ភ្នំពេញៈ ប្រាក់ឈ្នួលអប្បបរមាសម្រាប់កម្មករនិយោជិតផ្នែកវាយនភណ្ឌ កាត់ដេរ និងផលិតស្បែកជើងសម្រាប់ឆ្នាំ ២០២១ ត្រូវបានកំណត់ជាផ្លូវការដំឡើងបន្ថែម ២ ដុល្លារ ពីលើប្រាក់ឈ្នួលចាស់ចំនួន ១៩០ ដុល្លារ ដោយភាគីនិយោជក និងសហជីពហាក់មិនសូវពេញចិត្តក្នុងការផ្តល់ជូន និងទទួលយកការដំឡើងប្រាក់ឈ្នួលនេះទេ ខណៈវិស័យនេះបានរងផលប៉ះពាល់ធ្ងន់ធ្ងរពីវិបត្តិជំងឺកូវីដ ១៩។
ក្រុមប្រឹក្សាជាតិប្រាក់ឈ្នួលអប្បបរមាដែលជាយន្តការត្រីភាគី និងមានសមាជិកជាតំណាងភាគីកម្មករនិយោជិតចំនួន ១៧ រូប តំណាងភាគីនិយោជកចំនួន ១៧ រូប និងតំណាងភាគីរាជរដ្ឋាភិបាលចំនួន ១៧ រូប បានឯកភាពគ្នាជាឯកច្ឆន្ទគាំទ្រតួលេខ ១៩០ ដុល្លារអាមេរិក ជាតួលេខប្រាក់ឈ្នួលអប្បបរមាក្នុង ១ ខែ សម្រាប់កម្មករនិយោជិតក្នុងឆ្នាំ ២០២១ ដូចក្នុងឆ្នាំ ២០២០ ដដែល។ ក្រុមប្រឹក្សាជាតិបានស្នើតួលេខនេះទៅរដ្ឋមន្ត្រីក្រសួងការងារលោក អ៊ិត សំហេង ដើម្បីធ្វើការពិនិត្យសម្រេច។
លោក អ៊ិត សំហេង បានថ្លែងប្រាប់អ្នកសារព័ត៌មាននៅថ្ងៃម្សិលមិញនៅក្រសួងការងារ ក្រោយកិច្ចពិភាក្សាថា ក្រុមប្រឹក្សាជាតិប្រាក់ឈ្នួលបានសម្រេចជាឯកច្ឆន្ទលើតួលេខ ១៩០ ដុល្លារសម្រាប់ឆ្នាំ ២០២១ ដែលតួលេខនេះជាតួលេខចាស់ឆ្នាំ ២០២០។ លោកថា ការអនុម័តនេះអនុលោមទៅតាមផលលំបាក និងផលប៉ះពាល់ដ៏ធ្ងន់ធ្ងរនៃបញ្ហាជំងឺរាតត្បាតជាសកលកូវីដ ១៩ មកលើខ្សែចង្វាក់ផ្គត់ផ្គង់ ផលិតកម្ម និងការនាំចេញរបស់សហគ្រាសរោងចក្រ។
លោកមានប្រសាសន៍ថា ភាគីនីមួយៗពិតជាមានការយោគយល់គ្នាខ្ពស់ នៅក្នុងការជជែកពិភាក្សាដោយមិនបានធ្វើការបោះឆ្នោតជ្រើសរើសតួលេខទេ សម្រាប់ឆ្នាំនេះ ដោយសារភាគីទាំង ៣ បានព្រមព្រៀងគ្នាយកតួលេខ ១ នេះ។
លោកបញ្ជាក់ថា៖ «ជាមួយគ្នានេះដែរ ខ្ញុំបានរាយការណ៍ជូនសម្តេចតេជោ លោកក៏បានសម្រេចធ្វើការបន្ថែម ២ ដុល្លារ ទៅលើប្រាក់ឈ្នួលអប្បបរមា ដែលបានកំណត់ដោយក្រុមប្រឹក្សាជាតិ។ ដូចនេះប្រាក់ឈ្នួលអប្បបរមា សម្រាប់កម្មករនៅឆ្នាំ ២០២១ គឺមានចំនួន ១៩២ ដុល្លារ ក្នុង ១ ខែ។ ទោះបីជាយើងមានការលំបាកតែក៏នៅមានភាពវិជ្ជមាន»។
លោក សំហេង សង្ឃឹមថាប្រាក់ឈ្នួលអប្បបរមាថ្មីនេះនឹងជួយទៅដល់ជីវភាពរបស់កម្មករនិយោជិត និងជួយសម្រួលដល់ការបង្កើននូវផលិតភាពការងាររបស់កម្មករ ដើម្បីធ្វើយ៉ាងណាឱ្យរោងចក្រ សហគ្រាសកាន់តែមានភាពប្រកួតប្រជែងជាមួយនឹងប្រទេសដែលផលិតទំនិញនាំចេញទៅកាន់ទីផ្សារអន្តរជាតិ។ ចំណុច ១ ទៀតការដំឡើងនេះក៏ជាសារមួយក្នុងការទាក់ទាញបន្ថែមលើការវិនិយោគ ការបង្កើតរោងចក្រថ្មីក្នុងប្រទេសកម្ពុជាផងដែរ។
លោករដ្ឋមន្ត្រីបានបញ្ជាក់ថា EBA មិនមែនជាបញ្ហានៃការរារាំងការដំឡើងប្រាក់ឈ្នួលនេះទេ ដោយសារបញ្ហាកូវីដ ១៩ គឺបានគ្របដណ្តប់ទាំងអស់ហើយ ហើយមកដល់ពេលនេះរោងចក្រចន្លោះពី ១០០ ទៅ ១៥០ បានព្យួរ និងបានធ្វើឱ្យកម្មករប្រមាណពី ៤ ម៉ឺនទៅ ៥ ម៉ឺននាក់ ត្រូវបាត់បង់ការងារ។
តំណាងនិយោជក លោក ណាង សុធី បានប្រាប់ភ្នំពេញ-ប៉ុស្តិ៍ម្សិលមិញថា ការដំឡើងប្រាក់ឈ្នួលចំនួន ២ ដុល្លារនេះ ជាការលំបាកសម្រាប់និយោជក ក៏ប៉ុន្តែក្នុងស្មារតីភាតរៈនៃការសាមគ្គីគ្នា ទោះបីជាបញ្ហាកូវីដមានការលំបាកយ៉ាងណាក៏ភាគីទាំង ៣ រដ្ឋាភិបាល និយោជក និងនិយោជិតជាចង្កោមតែមួយ។
លោកបន្ថែមថា៖ «ការដំឡើងអាចជាការពិបាកសម្រាប់ការទាក់ទាញអ្នកវិនិយោគទុនមកក្នុងប្រទេសយើងក្នុងដំណាក់កាលកូវីដនេះ ដែលអាចនឹងមានការអូសបន្លាយទៅមុខទៀត តែខ្ញុំគិតថា តួលេខនេះមិនមែនជាបញ្ហាធំអីទេ ដែលខាងនិយោជកអាចទទួលយកបាន ហើយនិយោជកក្រៅប្រទេសដែលគេចង់វិនិយោគថ្មីក៏មិនមានទម្ងន់ធំអីដែរ»។
ប្រធានសហភាពការងារកម្ពុជាលោក អាត់ ធន់ បានថ្លែងថា ការចរចាប្រាក់ឈ្នួលអប្បបរមានៅឆ្នាំនេះ ជាការចរចាមួយដែលមានលក្ខណៈលំបាកជាងឆ្នាំមុនៗ ដោយសារបញ្ហាកូវីដ EBA និងការវិវឌ្ឍនៃសេដ្ឋកិច្ចទូទៅ។ លោកថា នៅក្នុងដំណាក់កាលនៃការចរចា ភាគីសហជីពបានស្នើដំឡើងជាង ១២ ដុល្លារ ប៉ុន្តែភាគីនិយោជកបានស្នើបញ្ចុះជាង ១៧ ដុល្លារឯណោះ។ ដោយការជជែកគ្នាចំនួន ២ ថ្ងៃ មិនមានការចុះសម្រុងគ្នា ក៏ភាគីទាំងអស់បានឯកភាពគ្នាប្រគល់ឱ្យរដ្ឋាភិបាលជាអ្នកសម្រេចតែម្តង។
លោក អាត់ ធន់ បញ្ជាក់ថា៖ «ចំនួននេះសម្រាប់កម្មករគឺជាចំនួនមួយដែលយើងមិនពេញចិត្តទេដោយសារវាតិចពេក ប៉ុន្តែយោងទៅលើស្ថានភាពនេះ យើងក៏ពិបាកក្នុងការទាមទារដែរ ហើយបើសិនជាយើងចង់បានតាមការទាមទាររបស់យើង គឺអាចចំណាយពេលយូរជាងនេះទៅទៀត»។
កញ្ញា រត្ន នីតា អាយុ ២៥ ឆ្នាំជាកម្មករកាត់ដេរ ១ រូប នៅរោងចក្រមួយក្នុងខេត្តកណ្តាលថ្លែងថា នាងពេញចិត្តនឹងការដំឡើងនេះទោះបីជាតិចតួចខ្លាំងក៏ដោយ ពីព្រោះវាប្រសើរជាងការកាត់ប្រាក់ខែរបស់កម្មករ ឬប្រសើរជាងមិនទទួលបានអ្វីសោះ។ កញ្ញាបញ្ជាក់ថា រោងចក្ររបស់នាងបានព្យួរជាង ១ ខែមកហើយ ដោយនាងទទួលបានតែប្រាក់បន្តិចបន្តួចពីការឧបត្ថម្ភរបស់រាជរដ្ឋាភិបាលប៉ុណ្ណោះ។
គួរបញ្ជាក់ផងដែរថា ប្រាក់អត្ថប្រយោជន៍ផ្សេងទៀតដែលកម្មករធ្លាប់ទទួលបានកន្លងមកត្រូវបានរក្សាទុកនៅដដែលដូចជា ប្រាក់សោហ៊ុយធ្វើដំណើរ និងស្នាក់នៅចំនួន ៧ ដុល្លារក្នុង ១ ខែ ប្រាក់រង្វាន់ធ្វើការទៀងទាត់ចំនួន ១០ ដុល្លារ ក្នុង ១ ខែ ប្រាក់ថ្លៃបាយសម្រាប់ធ្វើការងារបន្ថែមម៉ោងដោយស្ម័គ្រចិត្តចំនួន ២ ០០០ រៀល ក្នុង ១ ថ្ងៃ និងប្រាក់រង្វាន់អតីតភាពការងារពី ២ ដុល្លារដល់ ១១ ដុល្លារ ក្នុង ១ ខែ សម្រាប់កម្មករដែលបានធ្វើការចាប់ពីឆ្នាំទី ២ ដល់ឆ្នាំទី ១១។ ដូចនេះជាមធ្យមកម្មករម្នាក់ៗនឹងត្រូវទទួលបានប្រាក់ឈ្នួលយ៉ាងតិចចំនួនពី ២០៩ ដុល្លារ ទៅដល់ ២២០ ដុល្លារ ក្នុង ១ ខែ៕
វីដេអូ៖