ភ្នំពេញៈ ប្រធានគណបក្សសម្ព័ន្ធដើម្បីប្រជាធិបតេយ្យ (LDP) លោក ខឹម វាសនា បានរិះគន់គណបក្សប្រជាជនកម្ពុជាថាបានប្រើប្រាស់ការគំរាមកំហែងដើម្បីយកឈ្នះការបោះឆ្នោត ខណៈសំណើសុំធ្វើវិសោធនកម្មនៃបទបញ្ជា និងនីតិវិធីសម្រាប់ការបោះឆ្នោតត្រូវបាន គ.ជ.ប បដិសេធ ហើយលោកក៏បានឆ្លៀតវាយប្រហារលើអតីតគណបក្សសង្គ្រោះជាតិផងដែរ ដោយថាមិនគួរមាននៅលើឆាកនយោបាយកម្ពុជាទេ ជាអ្វីដែលមន្ត្រីគណបក្សកាន់អំណាច និងអតីតគណបក្សប្រឆាំងវាយបកវិញផងដែរ។
ការលើកឡើងរបស់លោក ខឹម វាសនា បានធ្វើឡើងក្នុងសន្និសីទសារព័ត៌មានមួយកាលពីម្សិលមិញស្ដីពី «ជំហររបស់គណបក្សសម្ព័ន្ធដើម្បីប្រជាធិបតេយ្យចំពោះការបោះឆ្នោតជ្រើសតាំងតំណាងរាស្ត្រនីតិកាលទី ៦ ឆ្នាំ ២០១៨» នៅសាលមួយនាបុរីពិភពថ្មីក្នុងខណ្ឌសែនសុខ រាជធានីភ្នំពេញ។
កាលពីថ្ងៃទី ១១ ខែកក្កដា LDP បានធ្វើសំណើទៅ គ.ជ.ប ដើម្បីសុំឲ្យធ្វើវិសោធនកម្មចំណុច ៨.១១.១ នៃប្រការ ៨.១១ នៃបទបញ្ជា និងនីតិវិធីសម្រាប់បោះឆ្នោតជ្រើសតាំងតំណាងរាស្ត្រនីតិកាលទី ៦ ដោយអះអាងថា ខ្លួនបានរកឃើញ «ភាពចន្លោះប្រហោង» អំពីសញ្ញាគូសគាំទ្រគណបក្សនយោបាយបន្ទាប់ពី គ.ជ.ប បានអនុញ្ញាតឲ្យអ្នកបោះឆ្នោតគូសសញ្ញាគាំទ្រច្រើនប្រភេទ តែ LDP ទាមទារឲ្យគូសសញ្ញាធិក (√)។
ជាការឆ្លើយតបកាលពីថ្ងៃទី ១៥ កក្កដា គ.ជ.ប បានចេញលិខិតមួយដោយអះអាងថា ខ្លួនមិនអាចធ្វើវិសោធនកម្មតាមការស្នើសុំឡើយដោយបញ្ជាក់ថា លក្ខខណ្ឌដែល គ.ជ.ប បានកំណត់ «មិនប៉ះពាល់ដល់ការសម្ងាត់នៃការបោះឆ្នោត» ទេ។
បន្ថែមលើនេះ កាលពីថ្ងៃទី ១៨ កក្កដា LDP បានដាក់សំណើថ្មីមួយទៀតទៅរដ្ឋសភាជាតិដើម្បីសុំ «ពិនិត្យ និងកែតម្រូវការសម្រេច» របស់ គ.ជ.ប ។
ទោះយ៉ាងណាលោក វាសនា បានប្រាប់អ្នកកាសែតពីម្សិលមិញថា លោកមិនសង្ឃឹមថានឹងទទួលបានជោគជ័យឡើយ។
លោកបានលើកទឡ្ហីករណ៍ថាការកំណត់របស់ គ.ជ.ប បែបនេះនឹងធ្វើឲ្យប៉ះពាល់ដល់លទ្ធផលនៃការបោះឆ្នោតដែលចំណេញដល់បក្សកាន់អំណាចតាមរយៈការដាក់មេភូមិនៅជិតការិយាល័យបោះឆ្នោតដើម្បីប្រាប់ឲ្យពលរដ្ឋគូសសញ្ញាសម្គាល់ឲ្យគណបក្សប្រជាជន។ លោកចាត់ទុកថាជាការទិញសន្លឹកឆ្នោត និងគំរាមកំហែងអ្នកបោះឆ្នោត។
លោកបានថ្លែងថា៖ «ជាទូទៅគណបក្សកាន់អំណាចគេអាចប្រើរៀងរាល់អាណត្តិដើម្បីគំរាមកំហែងប្រជាពលរដ្ឋដើម្បីទិញដូរប្រជាពលរដ្ឋ ឲ្យប្រជាពលរដ្ឋសន្យាដើម្បីបោះឆ្នោតឲ្យគេ»។
លោកបន្តថា៖ «នេះគឺជាចេតនា ពីព្រោះរឿងដែលឈ្នះឆ្នោតប្រើតែចំណុច ២ ទេ បើបងប្អូនដឹងអាចំណុច ២ ហ្នឹងគឺជិតគូទតែម្ដង រកកន្លែងជុះអត់ចេញទេ។
ប្រើតែ ២ ចំណុចទេ ទី ១ គឺទិញ ទី ២ គឺគំរាមកំហែង។ តែ ២ ហ្នឹងហើយអា ២ ហ្នឹង គឺវាធ្លាក់មកដល់សញ្ញាគូសហ្នឹង»។
ទោះយ៉ាងណាលោក សុខ ឥសាន អ្នកនាំពាក្យគណបក្សប្រជាជនកម្ពុជាយល់ថា ការចោទប្រកាន់របស់លោក ខឹម វាសនា មកលើគណបក្សលោកធ្វើឡើងក្នុង «ក្ដីអស់សង្ឃឹម» ដោយសារតែដឹងពីបរាជ័យក្នុងការបោះឆ្នោតខាងមុខ។
លោកបញ្ជាក់ថា៖ «ការលើកឡើងនេះខ្ញុំយល់ថាគ្រាន់តែយោបល់របស់គាត់ដោយមើលឃើញថា ការបោះឆ្នោតនេះគាត់មិនអាចទទួលបានជោគជ័យ អាហ្នឹងជាការនិយាយប្រកបដោយក្ដីអស់សង្ឃឹម មិនទទួលស្គាល់ការពិត បែរជាទៅចោទអ្នកដទៃ»។
លោកបញ្ជាក់ថាពលរដ្ឋម្ចាស់ឆ្នោតមិនមែនចេះតែជឿលើការឃោសនារបស់អ្នកនយោបាយឡើយដោយបានលើកឡើងពីបទពិសោធរបស់ពលរដ្ឋក្នុងការចូលរួមបោះឆ្នោតកន្លងមក។
លោកបន្តថា៖ «រឿងទិញដូរអីនោះខ្ញុំយល់ថា បើមានភ័ស្តុតាងរឿងទិញដូរ (សន្លឹកឆ្នោត) សូមឲ្យគាត់ទៅប្ដឹង គ.ជ.ប ទៅ។ គ.ជ.ប គេនឹងស្រាវជ្រាវហើយនិយាយតែមាត់វាអត់មានប្រសិទ្ធភាពអីទេ។ វាគ្រាន់តែជាវោហារស័ព្ទនយោបាយតែប៉ុណ្ណោះ»។
ជាមួយគ្នានេះដែរលោក ខឹម វាសនា ដែលធ្លាប់ជាអតីតតំណាងរាស្ត្រគណបក្ស សម រង្ស៊ី (ក្រោយមកប្ដូរជាគណបក្សភ្លើងទៀន) មុនចាកចេញទៅបង្កើតគណបក្សថ្មីក្នុងឆ្នាំ ២០០៥ នោះក៏បានឆ្លៀតវាយប្រហារអតីតគណបក្សប្រឆាំងផងដែរ។
លោក វាសនា ថាគណបក្សសង្គ្រោះជាតិមិនគួរមាននៅលើទឹកដីកម្ពុជាទេ ដោយលោកលើកពីហេតុផលអវិជ្ជមានធំៗចំនួន ៣ របស់អតីតគណបក្សប្រឆាំង គឺទី ១ ខ្វះសីលធម៌ ទី ២ គ្មានសេចក្ដីស្មោះត្រង់ និងទី ៣ អត់មានទស្សនវិស័យ។
លោកបញ្ជាក់ថា៖ «ខ្ញុំយល់ថាគណបក្សហ្នឹងនៅថ្ងៃណាមួយគង់តែរលាយទេ ពីព្រោះមិនមែនមកពីរដ្ឋាភិបាលទេ...កុំថា រលាយមកពីគណបក្សប្រជាជន មកពីអត្តចរិតរបស់អ្នកឯង គេអត់ឱនឲ្យមិនបានកុំថាគណបក្សប្រជាជនរដ្ឋាភិបាល គណបក្សណាក៏គេអត់ឱនឲ្យមិនបានដែរ»។
លោកបន្តថា អតីគណបក្សប្រឆាំងបានចាញ់ឆ្នោតរៀងរាល់អាណត្តិមកពីភាពកម្សោយរបស់ខ្លួនដោយអះអាងថា៖ «រហូតមកទល់ឥឡូវគ្មានគណបក្សប្រឆាំងណាធំគួរឲ្យទុកចិត្តដូចគណបក្សសម្ព័ន្ធដើម្បីប្រជាធិបតេយ្យ» ទេ។
លោកថ្លែងថា៖ «សរុបមកវិញខ្ញុំចង់និយាយថាគណបក្សនេះ (CNRP) មិនគួរមានវត្តមាននៅលើទឹកដីខ្មែរទេ ពីព្រោះយើងចង់ផ្លាស់ប្ដូររដ្ឋាភិបាលដើម្បីឲ្យល្អ ចង់ទៅយកគណបក្សរបៀបនេះមកទៅផ្លាស់ប្ដូរទៅម៉េចរួច។ វាអត់មានការលះបង់ វាមានតែការប្រមូលផ្តុំគ្នាដើម្បីផលប្រយោជន៍ផ្ទាល់ខ្លួនរួចហើយធ្វើនយោបាយបង្កើតគោលនយោបាយទាក់យកសន្លឹកឆ្នោត»។
ទោះបីយ៉ាងណាលោក ខឹម វាសនា មិនគាំទ្រឲ្យចាប់លោក កឹម សុខា ដាក់ពន្ធនាគារនោះទេ ដោយលោកថាការលើកហេតុផលរបស់រដ្ឋាភិបាល «មិនសមរម្យ» ដោយលោកជំរុញ គួរត្រឹមឃុំ លោក កឹម សុខា ក្នុងផ្ទះដូចរបបសឹកភូមា ឃុំខ្លួនលោកស្រី អ៊ុងសាន ស៊ូជី មេដឹកនាំភូមាពីអតីតកាល។
លោក វាសនា ហាក់មានទស្សនៈស្របនឹងគណបក្សប្រជាជនកម្ពុជាដែលជំទាស់នឹងការលើកឡើងពីអ្នកទោសនយោបាយនៅកម្ពុជាដោយលោកថា គ្មានទេអ្នកទោសនយោបាយ។
ជាការឆ្លើយតបវិញលោក ម៉ៅ មុនីវណ្ណ អតីតតំណាងរាស្ត្រនៃអតីតគណបក្សសង្គ្រោះជាតិបានប្រតិកម្មថា លោកមិនចាប់អារម្មណ៍ការលើកឡើងរបស់លោក ខឹម វាសនា ទេដោយលោកថាលទ្ធផលនៃការបោះឆ្នោតកន្លងមកបង្ហាញថាគណបក្សនេះមិនទទួលបានការគាំទ្រពីពលរដ្ឋទេ។
លោកថ្លែងថា៖ «ប្រជាជនខ្មែរបានយល់ច្បាស់ ហើយគាត់មានគំនិតយ៉ាងម៉េច ឆន្ទៈយ៉ាងម៉េចដែលខំប្រឹងធ្វើកន្លងមករហូតមកដល់ពេលនេះ។ ទស្សនៈនយោបាយរបស់គាត់ ពលរដ្ឋមិនទៅចាប់អារម្មណ៍អីទេ គាត់យល់ហើយ គាត់ធ្វើប៉ុន្មានអាណត្តិហើយបានប៉ុន្មានកៅអីហើយ ក្រុមប្រឹក្សាឃុំប៉ុន្មាន?»។
លោកបន្តថា៖ «កាលៈទេសៈនេះគាត់គ្រាន់តែជាមនុស្សម្នាក់ដែលជួយបំពងសំឡេងឲ្យគេប៉ុណ្ណោះ កាន់តែច្បាស់គាត់ធ្វើសន្និសីទហែកហួរយើង កាន់តែបង្ហាញពីចរិតច្បាស់របស់គាត់ហើយ។ គាត់គ្មានឥទ្ធិពលអ្វីទេ»៕