.jpg)
សមត្ថកិច្ចចុះអន្តរាគមន៍ពេលពលរដ្ឋតវ៉ាបិទផ្លូវជាតិលេខ ៤ កាលពីថ្ងៃទី ១៨ ខែមេសា។ ហេង ជីវ័ន
ព្រះសីហនុៈ ចៅក្រុមស៊ើបសួរនៃសាលាដំបូងខេត្ដព្រះសីហនុ កាលពីល្ងាចថ្ងៃអាទិត្យ បានសម្រេចឃុំខ្លួនពលរដ្ឋ ៨ នាក់ ក្នុងចំណោមរាប់រយនាក់ ដែលបង្កសកម្មភាពបិទផ្លូវសាធារណៈនិងប្រើហិង្សាលើសមត្ថកិច្ច ពេលចុះអន្ដរាគមន៍បើកផ្លូវជាតិលេខ ៤ ស្ថិតក្នុងតំបន់ចំណោតអូរត្រាវ ភូមិចំណោតរាម ឃុំបិតត្រាំង ស្រុកព្រៃនប់ កាលពីសប្ដាហ៍មុន ខណៈដែលសមត្ថកិច្ចកំពុងបន្ដតាមចាប់មេខ្លោង។
លោក លឹម ប៊ុនហេង អ្នកនាំពាក្យសាលាដំបូងខេត្ដព្រះសីហនុបានថ្លែងប្រាប់ភ្នំពេញប៉ុស្ដិ៍កាលពីម្សិលមិញថា ចៅក្រមស៊ើបសួរ បានសម្រេចឃុំខ្លួនជនសង្ស័យទាំង ៨ នាក់ បណ្ដោះអាសន្ន លើបទចោទចំនួន ៣ ករណី ក្រោយបញ្ចប់ការសាកសួរកាលពីថ្ងៃអាទិត្យ។
លោកបានបន្ដថា៖ «បទល្មើសនេះ ទី១ ពាក់ព័ន្ធនឹងពួកគាត់បិទផ្លូវសាធារណៈ ដើម្បីរារាំងធ្វើជាឧបសគ្គដល់ចរាចរណ៍សាធារណៈដែលជាបទល្មើស ក្នុងមាត្រា ៨០ នៃច្បាប់ចរាចរណ៍ផ្លូវគោក និងពួកគាត់ប្រើហិង្សានេះត្រូវជាប់ក្នុងបទចោទហិង្សាដោយចេតនាមានស្ថានទម្ងន់ទោស ហើយក្នុងនោះមានខូចឡាន ៣ គ្រឿង ដែលពាក់ព័ន្ធនឹងបទល្មើសបង្កការខូចខាតដោយចេតនា មានស្ថានទម្ងន់ទោស»។
លោកបន្ដថា៖ «ជនសង្ស័យទាំង ៨ នាក់នេះត្រូវជាប់ចោទក្នុងបទល្មើសប្រហាក់ប្រហែលគ្នា ព្រោះអំពើរបស់ពួកគាត់ប្រហាក់ប្រហែលគ្នាក្នុងរូបភាពតែមួយ»។
លោក ឃាង ភារម្យ អ្នកនាំពាក្យរដ្ឋបាលខេត្ដព្រះសីហនុ បានប្រាប់ភ្នំពេញប៉ុស្ដិ៍ កាលពីម្សិលមិញដែរថា រដ្ឋបាលខេត្ដនៅតែប្រកាន់ជំហរអនុវត្ដច្បាប់ ដោយគ្មានការលើកលែងចំពោះជនដែលចូលមកទន្រ្ទាន ដីកម្មសិទ្ធិឯកជនឬដីជាសម្បត្ដិសាធារណៈរបស់រដ្ឋក្នុងទឹកដីខេត្ដព្រះសីហនុនេះ។
លោកបន្តថា៖ «ការបន្តស្វែងរកមេខ្លោង ជនដៃដល់ ឬមេខ្យល់នាំប្រជាពលរដ្ឋមកទន្ទ្រានដីនេះ យើងនៅតែបន្ដស្រាវជ្រាវរកដដែល។ ទោះបីឥឡូវស្ថានភាពបានស្ងប់ស្ងាត់ពិតមែន តែយើងមើលទៅវានឹងអាចផ្ទុះឡើងសាជាថ្មី។ កម្លាំងរបស់យើងបាននៅប្រចាំការជាប់ មិនមែនតែក្នុងតំបន់អូរត្រាវនេះទេ នៅកន្លែងផ្សេងៗ ដែលជាកន្លែងអាចប្រឈមនឹងការចូលទន្ទ្រានឡើងវិញក៏យើងត្រូវពង្រឹងទាំងអស់ក្នុងភូមិសាស្រ្ដខេត្ដ ព្រះសីហនុ »។
លោក ព្រំ ប៊ុន្នី នាយករងរដ្ឋបាលស្រុកព្រៃនប់ដែលបានដឹកនាំកម្លាំងចុះអនុវត្ដលិខិតបង្គាប់ការចុះរុះរើខ្ទមសាងសង់អនាធិបតេយ្យក្នុងភូមិចំណោតរាម ឃុំបិតត្រាំង ស្រុកព្រៃនប់ កាលពីសប្ដាហ៍មុន បានថ្លែងប្រាប់ភ្នំពេញប៉ុស្ដិ៍ថា បច្ចុប្បន្នសមត្ថកិច្ចអាចគ្រប់គ្រងស្ថានការណ៍បានហើយ មិនមានពលរដ្ឋអនាធិបតេយ្យមកប្រមូលផ្ដុំគ្នាបិទផ្លូវ និងសាងសង់ខ្ទមទៀតទេ ហើយសមត្ថកិច្ចកំពុងស្រាវជ្រាវជនសង្ស័យប្រើហិង្សាលើសមត្ថកិច្ច និងមេខ្លោងក្នុងរឿងនេះ។
លោកបន្ដថា៖ «យើងបានកំណត់មុខសញ្ញាជនសង្ស័យផ្សេងទៀតក្នុងករណីបង្កហិង្សា លើសមត្ថកិច្ចនេះ សកម្មភាពរបស់ពួកគាត់យើងមានរូបភាពកាមេរ៉ាចាប់ជាប់រួចអស់ហើយ។ ឥឡូវយើងកំពុងតែស្វែងរកអ្នកដែលបញ្ជាពីក្រោយខ្នង យើងមានតម្រុយអស់ហើយប៉ុន្ដែយើងមិនទាន់អាចបង្ហាញបានទេ»។
គួរបញ្ជាក់ថា កម្លាំងចម្រុះ នៃរដ្ឋបាលខេត្តព្រះសីហនុ កាលពីព្រឹកថ្ងៃទី ១៨ ខែ មេសា ឆ្នាំ ២០១៩ បានចុះទៅរុះរើសំណង់ផ្ទះខ្ទមជាង ៦០០ ខ្ទម ដែលអាជ្ញាធរចាត់ទុកថា ជាសំណង់អនាធិបតេយ្យសាងសង់ដោយពលរដ្ឋមួយចំនួន ប៉ះពាល់ទៅលើដីដែលមានម្ចាស់កម្មសិទ្ធិស្របច្បាប់ មានទីតាំងនៅចំណុចចំណោតអូរត្រាវឃុំបិត្រាំងស្រុកព្រនប់។
លោក ជួន ណារិន្ទ ស្នងការខេត្តព្រះសីហនុ បានឲ្យដឹងថា ក្នុងប្រតិបត្តិការជួយសម្រួលចរាចរណ៍ករណីពលរដ្ឋជាង ១០០ នាក់តវ៉ាបិទផ្លូវជាតិលេខ ៤ នោះ បានធ្វើឲ្យកម្លាំងសមត្ថកិច្ចចំនួន ៦ នាក់ បានរងរបួសក្នុងនោះកម្លាំងនគរបាល ៤ នាក់ និងកម្លាំងប្រជាការពារចំនួន ២ នាក់ និងខូចខាតរថយន្តចំនួន ៣ គ្រឿង រថយន្តរបស់អធិការស្រុក ២ គ្រឿង និងរថយន្តរបស់មន្ត្រីអាវុធហត្ថ ១ គ្រឿង ដែលប្រជាពលរដ្ឋជិត ១០០ នាក់ បានយកដុំថ្ម និងមែកឈើដាក់លើផ្លូវជាតិលេខ ៤ បង្កការកកស្ទះដល់អ្នកធ្វើដំណើរ៕
