.jpg)
អ្នកទោស ពេលត្រូវបានបញ្ជូនមកសវនាការសាលាឧទ្ធរណ៍ ដើម្បីជំនុំជម្រះនាពេលកន្លងមក។
ភ្នំពេញៈ ការជំនុំជម្រះក្តីពិសេសនៅសាលាឧទ្ធរណ៍ត្រូវបានមន្ត្រីទទួលស្គាល់ថា នៅមានបញ្ហារាំងស្ទះខ្លះ ខណៈជនជាប់ចោទមានវត្តមានក្នុងសវនាការ តែគ្មានមេធាវីការពារក្តី បើទោះជាចៅក្រមបានធ្វើលិខិតស្នើសុំមេធាវីទៅក្រសួងយុត្តិធម៌ក្ដី។
លោក ទូច ថារិទ្ធិ អ្នកនាំពាក្យសាលាឧទ្ធរណ៍ប្រាប់កាលពីម្សិលមិញថា ករណីនេះខាងសាលាឧទ្ធរណ៍ធ្លាប់បានធ្វើលិខិតទៅក្រសួងយុត្តិធម៌ដើម្បីសុំមេធាវីមកការពារក្តីឲ្យជនជាប់ចោទ ព្រោះខាងក្រសួងយុត្តិធម៌ជាអ្នកធ្វើលិខិតទៅគណៈមេធាវីទើបមានការបញ្ជូនមេធាវីមកការពារក្តីឲ្យជនជាប់ចោទ ខណៈសំណុំរឿងខ្លះចាំបាច់ត្រូវតែមានអ្នកការពារក្ដី។
លោកបានថ្លែងថា៖ «ករណីជំនុំជម្រះលើជនជាប់ចោទជាបទឧក្រិដ្ឋ ដូច្នេះត្រូវតែមានមេធាវីជាចាំបាច់។ ព្រោះតាមនីតិវិធីច្បាប់ កាលណាសំណុំរឿងនោះជាបទឧក្រិដ្ឋគឺត្រូវតែមានមេធាវីដើម្បីការពារក្តីឲ្យជនជាប់ចោទ ឬជនល្មើសហើយបើគ្មានមេធាវីទេគឺមិនអាចដំណើរការបានទេ»។
ជុំវិញបញ្ហានេះលោក សួន វិសាល ប្រធានគណៈមេធាវីនៃព្រះរាជាណាចក្រកម្ពុជាធ្លាប់បានប្រាប់ភ្នំពេញ ប៉ុស្តិ៍ កាលពីថ្ងៃទី ៤ តុលាថាលោកបានដឹងបញ្ហាប្រឈមរបៀបហ្នឹងដែរ ប៉ុន្តែរហូតមកទល់ពេលនេះមិនមានទៀតទេ ឬបើមានមែនគឺមានតិចតួចបំផុតដោយសារបច្ចុប្បន្នយើងមានមេធាវីប្រចាំនៅតុលាការ។
លោកបញ្ជាក់ថា៖ «យើងមានតំណាងមេធាវីរបស់យើងនៅប្រចាំការជាអចិន្រៃ្តយ៍នៅតាមតុលាការនីមួយៗ។ អ៊ីចឹងនៅពេលដែលមានជនជាប់ចោទមកគឺមេធាវីរបស់យើងដែលមានចំនួន ៥០០ រូបដែលស្ម័គ្រចិត្តនោះគឺយើងមានប្រចាំការគ្រប់តុលាការទូទាំងប្រទេសតែម្តង...«អ៊ីចឹងនៅពេលតុលាការត្រូវការមេធាវីគឺតុលាការគ្រាន់តែជូនដំណឹងទៅការិយាល័យប្រតិភូរបស់យើងគឺមេធាវីរបស់យើងមកទទួលការងារភ្លាម។ ដូច្នេះមិនមានបញ្ហាដល់នីតិវិធីនៃការជម្រះក្តីទៀតទេ។ នេះគឺយើងប្រឹងប្រែងធ្វើរហូតមកដល់ពេលនេះការរាំងស្ទះគឺដោះស្រាយបាន ហើយយើងបានរៀបចំយន្តការដែលធ្វើឲ្យជនជាប់ចោទនៅតុលាការនោះបានប្រើប្រាស់សេវារបស់យើងទាន់ពេលវេលា»។
ដោយឡែកចំពោះសំណុំរឿង និងចំណាយលើការការពារក្តីជូនជនក្រីក្រនេះក្នុង ១ ឆ្នាំៗវិញលោក សួន វិសាល បានឱ្យដឹងថាមានសំណុំរឿងដែលត្រូវការពារក្តីមានប្រមាណជា ៥ ពាន់ករណី ខណៈរាជរដ្ឋាភិបាលជួយផ្តល់ថវិកាសម្រាប់ចំណាយក្នុង ១ ឆ្នាំ ១២០០ លានរៀល។ តែក្នុងចំនួនថវិកានេះធ្វើបានតែប្រហែល ៣ ពាន់ករណីប៉ុណ្ណោះ។
លោកបន្តថាទន្ទឹមនឹងនេះលោកក៏បានជួបប្រជុំជាមួយតុលាការគ្រប់ស្ថាប័នដើម្បីដឹងថា គណៈមេធាវីបានធ្វើអ្វីខ្លះ ហើយនិងដឹងថាការិយាល័យរបស់គណៈមេធាវីនៅកន្លែងណា? គឺកន្លែង ឬបន្ទប់របស់គណៈមេធាវីនៅជាប់នឹងតុលាការតែម្តង។ ព្រោះតុលាការបានឲ្យបន្ទប់មកគណៈមេធាវី ១ ឬ ២ បន្ទប់សម្រាប់ធ្វើការិយាល័យរបស់គណៈមេធាវីប្រចាំនៅតុលាការ។
ជុំវិញបញ្ហានេះភ្នំពេញប៉ុស្តិ៍មិនអាចទាក់ទងលោក ជិន ម៉ាលីន អ្នកនាំពាក្យក្រសួងយុត្តិធម៌បានទេកាលពីម្សិលមិញ។
លោក យុង ផានិត អនុប្រធាននាយកដ្ឋានការពារក្តីជនក្រីក្រនៃគណៈមេធាវីនៃព្រះរាជាណាចក្រកម្ពុជាបានថ្លែងកាលពីម្សិលមិញថា តាមនីតិវិធីពីមុនៗមកតុលាការត្រូវធ្វើលិខិតស្នើសុំទៅក្រសួងយុត្តិធម៌ ហើយបន្ទាប់មកខាងក្រសួងយុត្តិធម៌ផ្ញើបន្តទៅគណៈមេធាវី។ ប៉ុន្តែបច្ចុប្បន្ននេះក៏នៅតែអនុវត្តនីតិវិធីនេះដដែល តែការផ្តល់ព័ត៌មានធ្វើតែតាមតេឡេក្រាមទេ។
លោកបានបន្ថែមថា៖ «ឥឡូវនេះបញ្ហាកកស្ទះគ្មានមេធាវីនេះគឺកាត់បន្ថយបាន ៩០ ភាគរយហើយចំពោះវិបត្តិគ្មានមេធាវីការពារក្តីឲ្យជនជាប់ចោទនេះ។ ប៉ុន្តែយើងក៏នៅតែទទួលស្គាល់ថានៅមានបញ្ហាមួយចំនួនតូចដែរ តែទោះយ៉ាងណាការអនុវត្តនីតិវិធីផ្តល់ព័ត៌មានស្នើសុំមេធាវីតាមតេឡេក្រាមនេះជានីតិវិធីលឿនបំផុត»៕
