ភ្នំពេញៈ មន្ត្រីជំនាញរាជធានីភ្នំពេញកាលពីថ្ងៃម្សិលមិញបានស្ទូចសាឡង់ដឹកខ្សាច់ ដែលកឿងជាប់នឹងសសរស្ពានព្រែកតាមាក់កាលពីដើមខែកញ្ញាចេញបានហើយ បន្ទាប់ពីផ្អាកប្រតិបត្តិការមួយរយៈក្រោយចំណាយពេលជិត ១ សប្តាហ៍ នៅតែមិនអាចទាញសាឡង់ចេញបាន ព្រោះតែសម្ពាធទឹកបុកខ្លាំង។
ជាមួយនឹងការទទួលបានជោគជ័យក្នុងការស្ទូចសាឡង់នេះចេញបានលោក គង់ វិមាន អ្នកនាំពាក្យក្រសួងសាធារណការ និងដឹកជញ្ជូនបានប្រាប់ភ្នំពេញប៉ុស្តិ៍ពីម្សិលមិញថា ក្រុមការងារបានដំណើរការយកសាឡង់នេះបន្តតាំងពីថ្ងៃអាទិត្យរហូតដល់ថ្ងៃត្រង់ម្សិលមិញដោយបានបូមខ្សាច់ និងទឹកដែលនៅសេលសល់ក្នុងសាឡង់ ហើយក្រុមជំនាញក៏បានប្រើប្រាស់សាឡង់ផ្សេងទៀត ដើម្បីអូសចេញដោយជោគជ័យស្របពេលដែលទឹកទន្លេមិនសូវហូរខ្លាំង។
លោកបន្តថា៖ «ពិនិត្យទៅលើទិដ្ឋភាពជាក់ស្តែង យើងបានធ្វើការងារនេះយ៉ាងយកចិត្តទុកដាក់ ដោយសារតែបេសកកម្មនៃការយកសាឡង់ដែលជាប់គាំងតាំងពីថ្ងៃទី ៨ ខែកញ្ញាកន្លងមកនេះគឺដោយសារតែយើងយករយៈពេល ៥ ទៅ ៦ ថ្ងៃគឺស្ទះដោយសារទំហំទឹកច្រើន បុកខ្លាំងមិនអាចយកបាន។ ប៉ុន្តែឥឡូវនេះដោយសារទឹកទន្លេបានស្រកច្រើនដែលអំណោយផលដល់ក្រុមការងារបំពេញបេសកកម្មបន្តនេះ»។
លោក គង់ វិមាន ក៏បានឲ្យដឹងដែរថា ក្រុមជំនាញដែលជាអ្នកបច្ចេកទេសរួមមានកម្ពុជា និងចិនបានពិនិត្យហើយថា ការជាប់គាំងសាឡង់ក្នុងមួយរយៈពេលកន្លងមកនេះគឺមិនបណ្តាលឲ្យប៉ះពាល់ដល់សសរស្ពាននោះទេ ព្រោះតែបានធ្វើការបូមខ្សាច់ចេញខ្លះពីសាឡង់ ដើម្បីសម្រាលបន្ទុក និងបានដាក់ពោងជាច្រើនសម្រាប់ទប់កម្លាំងទឹករុញ។
លោកបញ្ជាក់បន្តថា៖ «សម្រាប់ក្រសួងសាធារណការ គឺដោយសារតែភាពជាក់ស្តែងសាឡង់ដែលជាប់គាំងក្នុងរយៈពេលប៉ុន្មានថ្ងៃកន្លងមកនេះ មិនមានផលប៉ះពាល់ផ្នែកណាមួយដល់ស្ពាននោះទេ។ ដូច្នេះចំពោះវិធានការផ្សេងៗទៅម្ចាស់សាឡង់ហ្នឹង គឺផ្អែកទៅលើសមត្ថកិច្ចអាជ្ញាធរមូលដ្ឋានយើង»។
យ៉ាងណាក៏ដោយអ្នកនាំពាក្យរូបនេះ អំពាវនាវឲ្យនាវាចរ និងក្រុមហ៊ុនសាឡង់ដែលកំពុងចរាចរក្នុងតំបន់ គួរបង្កើនការប្រុងប្រយ័ត្នបន្ថែម ខណៈចំពោះមុខក្រសួងនឹងបង្កើនការផ្សព្វផ្សាយ និងចេញលិខិតណែនាំជាបន្តបន្ទាប់បន្ថែមទៀតក្នុងនោះក៏បានដាក់ពោងបណ្តែតនៅលើផ្ទៃទឹក និងដាក់សញ្ញាសម្គាល់នៅកន្លែងមួយចំនួន ដើម្បីងាយស្រួលឲ្យនាវា និងសាឡង់នានា បង្កើនការយកចិត្តទុកដាក់ និងបញ្ចៀសនូវការគ្រោះថ្នាក់។
កាលពីដើមខែកញ្ញា សាឡង់បូមខ្សាច់មួយនេះដែលមានទម្ងន់ទាំងខ្សាច់ និងសាឡង់ជាង ៤០០ ម៉ែត្រគុប បានជួបឧបទ្ទវហេតុរលត់ម៉ាស៊ីន ខណៈកំពុងធ្វើដំណើរស្របតាមបណ្ដោយខ្សែទឹក [ទឹកទន្លេមេគង្គ] មកប្រកៀកនឹងស្ពានព្រែកតាមាក់ ហើយត្រូវបានទឹកហូរកួចទៅប៉ះទង្គិចសសរស្ពានបណ្ដាលឲ្យកឿងជាប់លើខឿនសសរស្ពាន។ ប៉ុន្តែក្នុងហេតុការណ៍នោះមិនបង្កឲ្យនាវិកណាម្នាក់នៅក្នុងសាឡង់នោះរងរបួស ឬគ្រោះថ្នាក់ដល់ជីវិតនោះឡើយ។
លោក ចាន់ ណា ម្ចាស់សាឡង់ដឹកខ្សាច់ខាងលើបានប្រាប់ភ្នំពេញប៉ុស្តិ៍ពីម្សិលមិញថា លោកពិតជាមានការសោកស្តាយចំពោះឧបទ្ទវហេតុនេះដែលលោកអះអាងបន្តថានឹងបង្កើនការប្រុងប្រយ័ត្នបន្ថែមទៀតចំពោះការចរាចរសាឡង់របស់លោក។
លោក ចាន់ ណា បានថ្លែងឲ្យដឹងថា៖ «ជួបឧបទ្ទវហេតុបែបនេះមិនដែលចំណេញទេបាទ ប៉ុន្តែវាខូចខាតតិច សាងឡង់ហ្នឹងគ្រាន់តែវៀចបន្តិចទេ ព្រោះវាប៉ះបន្តិចបន្តួចទេ ហើយយើងបានអូសមកច្រាំងហើយ អូសយកមកដាក់នៅកំពង់ផែហើយ។ គេអត់មាននិយាយអី អត់មានពិន័យអីទេ ព្រោះគេបានពិនិត្យមើលហើយ អត់មានប៉ះពាល់ស្ពានអីទេ»។
លោក អ៊ឹង ឌីប៉ូឡា អគ្គនាយករងនៃអគ្គនាយកដ្ឋានធនធានរ៉ែនៃក្រសួងរ៉ែ និងថាមពលបានប្រាប់ភ្នំពេញប៉ុស្តិ៍ពីម្សិលមិញដែរថា ក្នុងប្រតិបត្តិការនេះក្រសួងជំនាញបានសហការគ្នាយ៉ាងយកចិត្តទុកដាក់ក្នុងនោះក៏មានក្រសួងរ៉ែ និងថាមពលផងដែរ។
លោកបញ្ជាក់ថា៖ «លោក ចាន់ណា ជាអាជីវករដឹកជញ្ជូន និងចែកចាយខ្សាច់ តែមិនមែនជាអ្នកធ្វើប្រតិបត្តិការរ៉ែខ្សាច់ទេ។ គាត់ទិញខ្សាច់ពីអ្នកមានអាជ្ញាប័ណ្ណបូមដាក់ឲ្យគាត់ដឹកជញ្ជូនយកទៅលក់បន្ត។ តែទោះជាយ៉ាងនេះក្តី ក្រសួងរ៉ែបានចូលរួមជួយជាបច្ចេកទេស និងសហប្រតិបត្តិការពីអ្នកជំនាញបូមខ្សាច់ដើម្បីយកខ្សាច់ចេញពីសាឡង់ដឹកនេះ។ ក្រោយពីឧបទ្ទវហេតុនេះក្រសួងរ៉ែ និងថាមពលបានណែនាំឱ្យអាជីវករទាំងអស់គោរពច្បាប់ចរាចរណ៍ផ្លូវទឹកឲ្យបានខ្ជាប់ខ្ជួន»៕