.jpg)
លោក អ៊ិន គង់ជិត មន្ត្រីអង្គការសិទ្ធិមនុស្ស លីកាដូ។ រូបថត ហ្វេសប៊ុក
ឧត្តរមានជ័យៈ មន្ត្រីអង្គការសិទ្ធិមនុស្សលីកាដូ (LICADHO) អះអាងថា អាជ្ញាធរស្រុកអន្លង់វែងបានហាមឃាត់រូបលោក និងមន្ត្រីអង្គការសហប្រជាជាតិ (UN) ដែលចុះស៊ើបអង្កេតជម្លោះដីធ្លីប្រជាពលរដ្ឋ ១២២ គ្រួសាររស់នៅឃុំអន្លង់វែង ក្រោយពីមានការអះអាងថាដីធ្លីរបស់ពួកគេត្រូវបានរំលោភយកដោយមន្ត្រីជាន់ខ្ពស់រដ្ឋបាលស្រុកឈ្មោះ ងួន លីន។
លោក អ៊ិន គង់ជិត មន្ត្រីសម្របសម្រួលអង្គការសិទ្ធិមនុស្សលីកាដូឲ្យដឹងពីម្សិលមិញថារូបលោកផ្ទាល់ និងមន្ត្រីរបស់ UN២ នាក់ទៀតត្រូវបានអាជ្ញាធរមូលដ្ឋានស្រុកអន្លង់វែងហាមឃាត់ពួកលោកមិនឲ្យចូលទៅជួបសាកសួរព័ត៌មានមួយចំនួនពីប្រជាពលរដ្ឋដែលកំពុងមានទំនាស់ដីធ្លីជាមួយមន្ត្រីមានអំណាចក្នុងស្រុក។ លោកថាក្រោយមកពួកលោកត្រូវបានកោះហៅឲ្យទៅជួបលោកអភិបាលស្រុកអន្លង់វែង ឈ្មោះ ហោ ជិនវិរយុទ្ធ។
លោក គង់ជិត បញ្ជាក់ថា៖ «ពេលពួកខ្ញុំចុះទៅជួបពលរដ្ឋហ្នឹង គឺអាជ្ញាធរចម្រុះមានប៉ូលិស ទាហាន និងកងរាជអាវុធហត្ថសរុប ១៥ នាក់មកហាមឃាត់ ដោយប្រាប់ថាពួកខ្ញុំមកមិនបានប្រកាសប្រាប់គេជាមុន។ ក្រោយមកគេប្រាប់ឲ្យពួកខ្ញុំទៅជួបលោកអភិបាលស្រុកអន្លង់វែង។ ខ្ញុំក៏បានសួរនាំពួកគាត់អំពីបញ្ហាដីធ្លីរបស់ពលរដ្ឋទាំងនេះដែរ ប៉ុន្ដែគាត់មិនប្រាប់លម្អិតទេ ដោយគ្រាន់តែថា ពលរដ្ឋទាំងនេះមកទន្ទ្រានដីរដ្ឋ»។
លោកបន្តថាសកម្មភាពនេះគឺជាការរើសអើង និងរារាំងមន្ត្រីសង្គមស៊ីវិលចុះបំពេញភារកិច្ច ឬចុះជួបជាមួយប្រជាពលរដ្ឋដែលកំពុងរងគ្រោះ។ សង្គមស៊ីវិលក៏មានសិទ្ធិចូលរួមក្នុងការងារនេះដែរ ជាពិសេសពួកគេត្រូវការ ការយកចិត្តទុកដាក់លើកទឹកចិត្ត និងជំរុញដោះស្រាយបញ្ហាជូនពួកគាត់ឲ្យបានឆាប់។
លោក ហោ ជិនវិរយុទ្ធ អភិបាលស្រុកអន្លង់វែងប្រាប់ភ្នំពេញប៉ុស្ដិ៍ពីម្សិលមិញថា លោកពិតជាបានអញ្ជើញមន្ត្រីអង្គការសង្គមស៊ីវិល និងមន្ត្រី UN មែនដើម្បីនិយាយប្រាប់អំពីករណីជនខិលខូចទាំងនេះដែលទន្ទ្រាន និងកាន់កាប់ដីរបស់រដ្ឋដោយគ្មានច្បាប់អនុញ្ញាត ប៉ុន្ដែមន្ត្រីទាំងនេះមិនបាននិយាយ ឬសួរនាំអ្វីទេ។
លោក ជិនវិរយុទ្ធ បញ្ជាក់ថា៖ «អាជ្ញាធរអត់បានរារាំងអ្វីពួកគាត់ទេ គឺអញ្ជើញពួកគាត់មកជជែកគ្នាពីបញ្ហាផ្សេងៗទៀត ហើយពួកគាត់ក៏អញ្ជើញមកដែរ ហើយយើងបានជជែកគ្នាពីនេះ ពីនោះអ៊ីចឹង ហើយអារឿងដីធ្លីហ្នឹង ខ្ញុំប្រាប់ពួកគាត់ហើយគឺយើងបានផ្ដល់សំណងបានមួយចំនួន តែមួយចំនួនទៀតមិនព្រមទទួលយកទេ ហើយពួកគាត់គ្រាន់តែទន្ទ្រានដីរដ្ឋយកសោះឲ្យសំណងហើយនៅតែមិនយក»។
លោកបន្ដថាអាជ្ញាធរបានកាត់ដីជូនពួកគាត់នៅកន្លែងផ្សេងរួចរាល់ហើយ ប៉ុន្ដែពួកគាត់នៅតែបន្តទាមទារកន្លែងដែលពួកគាត់កាប់ឆ្ការទន្ទ្រាននោះ បើទោះបីជាអាជ្ញាធរបានប្រាប់ ឬពន្យល់ពួកគាត់យ៉ាងណាក៏ដោយ។
លោកថា ទីតាំងដីកន្លែងនោះអាជ្ញាធរមិនបានកាត់ឲ្យពលរដ្ឋណានោះទេ ដោយទុកដីតំបន់នោះជាទីទួលមានសុវត្ថិភាព ខណៈមានទឹកជំនន់មកម្ដងៗនឹងជម្លៀសពលរដ្ឋទៅកាន់ទីទួលសុវត្ថិភាពនោះ។
លោក ហឿ ហាក់ អាយុ ៣០ ឆ្នាំតំណាងប្រជាពលរដ្ឋរងគ្រោះដោយសាររំលោភដីធ្លីចំនួន ១២២ គ្រួសារដែលជាម្ចាស់ដីទំហំ ៤០០ ហិកតារស់នៅភូមិអូរតាម៉េង ឃុំអន្លង់វែង ស្រុកអន្លង់វែង ខេត្តឧត្តរមានជ័យថ្លែងថាពលរដ្ឋបានកាន់កាប់ដីនេះតាំងពីឆ្នាំ ២០០៦។ ក្រោយមកនៅឆ្នាំ ២០១៣ ក៏មានក្រុមហ៊ុនឯកជនមួយបានឈូសឆាយ និងបំផ្លាញដំណាំរបស់ពួកគាត់គ្មានសល់ ដោយអះអាងថា ដីនេះសម្រាប់ធ្វើជាកន្លែងទីទួលមានសុវត្ថិភាពស្រុកអន្លង់វែង។
ទោះជាយ៉ាងណាពលរដ្ឋបានដាក់ពាក្យប្ដឹងសុំដីនោះមកវិញ ប៉ុន្ដែអាជ្ញាធរគ្រប់ជាន់ថ្នាក់គ្មាននរណាអើពើជួយដោះស្រាយទេ។
លោកហាក់បញ្ជាក់ថា៖ «សព្វថ្ងៃនេះ ពួកខ្ញុំទាំង ១២២ គ្រួសារ កំពុងរស់នៅដោយភាពភ័យខ្លាច និងកំពុងបាត់បង់ដីចម្ការ ដីលំនៅឋានជាបន្ដបន្ទាប់ ហើយអាចនឹងឈានទៅរកការបាត់បង់ទាំងស្រុង បើមន្ត្រីជាន់ខ្ពស់មិនមានការអន្តរាគមន៍ជួយពលរដ្ឋទេ ហើយក៏ធ្វើឲ្យពលរដ្ឋធ្លាក់ខ្លួនក្រីក្រថែមទៀត។ ដូច្នេះ ឯកឧត្តម ជា សុផារ៉ា ជួយអន្តរាគមន៍ដល់យើងខ្ញុំផង»។
លោកបន្តថានៅថ្ងៃទី ២៦ ខែកុម្ភៈ ឆ្នាំ ២០១៧ លោក ងួន លីន នាយករដ្ឋបាលស្រុកអន្លង់វែងបានដឹកនាំកម្លាំងចម្រុះប្រដាប់អាវុធចុះមកឈូសឆាយដី និងផលដំណាំពលរដ្ឋផ្សេងៗទៀតគ្មានខ្វល់អ្វីទាំងអស់ ព្រមទាំងបានយកដីរបស់ពួកគាត់ទៅចែកឲ្យប្រជាពលរដ្ឋផ្សេងទៅវិញ ដោយឃើញសកម្មភាពបែបនេះ ប្រជាពលរដ្ឋស្នើសុំឲ្យឈប់ឈូសឆាយ ប៉ុន្ដែត្រូវបានមន្ត្រីអាជ្ញាធរទាំងនោះ បានស្រែកគំរាមចាប់ដាក់គុក និងប្រើហិង្សាលើស្ដ្រីម្នាក់រងរបួសស្រាលផងដែរ។
លោក ងួន លីន នាយករដ្ឋបាលស្រុកអន្លង់វែងកាលពីថ្ងៃម្សិលមិញមិនទាន់អាចទាក់ទង ដើម្បីសុំការបញ្ជាក់ជុំវិញការចោទប្រកាន់នេះបាននៅឡើយទេ។
តាមបញ្ញត្តិរបស់ប្រជាពលរដ្ឋទាំង ១២២ គ្រួសារដែលបានដាក់ទៅកាន់ក្រសួងរៀបចំដែនដី នគរូបនីយកម្ម និងសំណង់កាលពីថ្ងៃទី ២២ ខែឧសភា ឆ្នាំ ២០១៧ បានបង្ហាញថា៖ «យើងខ្ញុំជាប្រជាពលរដ្ឋចំនួន ១២២ គ្រួសារ រស់នៅចំណុចជប់ត្រកួន ភូមិអូរតាម៉េង ឃុំអន្លង់វែង ស្រុកអន្លង់វែង ខេត្តឧត្តរមានជ័យ សូមស្នើសុំជួយដោះស្រាយបញ្ហាដីធ្លីនៅទីតាំងខាងលើចំនួន ៤០០ ហិកតាដែលត្រូវបានលោក ងួន លីន មានមុខរបរជានាយករដ្ឋបាលស្រុកអន្លង់វែងបានរំលោភយក»៕
