ភ្នំពេញៈ បុរសចំនួន ៤ នាក់ត្រូវបានអាជ្ញាធររាជធានីភ្នំពេញនាំខ្លួនទៅសាកសួរទាំងយប់អស់ជាច្រើនម៉ោងនៅប៉ុស្ដិ៍នគរបាលចាក់អង្រែលើ និងបានដោះលែងវិញនៅវេលារំលងអាធ្រាត្រ ដោយសារពួកគេបាននាំគ្នាស្នាក់នៅក្នុងទីស្នាក់ការរបស់អតីតគណបក្សសង្គ្រោះជាតិ ដែលស្ថិតនៅក្នុងសង្កាត់ចាក់អង្រែលើ ខណ្ឌមានជ័យ។
លោក អ៊ី អេកហ័ន សន្ដិសុខ នៃអតីតគណបក្សសង្គ្រោះជាតិ និងបច្ចុប្បន្នជាសមាជិកគណៈកម្មាធិការនាយកគណបក្សភ្លើងទៀន ហើយជាបុរសម្នាក់ក្នុងចំណោមទាំង ៤ នាក់ ដែលត្រូវអាជ្ញាធរនាំខ្លួនទៅសាកសួរនោះ បានប្រាប់ភ្នំពេញប៉ុស្ដិ៍ម្សិលមិញថា ពួកលោកទាំង ៤ នាក់នេះគឺសុទ្ធតែជាមន្ត្រីរបស់គណបក្សភ្លើងទៀន ដែលប្រធានបក្សនេះ លោក ទាវ វណ្ណុល បានបង្គាប់ឱ្យដេកចាំយាមរបស់របរស្ថិតក្នុងទីស្នាក់ការអតីតគណបក្សប្រឆាំងជារៀងរាល់យប់។
លោកបន្តថា មូលហេតុដែលមានការនាំខ្លួនក្រុមលោកទាំង ៤ នាក់ទៅសាកសួរ គឺអាជ្ញាធរបានបញ្ជាក់ថា ដោយសារពួកលោកធ្វើសកម្មភាពរារាំងមន្ត្រីដែលចុះធ្វើជំរឿននៅក្នុងទីស្នាក់ការអតីតបក្សប្រឆាំង ប៉ុន្តែលោកបដិសេធថា ពុំមានករណីរារាំងនេះឡើយ។ លោកបន្តថា អាជ្ញាធរក៏បានសួរនាំអំពីគោលបំណង ដែលក្រុមលោកប្រមូលផ្ដុំគ្នាស្នាក់នៅក្នុងទីស្នាក់ការបក្សនេះដែរ។
លោកបញ្ជាក់ថា៖ «សួរតែប៉ុណ្ណឹងដូចខ្ញុំបញ្ជាក់ គ្មានកិច្ចសន្យាអីទេ គេគ្រាន់តែឱ្យផ្ដិតមេដៃដែលគេបានហៅមកសាកសួរពីបទរារាំងមន្ត្រីជំរឿន។ ខ្ញុំអត់ (រារាំង) ផង ពីព្រោះខ្ញុំទើបមកពីការគេ អត់ដឹងអីផងក្រោយពីងូតទឹក និងរៀបចំញ៉ាំបាយនៅឯផ្ទះ ស្រាប់តែកូនចៅតេទៅថាមានសមត្ថកិច្ចចង់ចូល (ស្នាក់ការបក្ស) នៅពេលខ្ញុំចេញមកដល់ គេយកទៅបណ្តោយ»។
កាលពីថ្ងៃទី ២៦ កុម្ភៈ ឆ្នាំ ២០១៨ សាលាដំបូងរាជធានីភ្នំពេញបានចេញដីការឹបអូសទីស្នាក់ការអតីតគណបក្សសង្គ្រោះជាតិស្ថិតនៅក្នុងសង្កាត់ចាក់អង្រែលើ ខណ្ឌមានជ័យ ដើម្បីជាការជំរុញឱ្យលោក សម រង្ស៊ី អតីតប្រធានគណបក្សសង្គ្រោះជាតិ សងបំណុលជាង ៤ ពាន់លានរៀល ទៅលោក ហ៊ុន សែន និងលោក ហេង សំរិន ដែលបានឈ្នះក្ដីលោក សម រង្ស៊ី។
ទោះជាមានការរឹបអូសនេះក្ដី ប៉ុន្តែមន្ត្រីនៃអតីតគណបក្សសង្គ្រោះជាតិខ្លះ ដែលបច្ចុប្បន្នធ្វើជាមន្ត្រីគណបក្សភ្លើងទៀន តែងផ្លាស់ប្ដូរវេនគ្នាដេកយាមទីស្នាក់ការបក្សនេះរហូតមក ដោយពួកគេសំអាងថា មិនមានដីកាតុលាការណាមួយ ដែលបានហាមឃាត់មិនឱ្យពួកគេចូលទៅដេកយាមនៅខាងក្នុងស្នាក់ការនោះឡើយ។
លោក អេកហ័ន បន្តថា៖ «ផ្ទះនៅរៀងៗខ្លួននៅក្រៅឯណោះទេ ហើយយប់ឡើងមកជួយមើលគ្នាម្ដង ៤ នាក់ម្ដង ៥ នាក់ដូរគ្នាអ៊ីចឹងទៅ ហើយបើថាអាជីពដេកនៅក្នុងហ្នឹងផ្ទាល់អត់ទេ»។
អភិបាលរងខណ្ឌមានជ័យ លោក ឌី រ័ត្នខេមរុណ បានបដិសេធមិនឆ្លើយជុំវិញបញ្ហានេះទេ ហើយលោកឱ្យសួរអភិបាលខណ្ឌលោក ពេជ្រ កែវមុនី ប៉ុន្តែលោក ពេជ្រ កែវមុនី មិនលើកទូរស័ព្ទឡើយ។ រីឯលោក ម៉េត មាសភក្ដី មន្ត្រីនាំពាក្យសាលារាជធានីភ្នំពេញក៏មិនបានលើកទូរស័ព្ទដែរ។
ចំណែកលោក ម៉េង វិមានតារា អធិការនគរបាលខណ្ឌមានជ័យ ក៏បានបដិសេធមិនចង់ផ្ដល់ព័ត៌មានតាមទូរស័ព្ទនោះដែរ ដោយសារលោកមិនជឿថាពិតជាអ្នកសារត៌មានពីកាសែតភ្នំពេញស្ដិ៍ទូរស័ព្ទទៅសួរនោះឡើយ។
ជុំវិញករណីនេះ លោក ឃួង ស្រេង អភិបាលរាជធានីភ្នំពេញ បានប្រាប់បណ្តាញព័ត៌មាន Fresh News ថា នៅពេលដែលមន្រ្តីចុះមកធ្វើជំរឿននាពេលថ្មីៗនេះ ពួកគេប្រាប់ថា មិនមានមនុស្សនៅក្នុងអតីតទីស្នាក់ការនោះទេ ប៉ុន្តែនៅយប់នោះពេលអាជ្ញាធរចុះមកត្រួតពិនិត្យអាវុធជាតិផ្ទុះ ក៏ដឹងថា មានមនុស្សនៅខាងក្នុង។
ពេលកម្លាំងចូលទៅរក ស្រាប់តែ ២ នាក់បានដើរតាមក្បែររបងចេញមកក្រៅ និង២នាក់ទៀតបានដើរចេញមកតាមច្រកទ្វារខាងមុខ សមត្ថកិច្ចសង្ស័យផ្លោះរបង ដូច្នេះក៏ឃាត់មកសួរនាំតែម្តង៕