារាំង បានគាំទ្រការកែលម្អបណ្តាញតាមដានទន្លេមេគង្គ ដោយបានផ្តល់ថវិកាចំនួន ១,៥ លានអឺរ៉ូ ដល់ MRC ដើម្បីពង្រីក និងបង្កើនប្រសិទ្ធភាពបណ្តាញតាមដងទន្លេ និងដៃទន្លេសំខាន់ៗនៃទន្លេមេគង្គ។
នាយកប្រតិបត្តិនៃលេខាធិការដ្ឋាន MRC លោក អាន ពេជ្រហត្ថដា បានលើកឡើងក្នុងសេចក្តីប្រកាសថា មូលនិធិនេះត្រូវបានផ្ដល់តាមរយៈទីភ្នាក់ងារអភិវឌ្ឍន៍បារាំង (AFD) សម្រាប់រយៈពេល ៤ ឆ្នាំ ចាប់ពីឆ្នាំ ២០២១ ដល់ឆ្នាំ ២០២៥។
លោកថ្លែងថា៖ «ជំនួយនេះមានគោលបំណងបង្កើនសមត្ថភាពរបស់ MRC និងប្រទេសជាសមាជិកពោលគឺប្រទេសកម្ពុជា ឡាវ ថៃ និងវៀតណាម ដើម្បីតាមដានរំហូរទន្លេ និងបរិមាណទឹកភ្លៀង និងផលប៉ះពាល់ដែលអាចកើតមានពីគម្រោងអភិវឌ្ឍន៍ និងការប្រែប្រួលអាកាសធាតុទៅលើសហគមន៍តាមអាងទន្លេ និងបរិស្ថាន។ ជាពិសេសលើគុណភាពទឹក កំណកកករ និងជលផល»។
លោកបន្តថា៖ «យើងនឹងពង្រឹងប្រព័ន្ធតាមដានទន្លេបច្ចុប្បន្ននេះឱ្យកាន់តែមានសមត្ថភាព ប្រសិទ្ធភាព និងភាពជឿជាក់ក្នុងការប្រមូល និងបញ្ជូនទិន្នន័យទឹកភ្លៀង កម្រិតទឹកតាមពេលវេលាជាក់ស្ដែង និងទិន្នន័យពាក់ព័ន្ធនឹងបរិស្ថានផ្សេងៗ ដើម្បីជំរុញដល់ការគ្រប់គ្រង និងអភិវឌ្ឍន៍ទន្លេប្រកបដោយការទទួលខុសត្រូវ»។
ទន្ទឹមនឹងនេះ លោកស្រី ជូលី ហ្គាបេត-អ៊ូហ៊ីអូន (Julie Gabet-Ouahioune) នាយកទីភ្នាក់ងារអភិវឌ្ឍន៍បារាំង AFD ប្រចាំប្រទេសឡាវ មានប្រសាសន៍ក្នុងពិធីចុះហត្ថលេខាលើកិច្ចព្រមព្រៀងផ្តល់ជំនួយថ្មីថា៖ «ថវិកានេះនឹងផ្តល់លទ្ធភាពឱ្យ MRC បង្កើនចំណេះដឹងនៃទម្រង់បែបជលសាស្ត្ររបស់ទន្លេមេគង្គ និងដៃទន្លេសំខាន់ៗ ដែលជាលទ្ធផល វាបង្កើតឱ្យមានប្រព័ន្ធតាមដានរួមមួយ សម្រាប់ការគ្រប់គ្រងទន្លេឱ្យបានកាន់តែប្រសើរ»។
បើតាមគណៈកម្មការទន្លេមេគង្គ មូលនិធិថ្មីនេះ គឺជាជំនួយបន្តពីជំនួយចំនួន ២ ផ្សេងទៀតដែលមានទឹកប្រាក់ចំនួន ៤ លានអឺរ៉ូ ពីប្រទេសបារាំង សម្រាប់ ២ ដំណាក់កាលដំបូងនៃគម្រោងបណ្ដាញតាមដានរំហូរទន្លេ និងបរិមាណទឹកភ្លៀង។
MRC ឱ្យដឹងថា នៅដំណាក់កាលទី១ (ពីឆ្នាំ ២០០៧ ដល់ ២០១២) MRC បានបង្កើតបណ្តាញមួយដែលមាន ស្ថានីយតាមដានរំហូរទន្លេ និងបរិមាណទឹកភ្លៀងចំនួន ៤៩ តាមដងទន្លេមេគង្គ និងដៃទន្លេនានា ដើម្បីប្រមូលទិន្នន័យតាមពេលវេលាជាក់ស្តែងនៃកម្រិតទឹក និងបរិមាណទឹកភ្លៀងរៀងរាល់ ១៥ នាទីម្តង សម្រាប់ការព្យាករកម្ពស់ទឹកជំនន់ និងតាមដានស្ថានភាពទន្លេ។
ចំណែកនៅដំណាក់កាលទី២ (ពីឆ្នាំ ២០១៦ ដល់ ឆ្នាំ ២០២២) MRC បានពង្រីកបណ្តាញនេះដោយបង្កើតស្ថានីយចំនួន ១១ បន្ថែមទៀត នៅតាមដងទន្លេមេ និងធ្វើឱ្យប្រសើរដល់ការយល់ដឹងពីថាមវន្តទន្លេនេះ និងការប្រើប្រាស់ទិន្នន័យ សម្រាប់វិស័យផ្សេងទៀតនៃការគ្រប់គ្រងធនធានទឹក»។
បើតាម MRC ចាប់តាំងពីឆ្នាំ ២០០៦ មក ប្រទេសបារាំងបានផ្តល់ជំនួយថវិកាជាង ១០ លានអឺរ៉ូ (១២ លានដុល្លារអាមេរិក) ដើម្បីគាំទ្រដល់កិច្ចការតាមដានទន្លេ ការគ្រប់គ្រងទឹកជំនន់ និងគ្រោះរាំងស្ងួត ការប្រែប្រួលអាកាសធាតុ និងការគ្រប់គ្រងបរិស្ថាន។
គណៈកម្មការទន្លេមេគង្គបញ្ជាក់ថា៖ «ប្រទេសបារាំង គឺជាដៃគូមួយ ក្នុងចំណោមដៃគូអភិវឌ្ឍន៍ជាច្រើន ដែលគាំពារដល់ការអនុវត្ត ផែនការយុទ្ធសាស្ត្រថ្មីរបស់ MRC»។
MRC ឱ្យដឹងថា ទន្លេមេគង្គមានប្រវែងជាង ៤ ពាន់គីឡូម៉ែត្រ ដែលទន្លេនេះត្រូវបានគេចាត់ទុក ជាប្រភពសន្តិសុខស្បៀងដ៏សំខាន់ និងសេវាកម្មអេកូឡូស៊ីសម្បូរបែបសម្រាប់ប្រជាជនជិត ៧០ លាននាក់ដែលរស់នៅតាមដងទន្លេនេះ។ ប៉ុន្តែដោយសារការអភិវឌ្ឍកើនឡើងយ៉ាងលឿន និងអាកាសធាតុប្រែប្រួលកាន់តែខ្លាំង កង្វះទិន្នន័យ និងកង្វះព័ត៌មានពីហេដ្ឋារចនាសម្ព័ន្ធទឹកក្នុងអាងទន្លេ បានបង្កឱ្យមានការលំបាកដល់ការព្យាករពីផលប៉ះពាល់នានា៕
