.jpg)
លោក គួច ចំរើន អភិបាលខេត្តព្រះសីហនុ។ រូបថត សហការី
ព្រះសីហនុៈ មន្ត្រីខេត្តព្រះសីហនុបានអះអាងកាលពីម្សិលមិញថា ស្ថានភាពនៃការអភិវឌ្ឍសន្ដិសុខ សណ្ដាប់ធ្នាប់ក្នុងខេត្ដព្រះសីហនុនាពេលបច្ចុប្បន្នមានភាពវិជ្ជមានច្រើនជាពិសេស ក្រោយពីអភិបាលខេត្ដថ្មីលោក គួច ចំរើន ឡើងកាន់តំណែងបានជិត ៤ ខែ ប៉ុន្តែមន្ត្រីអង្គការមួយនៅតែមើលឃើញពីភាពខ្វះចន្លោះក្នុងខេត្តនេះនៅឡើយ។
លោក ឃាង ភារម្យ អ្នកនាំពាក្យសាលាខេត្ដព្រះសីហនុប្រាប់ភ្នំពេញ-ប៉ុស្ដិ៍កាលពីម្សិលមិញថា សន្ដិសុខសណ្ដាប់ធ្នាប់ក្នុងខេត្ដព្រះសីហនុគឺមានការរឹតបន្ដឹងខ្លាំង បន្ទាប់ពីរាជរដ្ឋាភិបាលបិទអាជីវកម្មបើកកាស៊ីណូអនឡាញដែលធ្វើឲ្យសកម្មភាពជនបរទេសជាតិចិនមិនសូវច្របូកច្របល់ដូចមុន។ ប៉ុន្ដែក៏មានចំណុចអសកម្មមួយចំនួនតូចបានកើតឡើងផងដែរ។
លោកថ្លែងថា៖ «យើងសង្ឃឹមថា វានឹងល្អទាំងព្រមនៅពេលហេដ្ឋារចនាសម្ព័ន្ធទាំងអស់បានរៀបចំរួចរាល់វានឹងធ្វើឲ្យខេត្ដព្រះសីហនុជាពិសេសទីប្រជុំជន អាចឆ្លើយតបទៅនឹងកំណើននៃការអភិវឌ្ឍបាន។ ក្រុងព្រះសីហនុនឹងអាចទៅជាទីក្រុងមួយមានការរីកចម្រើន ស៊ីវិល័យ និងជាក្រុងគំរូ ពហុបំណង ចំពោះការអភិវឌ្ឍហេដ្ឋារចនាសម្ព័ន្ធនៅក្នុងប្រទេសកម្ពុជា»។
លោកបញ្ជាក់ថា៖ «រដ្ឋបាលខេត្ដព្រះសីហនុក្រោមការដឹកនាំរបស់ឯកឧត្ដមអភិបាលខេត្ដ គួច ចំរើន គឺមានផែនការច្បាស់លាស់ណាស់ព្រោះឯកឧត្ដមធ្វើការងារទៅតាមផែនការមិនមែនធ្វើតាមអារម្មណ៍ទេ»។
លោក ភារម្យ បានឲ្យដឹងថាលោក គួច ចំរើន បានយកផែនការអភិវឌ្ឍន៍ខេត្ដព្រះសីហនុជាគោល និងបានបំបែកផែនការជាវិស័យតូចៗដើម្បីធ្វើការងារ។ ដូច្នេះគ្រប់មន្ទីរ និងអង្គភាពទាំងអស់សុទ្ធតែមានផែនការសម្រាប់ធ្វើការងារច្បាស់លាស់។
លោកបានបញ្ជាក់ថា៖ «យើងគិតថា ពេលរដ្ឋបាលខេត្ដយើង ធ្វើការងារប្រកបដោយផែនការច្បាស់លាស់ ជាលក្ខណៈប្រព័ន្ធបែបនេះ យើងនឹងទទួលបានជោគជ័យ។ យើងបានឃើញសញ្ញាណវិជ្ជមាននៃការអភិវឌ្ឍចំពោះមុខហើយ។ រដ្ឋបាលខេត្ដរួមនឹងមន្ត្រីមកពីក្រសួងពាក់ព័ន្ធបានបំពេញការងារតាមជំនាញរៀងៗខ្លួនសំដៅធ្វើឲ្យខេត្ដព្រះសីហនុរីកចម្រើនកាន់តែខ្លាំងឡើង»។
ថ្លែងនៅក្នុងពិធីតែងតាំងលោក គួច ចំរើន ជាអភិបាលខេត្តព្រះសីហនុកាលពីថ្ងៃទី ២៩ ខែមិថុនាកន្លងទៅលោកឧបនាយករដ្ឋមន្ដ្រី ស ខេង រដ្ឋមន្ដ្រីក្រសួងមហាផ្ទៃធ្លាប់បានលើកឡើងពីបញ្ហាប្រឈមមួយចំនួនដែលខេត្តព្រះសីហនុកំពុងជួបប្រទះដោយលោកស្នើឲ្យដោះស្រាយជាបន្ទាន់។
បើតាមលោក ស ខេង បញ្ហាប្រឈមទាំងនោះរួមមាន ទំនាស់ដីធ្លី,ការគ្រប់គ្រងដីធ្លី គុណភាពសំណង់សន្ដិសុខនៅកោះរ៉ុង និងបណ្ដាកោះដែលចំណុះឲ្យក្រុងព្រះសីហនុ ហេដ្ឋារចនាសម្ព័ន្ធផ្លូវគមនាគមន៍ និងបញ្ហាលូទឹកកខ្វក់ទឹកភ្លៀងជាដើម។ ប៉ុន្ដែលោកនាយករដ្ឋមន្ដ្រី ហ៊ុន សែន កាលពីខែមិថុនាធ្លាប់បានសរសើរលោក គួច ចំរើន ថាជាមនុស្សមានសមត្ថភាព និងយល់ដឹងអំពីការងារគ្រប់គ្រងរដ្ឋបាលបានល្អ។
កាលពីថ្ងៃទី ៩ ខែតុលាថ្មីៗនេះគណ:ប្រតិភូវិនិយោគពាណិជ្ជកម្ម និងសេដ្ឋកិច្ចចិន ៤០ ក្រុមហ៊ុនបានមកបំពេញទស្សនកិច្ចនៅខេត្តព្រះសីហនុ និងជួបពិភាក្សាជាមួយលោក គួច ចំរើន អភិបាលខេត្តព្រះសីហនុដើម្បីស្វែងយល់ពីសក្តានុពលវិនិយោគ និងទេសចរណ៍នៅក្នុងខេត្តនេះ។
នៅក្នុងជំនួបនោះលោក គួច ចំរើន បានថ្លែងថា រាជរដ្ឋាភិបាលបានកំណត់ខេត្តព្រះសីហនុជាតំបន់សេដ្ឋកិច្ចពិសេសគំរូពហុបំណងធ្វើឱ្យខេត្តមានការប្រែប្រួល ខណៈពីមុនខេត្តនេះជាខេត្តទេសចរណ៍ ប៉ុន្ដែមកទល់បច្ចុប្បន្នជាខេត្តពាណិជ្ជកម្មមានតំបន់សេដ្ឋកិច្ចពិសេសចំនួន ៥ កំពុងដំណើរការ និង ៤ ទៀតកំពុងត្រៀមដំណើរការ ខណៈមានក្រុមហ៊ុនប្រមាណ ៣០០ បានមកវិនិយោគ និងបានផ្តល់ការងារជូនពលរដ្ឋជាង ៨ ម៉ឺននាក់។
លោកថ្លែងថា៖ «មានសក្តានុពលជាច្រើនផ្សេងទៀតបានផ្តល់ឱកាសដល់អ្នកវិនិយោគទុនដើម្បីពិនិត្យ និងធ្វើការសិក្សាលើការវិនិយោគនៅខេត្តព្រះសីហនុ។ បច្ចុប្បន្នមានការវិនិយោគផ្នែកឧស្សាហកម្មធុនស្រាល យើងចង់មានឧស្សាហកម្មធុនធ្ងន់បន្ថែមទៀត»។
លោក HONG ZUBIN ប្រធានគណ:ប្រតិភូ វិនិយោគពាណិជ្ជកម្ម និងសេដ្ឋកិច្ចចិនបានថ្លែងថា៖ «ខេត្តព្រះសីហនុមានការអភិវឌ្ឍរីកចម្រើនយ៉ាងលឿនក្រោមការគ្រប់គ្រងរបស់អាជ្ញាធរខេត្តទាក់ទងហេដ្ឋារចនាសម្ព័ន្ធវិស័យសំណង់នានាមានការរីកចម្រើន។ ប្រតិភូក៏ចង់ដឹងពីវិស័យសំណង់ អចលនទ្រព្យឧស្សាហកម្ម កសិកម្ម ការវេចខ្ចប់ ការកែច្នៃផលិតផលកសិកម្ម ហើយសង្ឃឹមថានឹងមានកិច្ចសហប្រតិបត្តិការកាន់តែល្អបន្ថែមទៀតនាពេលខាងមុខ»។
យ៉ាងណាក្ដីលោក សុខ សុខុម ប្រធានអង្គការស្រាវជ្រាវជាតិកម្ពុជា (CNRO) បានថ្លែងថា ស្ថានភាពនៅខេត្ដព្រះសីហនុ បច្ចុប្បន្ននៅមិនទាន់ប្រសើរទេ ទាំងផ្នែកសន្ដិសុខ សណ្ដាប់ធ្នាប់ បញ្ហាចរាចរណ៍ វិវាទដីធ្លី ការទន្ទ្រានដីធ្លីនៅតំបន់ឧទ្យានជាតិ និងតំបន់ឆ្នេរជាដើម។
លោកថា៖ «បញ្ហាចរាចរណ៍នៅតែកកស្ទះ ហេដ្ឋារចនាសម្ព័ន្ធរងការខូចខាតខ្លាំងមិនទាន់ស្ដារឡើងវិញបាននៅឡើយ។ ចំណែកករណីបាញ់បោះអំពើឃាតកម្មនៅតែកើតមាន ទោះបីមានការបង្ក្រាបទាន់ពេលក្ដី»។
ទន្ទឹមនឹងនេះលោក សុខុម ក៏បានរិះគន់ពីបញ្ហាបរិស្ថានផងដែរ ខណៈលោកឃើញសំរាមក្នុងក្រុងព្រះសីហនុនៅមានភាពអួអាប់នៅឡើយ។
លោកថា៖ «ខ្ញុំសូមឲ្យរដ្ឋបាលខេត្ដពង្រឹងការដោះស្រាយបញ្ហាឱ្យមានប្រសិទ្ធភាពគ្រប់ករណីទាំងអស់។ ត្រូវតែរួមគ្នាដោះស្រាយទើបមានប្រសិទ្ធភាពមិនត្រូវរក្សាទុកសំណុំរឿងនៅតែលើតុនោះទេ។ យើងឃើញថា អង្គភាពពាក់ព័ន្ធមានច្រើនណាស់ក្នុងការធ្វើការងារ មិនមែនមានតែរដ្ឋបាលខេត្ដទេក្នុងនោះមានអភិបាលរងទទួលបន្ទុកលើវិស័យនីមួយៗផងដែរ»៕
