.jpg)
គំនរសំរាមនៅមាត់បឹងធម្មជាតិក្នុងស្រុកកូនមុំ ខេត្តរតនគិរី ដែលក្រុមហ៊ុនវៀតណាមយកមកចាក់ចោល។ រូបថត សហការី
រតនគិរីៈ មន្ត្រីបរិស្ថានរតនគិរីគ្រោងនឹងចុះពិនិត្យបឹងធម្មជាតិមួយស្ថិតក្នុងស្រុកកូនមុំ បន្ទាប់ពីសហគមន៍នេសាទបានចោទក្រុមហ៊ុនវៀតណាមថា បានចាក់កាកសំណល់ចេក និងសំរាមប្លាស្ទិកចូលទៅក្នុងទឹកធ្វើឱ្យពុលត្រី និងមិនអាចចុះនេសាទត្រីបាន។ ប៉ុន្តែអាជ្ញាធរបានអះអាងថា ក្រុមហ៊ុនវៀតណាម គ្រាន់តែជីករណ្ដៅដាក់សំរាមនៅក្បែរបឹងនោះតែប៉ុណ្ណោះ។
លោក ផុន ខេមរិន្ទ ប្រធានមន្ទីរបរិស្ថានខេត្តរតនគិរីបានប្រាប់ភ្នំពេញប៉ុស្ដិ៍នៅថ្ងៃចន្ទថា កន្លងមកក្រុមការងារពាក់ព័ន្ធខេត្តធ្លាប់បានចុះទៅណែនាំ និងធ្វើកិច្ចសន្យាឱ្យក្រុមហ៊ុនវៀតណាមឈ្មោះ ហ័ង អាញ់យ៉ា ឡាយ (Hoang AnhGia Lai) រៀបចំទុកដាក់សំរាមឱ្យបានត្រឹមត្រូវហើយ ប៉ុន្តែការរាយការណ៍ថ្មីៗនេះថា ក្រុមហ៊ុនបានចាក់កាកសំណល់ចេក និងសំរាមប្លាស្ទិកចូលបឹងស្ថិតក្នុងភូមិប្រាំ ឃុំត្រពាំងច្រេស ស្រុកកូនមុំ គឺមន្ទីរមិនដឹងច្បាស់នៅឡើយ ហើយនឹងចាត់ក្រុមមន្ត្រីចុះពិនិត្យនៅពេលខាងមុខ។
លោក ខេមរិន្ទ ថ្លែងថា៖ «បើពិនិត្យឃើញថា គាត់ (ក្រុមហ៊ុន) ពិតធ្វើឱ្យមានផលប៉ះពាល់មែន យើងនឹងពិន័យគាត់ទៅតាមច្បាប់។ មិនថាក្រុមហ៊ុន ឬផ្ទះទេ គឺត្រូវមានកន្លែងទុកដាក់សំរាមឱ្យបានត្រឹមត្រូវ ហើយយើងនឹងចុះពិនិត្យមើលសិន»។
លោកស្រី ឌុក ចាន់នី ប្រធានសហគមន៍នេសាទនៅភូមិប្រាំបានឲ្យដឹងថា កាលពីអំឡុងខែឧសភា ពលរដ្ឋបានប្រទះឃើញក្រុមហ៊ុនវៀតណាមបានដឹកសំរាមយកមកចាក់ក្នុងបឹង ហើយក្រោយពីអាជ្ញាធរឃុំ និងស្រុក និងសហគមន៍នេសាទបានចុះទៅពិនិត្យកាលពីថ្ងៃទី ២៦ ខែមិថុនា ខាងក្រុមហ៊ុនបានព្យាយាមយកដីទៅចាក់លុបសំរាមទាំងនោះ។
លោកស្រីបន្តថា កាកសំណល់ទាំងនោះភាគច្រើនគឺជាផ្លែចេក និងត្រយូងចេករួមទាំងថង់ និងដបប្លាស្ទិកដែលបានធ្វើឱ្យទឹកបឹងប្រែទៅជាពណ៌ខៀវមានក្លិនស្អុយ និងធ្វើឱ្យមានជាតិពុល ហើយពលរដ្ឋបាននាំគ្នាឈប់ចុះទៅងូតទឹក និងផ្អាកនេសាទ ក្រោយពីមានអ្នកកើតរមាស់ក្រោយពីចុះទៅក្នុងទឹកបឹងនោះ និងធ្វើឱ្យមានត្រីពុលអណ្ដែតងាប់។
លោកស្រីថ្លែងថា៖ «វាជាបឹងអភិរក្សរបស់សហគមន៍នេសាទ។ វាមិនត្រឹមតែធ្វើឱ្យទឹកពុលត្រីងាប់ ហើយពេលមនុស្សចុះទៅងូតទឹកកើតរមាស់ទេ ប៉ុន្តែវានឹងអាចហៀរចូលទៅក្នុងទន្លេស្រែពកទៀត នៅពេលដែលមានភ្លៀងធ្លាក់ខ្លាំង ព្រោះបឹងហ្នឹងស្ថិតនៅជិតទន្លេតែ ២ ទៅ ៣០០ ម៉ែត្រ ហើយនឹងធ្វើឱ្យពលរដ្ឋកើតរមាស់ថែមទៀត បើចុះទៅងូតទឹកក្នុងទន្លេហ្នឹង»។
លោកស្រី ចាន់នី ថ្លែងថា៖ «សំរាមទាំងហ្នឹងច្រើនណាស់ មិនមែនតិចទេ រាប់រយឡាន និងរាប់សិបតោន ព្រោះអណ្ដែតនៅលើផ្ទៃទឹក ៥០ ម៉ែត្រ ៤ ជ្រុងហើយហ្នឹង។ ឥឡូវគេបានយកដីទៅចាក់លុប (សំរាម) ប៉ុន្តែទោះជាចាក់លុបយ៉ាងណាក៏ដោយ ក៏នៅតែចេញទឹកមកខៀវៗ បន្ទាប់ពីពួកខ្ញុំ និងអាជ្ញាធរចុះទៅមើល ក្រុមហ៊ុនដឹងខ្លួនបានចាក់ដីលុប»។
លោកស្រីបញ្ជាក់ថា បឹងធម្មជាតិនេះគឺមានទំហំផ្ទៃប្រហែល ២ ហិកតា និងស្ថិតពីក្រុមហ៊ុនចម្ងាយប្រហែល ៥០០ ម៉ែត្រ និងពីផ្ទះពលរដ្ឋចម្ងាយប្រហែល ៣ គីឡូ។
លោក សេក ហៃ អភិបាលស្រុកកូនមុំបានបញ្ជាក់ថា ខាងក្រុមហ៊ុនគឺបានកាយកាកសំណល់ទាំងនោះចេញពីបឹងវិញអស់ហើយ។
លោក ហៃ ថ្លែងថា៖ «គេបានកាយអស់ហើយ។ មិនមែនចាក់សំរាមទេ គឺចាក់ផ្លែចេកចូលបឹង។ យើងបានធ្វើកិច្ចសន្យាឱ្យកាយយកចេញអស់ហើយ»។
លោក ង៉ែត សុភឿន មេឃុំត្រពាំងច្រេសបានបញ្ជាក់ថា ការចុះពិនិត្យរកឃើញថា ក្រុមហ៊ុនគ្រាន់តែកាយដីជារណ្ដៅសម្រាប់ដាក់សំរាមនៅក្បែរបឹងប៉ុណ្ណោះ កន្លែងដាក់សំរាមនោះ គឺមិនមែនស្ថិតនៅក្នុងឃុំត្រពាំងច្រេសទេគឺស្ថិតនៅក្នុងឃុំស្រែអង្គ្រងឯណោះ។
លោកបន្តថា អាជ្ញាធរបានណែនាំឱ្យក្រុមហ៊ុនកាយយកសំរាមទាំងនោះ ទៅដាក់នៅកន្លែងផ្សេង ដែលស្ថិតនៅឆ្ងាយពីបឹង ហើយចំណែកការលើកឡើងរបស់សហគមន៍ថាបានធ្វើឱ្យទឹកមានជាតិពុល និងធ្វើឱ្យត្រីងាប់នោះ គឺមិនមែនជាការពិតឡើយ។
លោកមេឃុំ សុភឿន បានឲ្យដឹងទៀតថា៖ «គេបានកាយរណ្ដៅដាក់សំរាមទាំងហ្នឹងដាក់ត្រឹមត្រូវហើយ ក្រោយពីពួកយើងបានចុះទៅពិនិត្យ ហើយឃើញគេកាយរណ្ដៅហ្នឹង គឺស្ថិតនៅឆ្ងាយពីប្រភពទឹក»៕
