.jpg)
លោក អ៊ុក កុសល មុនដកចេញពីតំណែងស្នងការខេត្ត។ សហការី
ភ្នំពេញៈ មន្ត្រីនៃក្រសួងមហាផ្ទៃបានបញ្ជាក់ថា ករណីអតីតស្នងការនគរបាលខេត្តកំពង់ធំលោក អ៊ុក កុសល ដែលទើបត្រូវបានដកតំណែង និងស្នើសុំបញ្ចុះឋានន្តរស័ក្តិ ក្រោយមន្ត្រីនគរបាលស្ត្រីក្រោមឱវាទប្តឹងពីករណីបៀតបៀនកេរភេទនោះ មិនពាក់ព័ន្ធនឹងបទល្មើសព្រហ្មទណ្ឌទេ ដោយសារជនរងគ្រោះបានប្តឹងតែក្នុងការងាររដ្ឋបាល។
អ្នកនាំពាក្យក្រសួងមហាផ្ទៃលោក ខៀវ សុភ័គ បានប្រាប់ភ្នំពេញប៉ុស្តិ៍ពីថ្ងៃ ៩ កញ្ញា ថា ក្រសួងមហាផ្ទៃបានបញ្ចប់តួនាទីលោក អ៊ុក កុសល ពីស្នងការខេត្តកំពង់ធំជាផ្លូវការហើយ។ ជាមួយនេះក្រសួងក៏បានស្នើទៅរដ្ឋាភិបាលដើម្បីបន្ថយឋានន្តរស័ក្ដិពីឧត្តមសេនីយ៍ទោមកត្រឹមវរសេនីយ៍ឯកផងដែរ។ ក៏ប៉ុន្តែលោកថា សំណុំរឿងនេះមិនពាក់ព័ន្ធនឹងបទព្រហ្មទណ្ឌទេ ដោយសារជនគ្រោះទាំងនោះមិនបានប្តឹងលោក អ៊ុក កុសល ពីបទព្រហ្មទណ្ឌនោះឡើយ។
លោក ខៀវ សុភ័គ បញ្ជាក់ថា៖ «ជនរងគ្រោះបានប្តឹងតែក្នុងការងាររដ្ឋបាល ហើយយើងក៏បានរកឃើញពីកំហុសរបស់បុគ្គលិកនេះថា បានប្រព្រឹត្តដូចការប្តឹងនេះមែន ហើយក្រសួងក៏បានចេញលិខិតសម្រេចបញ្ចប់តំណែងរបស់គាត់ជាស្ថាពររួមនឹងការស្នើសុំបញ្ចុះឋានន្តរស័ក្ដិគាត់ផងដែរ។ ខ្ញុំគិតថា ជាការសមរម្យហើយចំពោះកិច្ចការនេះដែលជាការដាក់ទោសធ្ងន់...»។
លោកបន្តថា ការរិះគន់ចំពោះការដាក់ទោសត្រឹមបញ្ចប់តំណែង និងបន្ថយឋានន្តរស័ក្តិនេះ មិនចេះអស់ទេ គឺវាតែងតែកើតឡើងជាធម្មតា។ បើតាម លោក ខៀវ សុភ័គ ស្នងការនគរបាលខេត្តកំពង់ធំថ្មីដែលត្រូវចូលជំនួសលោក អ៊ុក កុសល គឺលោក ម៉ែន លី ជាអតីតស្នងការខេត្តឧត្តរមានជ័យ។
លោកស្រី ចក់ សុភាព នាយិកាមជ្ឈមណ្ឌលសិទ្ធិមនុស្សកម្ពុជា (CCHR) បានសរសេរលើហ្វេសប៊ុករបស់លោកស្រីថា ការផ្តល់ព័ត៌មានពីលទ្ធផលស៊ើបអង្កេតរបស់ក្រសួងមហាផ្ទៃបង្ហាញពីតម្លាភាពមួយកម្រិតលើករណីបៀតបៀនកេរភេទលើមន្ត្រីក្រោមបន្ទុក។ ក៏ប៉ុន្តែការមិនចាត់ការផ្លូវច្បាប់នេះមិនមែនជាដំណោះស្រាយប្រកបដោយគតិយុត្តទេ តែជាការផ្តល់សារដល់ជនល្មើសថា ខ្លួននឹងរួចពីសំណាញ់ច្បាប់នូវទង្វើបំពានរបស់ខ្លួន។
លោកស្រីថា៖ «ហេតុផលនៃសេចក្តីថ្លៃថ្នូរ កិត្តិយសដល់ជនរងគ្រោះអាចការពារតាមនីតិវិធីរបស់តុលាការដែលមានជាធរមាន បើមិនដូច្នោះ បានន័យថា គ្រប់ករណីបៀតបៀនបែបនេះនឹងមិនត្រូវបញ្ជូនទៅតុលាការ និងបានយុត្តិធម៌ទេ ព្រោះមិនមានយន្តការការពារជនរងគ្រោះផងនោះ»។
រីឯនាយិកាប្រតិបត្តិនៃអង្គការយេនឌ័រ និងអភិវឌ្ឍន៍ដើម្បីកម្ពុជាលោកស្រី រស់ សុភាព បានសាទរចំពោះការស៊ើបអង្កេតរហូតដល់បញ្ចប់តំណែងរបស់លោក អ៊ុក កុសល នេះ។ ប៉ុន្តែលោកស្រីថា ទោសនេះមិនទាន់គ្រប់គ្រាន់ ព្រោះវានៅបង្ហាញពីការធ្លាក់ចុះនៃសីលធម៌សង្គម។
លោកស្រីបញ្ជាក់ថា៖ «ការលើកស្ទួយសីលធម៌សង្គមដោយគ្រាន់តែទម្លាក់បុណ្យស័ក្តិបន្តិចបន្តួចដូចនេះមិនទាន់គ្រប់គ្រាន់ដើម្បីឱ្យជនដែលប្រព្រឹត្តករណីបែបនេះរាងចាលទេ។ ខ្ញុំគិតថាមុនស្រី្តរងគ្រោះសម្រេចចិត្តប្តឹងនេះគឺវាកើតឡើងច្រើនដងហើយ...។ ដូចនេះក្រសួងគួរតែបន្តធ្វើតាមនីតិវិធីដើម្បីឱ្យស្ត្រីរងគ្រោះទទួលបាននូវយុត្តិធម៌មានភាពកក់ក្តៅលើថ្នាក់ដឹកនាំបន្តទៀត»។
លោកស្រីក៏បានជំរុញឱ្យក្រសួងកិច្ចការនារីដែលមានតួនាទីសំខាន់ក្នុងការការពារផ្នែកផ្លូវច្បាប់នេះ គួរតែពិនិត្យមើលលើករណីនេះ ដោយសារជនរងគ្រោះជាស្ត្រីភេទ។
គួរបញ្ជាក់ថា រដ្ឋមន្ត្រីក្រសួងមហាផ្ទៃលោក ស ខេង បានផ្អាកការងារលោក អ៊ុក កុសល បណ្តោះអាសន្នពីស្នងការនគរបាលខេត្តកំពង់ធំកាលពីខែសីហាកន្លងមក បន្ទាប់ពីក្រុមនគរបាលនារីក្នងខេត្តនេះ សុំឲ្យជួយរកយុត្តិធម៌លើការបៀតបៀនកេរខ្មាសពួកគាត់៕
