ភ្នំពេញៈ មន្ត្រីអគ្គស្នងការដ្ឋាននគរបាលជាតិបានឲ្យដឹងកាលពីថ្ងៃម្សិលមិញថា សមត្ថកិច្ចបានបញ្ជូនសមាជិក ៣ រូប របស់អតីតគណបក្សសង្គ្រោះជាតិទៅសាលាដំបូងរាជធានីភ្នំពេញក្រោយពីចាប់ខ្លួនពាក់ព័ន្ធនឹងករណីទទួលបានផែនការពីក្រៅប្រទេសគ្រោងធ្វើសកម្មភាពប្រមូលផ្តុំកម្លាំង ដាក់ផែនការបាតុកម្មបង្កអសន្តិសុខ។
លោក ឆាយ គឹមខឿន អ្នកនាំពាក្យអគ្គស្នងការនគរបាលជាតិបានអះអាងថា ការចាប់ខ្លួនសកម្មជនអតីតគណបក្សសង្គ្រោះជាតិ ៣ រូបនេះ បានធ្វើដាច់ដោយឡែកៗពីគ្នានៅក្នុងខេត្តសៀមរាប បន្ទាយមានជ័យ និងនៅក្នុងទីក្រុងភ្នំពេញកាលពីចុងសប្តាហ៍មុន។
លោក ឆាយ គឹមខឿន បានថ្លែងប្រាប់កាសែតភ្នំពេញប៉ុស្តិ៍កាលពីម្សិលមិញថា៖ «យើងបានឃាត់ខ្លួនជនដែលបានទទួលផែនការពីក្រៅប្រទេសដែលប្រុងធ្វើសកម្មភាពប្រមូលផ្តុំកម្លាំង ប្រឆាំងជាមួយនឹងការអនុវត្ដដីកាតុលាការសម្រាប់ទណ្ឌិត សម រង្ស៊ី ជាមួយនឹងផែនការបាតុកម្មបង្កអសន្តិសុខ ហើយយើងឃាត់ខ្លួនបាន ៣ នាក់ ហើយយើងបានបញ្ជូនទៅតុលាការអស់ហើយដើម្បីបន្តនីតិវិធី»។
អ្នកនាំពាក្យរូបនេះបានបដិសេធផ្តល់ព័ត៌មានលម្អិតពាក់ព័ន្ធថា តើអ្នកទាំង ៣ នាក់ខាងលើនេះបានទទួលផែនការពីលោក សម រង្ស៊ី ដោយរបៀបណានោះទេដោយសារតែសំណុំរឿងនេះស្ថិតនៅក្នុងដែនសមត្ថកិច្ចរបស់តុលាការ។
លោក គឹមខឿន ថ្លែងថា៖ «យើងមិនប្រហែសទេ យើងមានភ័ស្តុតាងច្បាស់លាស់ហើយ។ យើងមិនយកព័ត៌មានពីហ្វេសប៊ុកមកចាប់គេបានទេហើយពាក់ព័ន្ធថាពួកគាត់ទទួលផែនការយ៉ាងណា វាហួសសមត្ថកិច្ច នគរបាលជាតិហើយសមត្ថកិច្ចខាងតុលាការគាត់គឺជាអ្នកពិនិត្យរឿងនេះ»។
ទោះជាយ៉ាងណាក៏ដោយយោងតាមសេចក្តីថ្លែងការណ៍របស់គណបក្សសង្គ្រោះជាតិដែលចុះផ្សាយកាលពីថ្ងៃទី ១៤ ខែកញ្ញាបានឲ្យដឹងថា សមត្ថកិច្ចបានធ្វើការឃាត់ខ្លួនសកម្មជនគណបក្សសង្គ្រោះជាតិចំនួន ៦ នាក់ដោយគ្មានដីការួមមាន ១-លោក យ៉ាត ភារម្យ ២-លោក ទុំ ប៊ុនថន ៣-កញ្ញា យូ ចាន់ធានី ៤-លោក លី ម៉េងឃាង ៥-លោក លី លីន និង ៦-លោក ឈុន ថៃយុទ្ធ ក្នុងរយៈពេល ២ ថ្ងៃ កាលពីចុងសប្តាហ៍កន្លងទៅនេះ។
សេចក្ដីថ្លែងការណ៍ដដែលនេះបានឲ្យដឹងថា៖ «ការចាប់ និងឃុំខ្លួនសកម្មជនគណបក្សសង្គ្រោះជាតិខាងលើនេះគឺជាទង្វើរំលោភបំពានយ៉ាងកម្រោលលើច្បាប់ជាតិ និងអន្តរជាតិ ព្រមទាំងរដ្ឋធម្មនុញ្ញនៃព្រះរាជាណាចក្រកម្ពុជា និងជាសកម្មភាពព្រៃផ្សៃដូចរបបខ្មែរក្រហមដែលបានប្រើវិធីចាប់ចង និងសម្លាប់មនុស្សដែលគ្មានកំហុសដើម្បីបង្ក្រាប និងបំបាក់ស្មារតីប្រជាពលរដ្ឋស្លូតត្រង់ មិនឲ្យហ៊ានងើបឡើងតស៊ូ ទាមទារយុត្តិធម៌ និងសិទ្ធិសេរីភាពរបស់ខ្លួន»។
លោក ជិន ម៉ាលីន អ្នកនាំពាក្យក្រសួងយុត្តិធម៌បានច្រានចោលសេចក្ដីថ្លែងការណ៍របស់អតីតគណបក្សសង្គ្រោះជាតិ ដោយអះអាងថាការចាប់ខ្លួនសកម្មជនអតីតគណបក្សសង្គ្រោះជាតិទាំងនោះគឺជានីតិវិធីច្បាប់ត្រឹមត្រូវ ហើយការចាប់ខ្លួននេះមិនរំលោភបំពានសិទ្ធិសេរីរបស់ប្រជាពលរដ្ឋនោះទេតែជាការទប់ស្កាត់បទល្មើស។
លោក ម៉ាលីន ថ្លែងថា៖ «ករណីនេះមិនមែនជាការរឹតត្បិតសិទិ្ធសេរីភាពនោះទេ តែដោយសារតែសមត្ថកិច្ចបានរកឃើញថា មានតម្រុយនៃបទល្មើសដូច្នេះជាចំណាត់ការផ្លូវច្បាប់សមត្ថកិច្ចហៅពួកគេមកសួរនាំ ហើយសមត្ថកិច្ចបានរកឃើញថា មានបទល្មើសកើតឡើងមែន គេបញ្ជូនសំណុំរឿងទៅព្រះរាជអាជ្ញាហើយព្រះរាជអាជ្ញាបន្តនីតិវិធីចោទប្រកាន់»៕
វីដេអូ៖